Read Tzotzil Romanos 13 Bible Online

Romanos 13 - Tzotzil bible

Romanos 13

¹Acotolicuc, ch'unbeic ich'beic ta muc' smantal ti Jcuch-abtel ajvaliletique. Ti jech oy ti ajvaliletique, va'anbilic yu'un ti Diose, yu'un ja' ac'bil yabtelic yu'un ti Diose.

²Jech un, ti buch'utic ta stoy sbaic ta stojol ti ajvalil ti yich'oj yabtele, ta scontrain ti c'u s'elan laj spas mantal ti Diose. Ti buch'utic ta stoy sba ta stojole, mu ono'ox xcol ta stsitsel.

³Ti ajvaliletique ma'uc ta xac'be xi'el ti buch'utic oy slequil ti c'usi ta spase, ja' ta xac'be xi'el ti buch'utic chopol ti c'usi ta spase. Mi ta xac'anic ti mu xa'ac'bat xi'el yu'un ti ajvaliletique, lecuc ti c'usi ta xapase. Ti ajvaliletique ta xlic yil ti c'u s'elan ti atalelique.

⁴Yu'un ti ajvaliletique c'otem ta yajtuneltac Dios yo' jech lec oyoxuc. Yan mi chopol ta xapas abae, oy xi'el ta xava'i ta stojol unbi. Mu ta jeche'uc no'ox oy ta yoc ta sc'ob ti tsitsel ta xaq'ue, yu'un ochem ta yajtunel Dios yo' jech ta xac'be yich' tsitsel ti buch'u chopol c'usi ta spase.

⁵Ja' yu'un un, tsots sc'oplal ich'ic ta muc', ch'unbeic smantal ti ajvaliletique. Ma'uc no'ox ta xa xaxi' yu'un ti tsitsel ta xaq'ue, nopo ava'i lec ti jech sc'an pasele.

⁶Ti jech taj xtoc une, tojic ti patane, yu'un ti j'abteletique c'otemic ta yajtuneltac Dios, ja' jech yabtel yich'ojic.

⁷Ich'o ta muc' ti c'u s'elan yabtel jujuchope. Tojic me ti patan ti ta sc'anboxuque. Tojic me ti sloc' ti ta sc'anboxuque. Ich'ic ta muc' ti buch'u ich'bil ta muq'ue. Ti buch'u lec x'ilate, lec me xavilic ec.

⁸Ch'abaluc me avilic ta stojol yan. Ja'uc no'ox me avilic ti c'ux xava'i abaic ta jujun tale. Yu'un ti buch'u c'ux ta xa'i ti jun xchi'ile, c'ot xa ta pasel yu'un scotol ti c'u s'elan ta xal ti oy c'usi tsots albil sc'oplale.

⁹Yu'un ti mantaletique xi ta xale: “Mu xamulivaj. Mu xamilvan. Mu xa'elc'aj. Mu xavu'ninbe c'usi oy yu'un ti yane.” Ta scotol ti mantaletique, ta jbel no'ox mantal ta xc'ot ta pasel scotol ti xi ta xale: “C'uxubino achi'iltac jech c'u cha'al ta xac'uxubin abae.”

¹⁰Ti buch'u oy syail xc'uxul yo'ntone, mu spas ti c'usi chopol ta stojol ti xchi'ile. Ta sventa ti syail xc'uxul o'ntonale, j'ech'el ta xc'ot ta pasel ti oy c'usi tsots albil sc'oplale.

¹¹Ati va'i s'elan laj jbijubtasoxuque, yu'un xavilic ti c'usi xc'otan ta pasele, ti ja' xa yorail ti ta xavic' asatique, yu'un po'ot xa sta yorail ti colebale. Yan ti c'alal laj jch'untic talele, jal to ox sc'an.

¹²Po'ot xa x'ech' ti ac'ubale, yu'un ta xa sacub talel ti osile. Jech o xal un, quictatic ta spasel ti c'usitic sventa ic'al osile. Lapic ti amacobbailic ta spasel ta sventa ti saquil osile jech c'u cha'al junuc soldado ti slapoj ti smacobbaile.

¹³Oyuc me jtuq'uiltic jech c'u cha'al ti buch'u ta xanav ta c'ac'altique. Ma'uc no'ox me jtamojtic ti yacubele, ti bu xvochvunet ta ve'el uch' vo' ta spasel ti q'uine, ti mulivajele, ti c'usi chopol ta q'uelele, ti jsa'-c'opetique, ti it'ix o'ntonale.

¹⁴Ja' lec, maco abaic ta sventa smuc'ul stsatsal ti Cajvaltic Jesucristoe yo' mu staojuc yav c'upil ta xava'i ta spasel stalel ti lum ach'ele.