Read Tzotzil Romanos 14 Bible Online

Romanos 14 - Tzotzil bible

Romanos 14

¹Ich'ic lec ta muc' ti buch'u ch'abal to lec yip yo'nton ta xch'unele, mu xavul abaic xchi'uc ti c'usi vocol ta a'yiele.

²Ta xcaltic no'ox ava'i jech c'u cha'al li'e: Oy jlom xch'unojic ti stac' no'ox slajes scotol ti c'usi ta staique. Ja'uc ti jlom ti mu'yuc to lec yip yo'ntonic ta xch'unele, naca uni itaj ta slajesic.

³Lec un cha'e, ti buch'u ta slajes scotol ti c'usi ta stae, mu me chopoluc xc'opoj ta stojolal ti buch'u naca t'ujbil ti c'usi ta slajese. Jech ti buch'u naca t'ujbil ti c'usi ta slajese, mu me chopoluc xc'opoj ta stojol ti buch'u sna' slajesel scotol ti c'usi ta stae. Co'ol ic'bilic yu'un ti Diose.

⁴¿Buch'uot ya'yel un cha'e ti ta xana'lebe yaj'abtel ti yane? Mi lec ta xbat yu'un, mi chopol ta xbat yu'un, ja' sventa ti yajvale. Ta sta ti lec ta xcome, yu'un oy smuc'ul stsatsal ti Cajvaltic yo' ta xc'ot ta pasel yu'un ti lec xcome.

⁵Oy bu jlom tsots sc'oplal ta xa'iic ti jun c'ac'ale. Oy jlom co'ol no'ox ta xa'iic ti c'u s'elan ta x'ech' scotol ti c'ac'ale. Jujun tal, snopuc lec c'u s'elan ta xac' ti sjol ta xch'unele.

⁶Ti buch'u tsots sc'oplal ta xa'i ta xchabi ti jun c'ac'ale, ta spas ta sventa yich'el ta muc' ti Cajvaltique. Ti buch'u mu'yuc tsots sc'oplal ta xa'i ta xchabi ti jun c'ac'ale, ta spas ta sventa yich'el ta muc' ti Cajvaltique. Ti buch'u ta stun ta slajes scotol xtoque, ta spas ta sventa yich'el ta muc' ti Cajvaltique, xchi'uc ta xalbe vocol ti Diose. Ti buch'u naca t'ujbil ti sve'el ta slajese, ta spas ta sventa yich'el ta muc' ti Cajvaltique, xchi'uc ta xalbe vocol ti Diose.

⁷Yu'un mu'yuc buch'u junucal sventainoj sba stuc ti li' cuxul ta sba banomile. Mi ja'uc sventainoj sba stuc ti jech ta xchame.

⁸Ti jech cuxulotique, cuxulotic ta sventa ti Cajvaltique. Mi lijchame, lijcham ta sventa ti Cajvaltique. Ta xcaltic une, mi cuxulotic, mi chamemotic, yu'unotic ono'ox ti Cajvaltique.

⁹Ja' yu'un un, cham ti Cristoe. Ja' jech xtoc cha'cuxi yo' jech ta xc'ot ta Ajvalil yu'un scotol ti buch'utic chamemic xae, xchi'uc ti buch'utic cuxulic toe.

¹⁰¿C'u cha'al ya'yel un cha'e ti ta xalo'ilta ti achi'ile, ti bajbil tenbil avu'une? Yu'un jcotoltic ta xc'ot jva'an jbatic ta stojol ti Diose yo' jech ta xquich'tic chapanel yu'un.

¹¹Yu'un ti ch'ul c'ope xi ta xale: “Ta xcal ta jamal ta sventa ti jech cuxulune, ta squejan sbaic ta jtojol scotolic. Scotolic ta xalbeic slequil ti Diose.”

¹²Jech un, ti jujunotique ta xc'ot cac'tic cuenta ta stojol ti Dios ti c'u s'elan laj jpastique.

¹³Jech o xal un, lajuc sc'oplal ta jlo'ilta jbatic ta jujun tal. Ja' lec albo avo'ntonic ti mu'yuc c'usi ta xapas yo' mu ta acojuc ta xayanijesbeic yo'nton ti achi'il ti buch'u mu'yuc to lec yip yo'nton ti c'u s'elan c'otem ta ch'unele.

¹⁴Ti vu'une jna'oj lec ta sventa ti Cajvaltic Jesuse, mu'yuc c'usi ta soquesvan. Ti buch'u ta snop ti ta soquesvan ti c'usi ta slajese, ta ono'ox soquesat.

¹⁵Mi ta xayanijesbe yo'nton ti achi'il ta scoj ti c'usi ta xalajese, mu'yuc xa xc'uxul avo'nton ta stojol. Mu me ta scojuc ave'el ta xch'ay ta be avu'un ti buch'u cham ti Cristo ta sventae.

¹⁶Mu xavaq'uic ta chopol c'optael ti oy c'usi lec laj ataique.

¹⁷Yu'un ti ventainel yu'un ti Diose, ma'uc tsots sc'oplal ti c'usi xu' stac' lajesele, ti c'usi xu' stac' uch'ele. Ja' tsots sc'oplal ti tuc'uc ti cuxlejale, ti lamajemuc ti o'ntonale, ti muyubajel ta sventa ti Ch'ul Espíritue.

¹⁸Ti buch'u jech yac'oj sba ta tunel yu'un ti Cristoe, lec x'ile yu'un ti Diose, xchi'uc lec ta x'ile yu'un ti buch'uuc no'oxe.

¹⁹Jech o xal un, jpastic tsatsal ta sa'el batel ti bu ta xac' jun o'ntonale, xchi'uc ti ta jcoltaan jbatic ta jujun tale.

²⁰Ma'ucuc me ta scoj ve'lil ta xasoquesbe yabtel ti Diose. Scotol ti ve'lile, lec ono'ox, mu'yuc c'usi chopol. Ti bu chopol ta xbate, ja' ti oy c'usi ta xalajes ti bu xu' ta xyanij yo'nton avu'un ti yane.

²¹Ja' lec, mu xatijbe sc'oplal ta slajesel ti beq'uete, ta yuch'el ti vinoe, ta spasel yan ti c'usi mu'yuc smelole yo' mu xyanij yo'nton ti achi'il ti ta xc'ot ta chibajel avu'un ti c'u s'elan xch'unoje.

²²Ti c'u s'elan c'otem ta avo'nton ta xch'unele, avu'unuc atuc ta stojol ti Diose. Yan no'ox yutsil ti buch'u ta x'ac'bat sna' ta sjol yo'nton ti mu'yuc smul ta sta ta xa'i yu'un ti c'usi ta spase.

²³Ti buch'u xchibet yu'un ti c'usi ta slajese, ta sta smul, yu'un mu junuc yo'nton ta slajes ti c'u s'elan stac' lajesele. Scotol ti c'usi naca sujom bail ta xich' lajesele, ja' mulil.