Read Tzotzil Romanos 16 Bible Online

Romanos 16 - Tzotzil bible

Romanos 16

¹Ta jc'ubanboxuc ta atojolic ta sventa ti jun ants Febee, ti lec abtej ta stojolic ti jch'unolajeletic ti oyic ta Cencreas jteclume.

²Ta sventa ti Cajvaltique, ich'beicun ta muc', yu'un ja' jech cabteltic sc'an ta jpastic ti vo'otic jch'unolajelotique. Coltaic me ta sventa ti c'usi ta xtun yu'une, yu'un ep laj xa scolta ti jch'unolajeletique. Ja' jech xtoc laj scoltaun ec.

³Chabanuc xavalbe ya'i ti Priscilae, ti Aquilae, ti ja' jchi'iltac ta abtel ta sventa ti Cristo Jesuse.

⁴Jutuc xa mu lajic ta milel ti stuquique yo' licol ti vu'une. Ma'uc no'ox vu'un ti coliyal xichie, yu'un jech ta xalic scotol ti jyanlum jch'unolajeletique.

⁵Chabanuc xavalbe ya'iic xtoc ti jch'unolajeletic ti ta stsob sbaic ta sna ti Priscilae xchi'uc ti Aquilae. Chabanuc xavalbe ya'i ti Epéneto ti lec ta xquil jbacutique, ti oy ta Acaya banomil ti ja' ba'yel c'ot ta yo'nton ta xch'unel ti Cristoe.

⁶Chabanuc xavalbe ya'i ti Mariae, ti ep abtej ta atojolique.

⁷Chabanuc xavalbe ya'i ti jvinquileltac Andrónicoe xchi'uc ti Juniase, ti ja' jchi'iltac ta chuquel to oxe, ti buch'utic lec ojtiquinbilic yu'un ti jcholc'opetique, ti buch'utic ba'yel c'ot ta yo'ntonic ta xch'unel ti Cristoe, ts'acal to ti vu'une.

⁸Chabanuc xavalbe ya'i ti Ampliatoe, ti lec ta xquil jbacutic xchi'uc ta sventa ti Cajvaltique.

⁹Chabanuc xavalbe ya'i ti Urbanoe, ti jchi'iltic ta abtel ta sventa ti Cristo Jesuse, xchi'uc ti Estaquis ti lec ta xquil jbacutique.

¹⁰Chabanuc xavalbe ya'i ti Apelese, ti laj yac' iluc jun yo'nton ta stojol ti Cristoe. Chabanuc xavalbe ya'iic ti c'u yepal oy ta sna ti Aristóbuloe.

¹¹Chabanuc xavalbe ya'i ti jvinquilel Herodione xchi'uc ti c'u yepal oy ta sna ti Narcisoe, ti c'ot ta yo'ntonic ta xch'unel ti Cajvaltique.

¹²Chabanuc xavalbe ya'iic ti Trifenae, ti Trifosae, ti ja' ta x'abtejic ta yabtel ti Cajvaltique, xchi'uc ti jun ants Pérsida ti ep abtej ta sventa yabtel ti Cajvaltique.

¹³Chabanuc xavalbe ya'i ti Rufo ti ja' lequil jch'unolajel yu'un ti Cajvaltic ta x'ilat yu'un ti jch'unolajeletique, xchi'uc ti sme'e ti co'ol s'elan jme' ta xca'ie.

¹⁴Chabanuc xavalbe ya'iic ti Asíncritoe, ti Flegontee, ti Hermese, ti Patrobase, ti Hermase, xchi'uc ti yan jch'unolajeletic ti jmoj ta stsob sbaic xchi'uque.

¹⁵Chabanuc xavalbe ya'iic xtoc ti Filólogoe, ti Juliae, ti Nereoe, xchi'uc ti xchi'il ta voq'uel ti Nereoe, ti Olimpase, xchi'uc scotol ti jch'unolajeletic ti jmoj ta stsob sbaic xchi'uque.

¹⁶Chabanuc xavalbe abaic ta jujun tal. Tsacbo abaic ac'obic. Chabanucoxuc xayalboxuc scotol ti jch'unolajeletic yu'un ti Cajvaltic ti oyic ta jujun tsobobbail ti bu oyune.

¹⁷Ti jech jchi'il jbatique, ta jc'anboxuc vocol ta atojolic, q'uelic lec ti buch'u ta xch'ac svinique, ti ta soquesvane. Yu'un ti buch'u jech ta spas taje, ta scontrain ti c'u s'elan laj avich'ic chanubtasele. Ja' yu'un un, mu xachanbeic yo'ntonic.

¹⁸Yu'un ti buch'utic jech stalelic taje, ma'uc yajtuneltac ti Cajvaltic Jesucristoe. C'ajomal no'ox yac'ojbeic yipal ta spasel ti c'usi ta sc'an ti yo'ntonique, xchi'uc jun xa yutsil ye sti'ic ta spas sbaic yo' ta slo'laic ti buch'utic co'ol s'elan ololetic ta xilique.

¹⁹Yu'un vinajem ac'oplalic ti biq'uit avac'oj abaique. Ximuyubaj xa avu'unic ti jech avo'ntonique. Ta jc'an ti oyuc abijilic ta spasel ti c'usi leque. Ma'uc ta jc'an ti naca chopol ti c'usi ta xapasique.

²⁰Ti j'ac'-jun-o'ntonal Diose, ta jliquel no'ox ta slilinbe yip ti pucuje yo' xu' avu'unic ta xpech'el ta teq'uel. Ac'o sva'an sba ta yaq'uel slequilal ta atojolic ti Cajvaltic Jesucristoe.

²¹Chabanuc xayalbeic ti Timoteoe, ti ja' jchi'il ta abtele, xchi'uc ti jvinquileltac Lucioe, ti Jasone, ti Sosípatere.

²²Chabanuc xacalbeic ta sventa ti Cajvaltic ti vu'un Tercio ti ta jts'iba ti jlic vun li'e.

²³Chabanuc xayalboxuc ti Gayoe, ti li' jch'amunojbe ti snae, ti yac'oj ye ta stsob sbaic ti jch'unolajeletic ta snae. Chabanuc xayalbeic xtoc ti Erastoe, ti ja' jun jchabiej taq'uin yu'un ti jteclum li'e, xchi'uc ti jchi'iltic Cuartoe.

²⁴Ac'o sva'an sba ta yaq'uel slequilal ti Cajvaltic Jesucristo ta atojol acotolic. Jechuc.

²⁵Calbetic slequil Dios ti Buch'u xu' yu'un ta yaq'uel yip avo'ntonic jech c'u cha'al ta xal ti colebal lequil ach' c'op ti vu'un ta xcale, ti ja' sc'oplal ti Jesucristoe. Taje, co'ol xchi'uc ti c'u s'elan snopoj talel ti Dios ti mucul to ox yu'un c'alal mu'yuc to ox meltsajem ti banomile.

²⁶Ja'uc avi tana une, laj xa yac' ta na'el co'ol xchi'uc ti c'u s'elan laj sts'ibabeic comel ti j'alc'opetique, co'ol xchi'uc ti c'u s'elan smantal ti cuxul Diose. Ti c'usi snopoj ti Dios ti mu xvinaj to oxe, laj xa yac' ta ojtiquinel ta stojol scotol ti jnaclejetic ti oyic ta jujun muc'tiquil lum ti oy ta sjoylej banomile yo' jech ta xc'ot ta yo'ntonic ta xch'unel ta spasbel ti c'usi ta sc'ane.

²⁷Ti stuc no'ox jech ti Diose, ti jelavem ti sbijile, ich'biluc ta muc' sbatel osil ta sventa ti Jesucristoe. Jechuc.