Read Tzotzil Romanos 2 Bible Online

Romanos 2 - Tzotzil bible

Romanos 2

¹Mu'yuc ta alel buch'uot, yu'un mu'yuc apacob-c'op ti jech xachapanbe xa smul ti yane, Yu'un ta xatic'be aba amul atuc ti jech ta xachapanbe smul ti yane, yu'un jech ta xapas ec jech c'u cha'al ta spasique.

²Ti bu ja' melele, jna'tic lec ti ja' jech ta xchapanvan ti Dios c'alal ta xac'be stoj smul ti buch'u jech ta spasic taje.

³Ma'uc ma' ti ch'an xa'ute yu'un Dios c'alal ta xachapanbe smul ti yane c'alal jech ta xapas eque.

⁴Ti yutsilal slequilale xchi'uc ti sts'iquemal xcuchemal yu'un ti Diose, ta xabaj ta xajip ti c'alal ja' ta sventa yutsilal slequilal ac'o asutes aba talel ta stojol.

⁵Ta scoj ti toj tsots avo'ntone, mu xac'an xasut ta stojol ti Diose. C'ajomal yacal xa ta xacajtsobilan atsitsel, ti atsoboj xa atsitsel c'alal ta sta yorail ta xtal lequil chapanvanuc ti Dios ti jbel xal oy ti mulile.

⁶Ta xac'be stoj jujun ti c'u s'elan laj xa spasique.

⁷Ta xac'be xcuxlejal sbatel osil ti buch'utic yac'ojbeic yipal ta sa'el ti slequilalique, ti yich'elic ta muq'ue, ti c'usi mu sna' xlaje, ti mu'yuc laj yicta sbaic ta spasel ti c'usi leque.

⁸Ja'uc ta sc'ac'al yo'nton, ti Diose ta stsits ti jtoyobbaetique, ti xcaltique, ja'ic ti buch'utic ta scontrainic ti melele, ti lec xa xa'i ta stoybel sc'oplal ti c'usi chopole.

⁹X'oc' x'avanic yu'un svocolic ta j'ech'el ti buch'utic ta spasic ti c'usi chopole, ti ba'yel ta xc'ot ta stojol ti israeletique xchi'uc ta stojol ti jyanlumetique.

¹⁰Ja'uc ti buch'utic ta spasic ti c'usi leque, ta staic ta stojol Dios ti slequilalique, ti yich'elic ta muq'ue, ti slamajemal yo'ntonique, ti ba'yel ta xc'ot ta stojol ti israeletique xchi'uc ta stojol ti jyanlumetique.

¹¹Yu'un ti Diose mu jeltosuc sna' xchapanvan.

¹²Scotol ti buch'utic laj sa' smulic ti mu'yuc ya'binojic ti oy c'usi tsots sc'oplal albil yu'un ti Moisese, ma'uc ta sventa mantal ti ch'ayel ta xbatique. Ti buch'utic ta sa' smulic c'alal ya'binojic ti oy c'usi tsots sc'oplal albile, ta xich'ic chapanel yu'un ti mantale.

¹³Yu'un mu'yuc slequil stuq'uilic ta stojol Dios ti buch'utic ja' no'ox ta xa'iic ti oy c'usi tsots albil sc'oplale. Ti buch'u lec x'ileique, ja' no'ox ti buch'u ta xc'ot ta pasel yu'unique.

¹⁴Ja'uc ti jyanlumetic ti ch'abal ta yoc ta sc'obic ti oy c'usi tsots sc'oplal albile, oy ta sjol ta yo'ntonic ti mantale. Yu'un ta x'ac'bat sna'ic ta yo'ntonic spasicuc ti oy c'usi tsots albil sc'oplale, yu'un ja' jech smantalil yu'unic.

¹⁵Yu'un ta xvinaj ta stojolic ti oy c'usi tsots sc'oplal albil ti oy ta yo'ntonique. Yu'un ta x'ac'bat sna' ta sjol ta yo'ntonic mi lec ti c'usi ta spase, mi ta sta smul yu'un ti c'usi ta spase.

¹⁶C'alal ta sta sc'ac'alil ta xchapanvan ti Dios ta sventa ti Jesucristoe, ta xvinaj scotol ti c'usitic snopojic ta mucule jech c'u cha'al ta xal ti lequil ach' c'op ti vu'un ta xcale.

¹⁷Ta xavalbe aba ti israelote, ti atsacoj avip ta sventa ti oy c'usi tsots sc'oplal albil yu'un ti Moisese. Jech o xal ta xatoy aba ti lec xavil abaic xchi'uc ti Dios avaloje.

¹⁸Ta xaval ti xana' c'usi ta sc'an yo'nton ti Diose, xchi'uc xana' st'ujel ti c'usi lec avaloj ta sventa ti oy c'usi tsots sc'oplal albile.

¹⁹Jech o xal atoyoj aba ti xatojob ta sbeiltasel ti ma'sate, ti xatojob ta sjapbel stoj ti buch'u ta xanav ta ic'al osile,

²⁰ti xatojob ta stojobtasel ti buch'utic mu'yuc sbijilique, ti xu' avu'un ta sbijubtasel ti ololetic s'elanique, yu'un ta sventa ti oy c'usi tsots sc'oplal albile, oy ta avoc ta ac'ob ta yojtiquinel ti ja' sventa ta xistojobtasotic yu'une, xchi'uc ti c'usi ja' melele.

²¹Lec un cha'e, ti jech ta xachanubtas ti yane, ¿c'u cha'al mu xachanubtas aba atuc? Ti ta xaval ti mu stac' ti elc'ajele, ¿c'u cha'al ti vo'ot cajal ta xa'elc'aj un cha'e?

²²Ti ta xaval ti mu stac' ti mulivajele, ¿c'u cha'al ta xamulivaj ti vo'ote? Ti mu xavilbe sat ti c'usi meltsanbil ta c'abale, ¿c'u cha'al ta xavelc'anbe ti sc'ulejal ti oy ta sna ti loc'obbail diosetique?

²³Xatoyet xchi'uc ti oy c'usi tsots sc'oplal albil yu'un ti Diose, ja'uc le'e, ta xasoquesbe sc'oplal ti Diose, yu'un mu xc'ot ta pasel avu'un ti c'usi ta xale.

²⁴Oy smelol un cha'e ti xi ta xal ti ch'ul c'ope: “Ta acojic vo'oxuc ti chopol ta xc'opojic ta stojol Dios ti jyanlumetique.”

²⁵Melel, ti circuncisione oy stunel mi ta xich' ch'unbel ti oy c'usi tsots sc'oplal albil yu'un ti Moisese. Mi mu xc'ot ta ch'unel yu'une, co'ol s'elan mu'yuc yich'oj circuncisión.

²⁶Ja'uc ti buch'u ta xc'ot ta pasel yu'un ti oy c'usi tsots sc'oplal albile, manchuc mi mu'yuc yich'oj ti circuncisione, co'ol s'elan yich'oj ti circuncisione.

²⁷Ti buch'u mu'yuc yich'oj ti circuncisión ta sbec'tale, ti ta xc'ot ta pasel yu'un ti oy c'usi tsots sc'oplal albile, ta svinajesbe stalel ti buch'u oy ta yoc ta sc'ob ti oy c'usi tsots sc'oplal albile xchi'uc ti yich'oj ti circuncisione, yu'un mu xch'un ti oy c'usi tsots sc'oplal albile.

²⁸Ti jech israele, ma'uc no'ox ta spat xocon, ma'uc no'ox ti oy senyail ta sbec'tal stacopale.

²⁹Xi s'elan ma' ti bats'i israele: ja' sc'oplal ti buch'u yich'oj circuncisión ta yutil yo'ntone, ma'uc ta sventa ti c'u s'elan ts'ibabil ta vune, yu'un ja' ta sventa stsatsal ti Ch'ul Espíritue. Ti buch'u jech s'elan taje, lec x'ile yu'un Dios, ma'uc lec x'ile ta sventa ti jnaclejetique.