Read Tzotzil Romanos 4 Bible Online

Romanos 4 - Tzotzil bible

Romanos 4

¹¿C'usi laj sta ti jmolmuc'totic Abraham ta vo'nee?

²Ati lajuc sta ti lec x'ile yu'un Dios ta sventa ti c'usi laj spase, ta stoy sba ti jechuque. Ja'uc le'e, mu cha'beluc stac' stoy sba ta stojol ti Diose.

³Yu'un xi ta xal ti ts'ibabil ta ch'ul c'ope: “Ti Abrahame teq'uel lec c'ot ta yo'nton ti c'u s'elan albat yu'un ti Diose. Ti jech teq'uel c'ot ta yo'nton ti c'u s'elan albat yu'un ti Diose, laj sta ti lec x'ilee.”

⁴Caltic ava'i un cha'e, mi oy buch'u ta x'abteje, ma'uc q'uelanbil ta xich' ti stojole, yu'un ja' stojol ti yabtele.

⁵Buch'uuc no'ox ti teq'uel ta xc'ot ta yo'nton ta xch'unel ti xu' yu'un Dios ta xch'aybe smul ti jsa'mulile, ti ma'uc ta sventa jsetuc yabtel laj spas ti jech ta stae, ti ja' no'ox teq'uel ta xc'ot ta yo'nton ti lec x'ile yu'un ti Diose, ti buch'u jech oy ta yo'ntone, lec x'ile yu'un Dios ta sventa ti jech xch'unoje.

⁶Ti Davide laj ono'ox yal ti yan no'ox yutsil ti buch'u laj sta ti lec x'ile yu'un ti Diose, ti ma'uc ich'bil ta venta ti c'usi laj spase.

⁷Xi laj yal ti Davide: “Yan no'ox yutsil ti buch'utic ch'aybat yu'un Dios ti xchopolalic laj spasique, ti mu'yuc x'ac'bat stoj ti smulique.

⁸Yan no'ox yutsil ti buch'u mu'yuc ta xq'uelbat smul yu'un ti Diose.”

⁹¿Mi ja' no'ox laj staic utsilal ti buch'u yich'ojic ti circuncisione? ¿Mi mu'yuc ta staic xtoc ti buch'u mu'yuc yich'oje? Laj xa calcutic ava'iic, ti Diose lec laj yil ti Abraham ta sventa ti teq'uel c'ot ta yo'nton ta xch'unel ti c'usi laj yal ti Diose.

¹⁰C'alal laj sta ti Abraham ti lec x'ilee, ¿mi ja' o c'alal yich'oj xa ti circuncisione, mi mu'yuc to ox yich'oj? Mu'yuc to ox yich'oj un.

¹¹Ta ts'acal to lic yich' circuncisión ti Abrahame, senyail ti laj sta ti lec x'ile yu'un ti Dios ta sventa ti c'ot ta yo'nton ta xch'unele. Ti jech c'ot ta yo'nton ta xch'unel ti Abrahame, c'ot ta totil yu'unic ti buch'utic jech ta xc'ot ta yo'ntonic ta xch'unele, manchuc mi mu'yuc yich'ojic ti circuncisione. Ta staic ti lec x'ileic yu'un Dios ti buch'utic jech ta xc'ot ta yo'ntonic ta xch'unele.

¹²Jech no'ox xtoc ti Abrahame c'otem ta totil yu'unic ti buch'utic yich'ojic ti circuncisione, ma'uc ta sventa ti yich'ojic ti circuncisione, ja' ta sventa ti jech ta xc'ot ta xch'unel jech c'u cha'al c'ot ta yo'nton ta xch'unel ti Abraham c'alal mu'yuc to ox yich'oj ti circuncisione.

¹³Ti Abrahame albat ono'ox yu'un Dios ti ta x'ac'bat sventain ti banomil xchi'uc ti snitilultaque. Ti jech i'albat ti Abrahame ma'uc ta sventa ti laj xch'un ti oy c'usi tsots albil sc'oplale. Ti jech i'albate ja' ta sventa ti lec x'ile yu'un ti Dios ta sventa ti c'u s'elan c'ot ta yo'nton ta xch'unele.

¹⁴Ti ja'uc ta staic rextoil yu'un Dios ti buch'utic ta xch'unic ti oy c'usi tsots albil sc'oplale, va'i unbi, ti oy c'usi c'otem ta o'ntonal ta xch'unele, mu'yuc c'usi bal o. Ti oy c'usi yaloj ti Dios ta xaq'ue, ta xch'ay sc'oplal.

¹⁵Yu'un ti oy c'usi tsots albil sc'oplale, ja' no'ox tsitsel ta xich' talel. Ja'uc ti bu mu'yuc oy c'usi tsots albil sc'oplale, mu'yuc tijel ta c'op yu'un ti mantale.

¹⁶Jech o xal ti Abrahame, yo' laj sta xchi'uc ti snitilultac ti c'usi yaloj ti Dios ti ta xaq'ue, ta matanal laj sta ta sventa ti c'ot ta yo'ntonic ta xch'unele. Ti oy c'usi yaloj Dios ta xaq'ue, ma'uc no'ox ta staic ti buch'utic ta xch'unic ta spasel ti oy c'usi tsots albil sc'oplale. Ta staic ec ti buch'utic jech ta xc'ot ta ch'unel yu'unic jech c'u cha'al laj xch'un ti Abrahame. Jech o xal un, c'ot ta totil cu'untic jcotoltic.

¹⁷Ta sba ta sat ti Diose, ja' totil cu'untic ti Abraham ta sventa ti oy c'usi c'ot ta yo'nton ta xch'unele. Yu'un xi ta xal ti ts'ibabil ta ch'ul c'ope: “Lac'ot xa ta totil cu'un ta sventa epal muc'tiquil lumetic.” Yu'un ti Dios taje ta xac'be xcuxlejal ti animaetique, xchi'uc ta xac' ta ilel ti c'usitic ch'abal toe.

¹⁸Ac'o mi mu'yuc srazonal laj ya'i ti Abraham ti oy c'usi smalaoj ta stae, laj to xch'un ti ta xc'ot ta pasel ti spatobil yo'nton ti ta xc'ot ta totil yu'un epal muc'tiquil lumetique jech c'u cha'al ti xi ono'ox albate: “Ja' jech yepal ta xbat anitilultac jech c'u cha'al le'e.”

¹⁹Ti Abrahame mol xa, jutuc xa sc'an vo'vinic (100) jabil ti xch'iel sc'opojele. Manchuc mi laj yal ta yo'nton ti co'ol s'elan chamemic xa xchi'uc ti yajnile, ti laj xa sc'oplal ta x'alaj xnich'najique, ja'uc le' une, mu'yuc bu xch'ay ta yo'nton, staoj yav c'otem ta yo'nton ti ta x'ac'bat jun xnich'on yu'un ti Diose.

²⁰Mu'yuc xna'et, mi ja'uc chibaj yo'nton ti Abraham ti oy c'usi albat yu'un ti Diose. C'ajomal ayan yip yo'nton ta xch'unel. Xlequil c'opoj no'ox ta stojol ti Diose.

²¹J'ech'el c'otem ta yo'nton ti oy smuc'ul stsatsal ti Dios ti ta xc'ot ta pasel ti c'usi yaloje.

²²Jech o xal laj sta ti lec ile yu'un Dios ta sventa ti jech c'otem ta yo'nton ta xch'unele.

²³Ma'uc no'ox sc'oplal Abraham ti jech ts'ibabil ti laj sta ti lec ile yu'un ti Dios ta sventa ti c'otem ta yo'nton ta xch'unele.

²⁴Ts'ibabil jc'oplaltic ec ti lec xij'ile yu'un ti Dios ta sventa ti c'otem ta co'ntontic ta xch'unel ti Buch'u laj xcha'cuxes ti Cajvaltic Jesuse.

²⁵Aq'ue ta milel ta scoj ti jmultique, xchi'uc cha'cuxesat yo' jech ta jtatic ti lec xij'ile yu'un ti Diose.