Read Tzotzil Romanos 5 Bible Online

Romanos 5 - Tzotzil bible

Romanos 5

¹Ti jech laj jtatic ti lec xij'ile yu'un Dios ta sventa ti c'ot ta o'ntonal ta xch'unele, jun co'ntontic xchi'uc ti Dios ta sventa ti Cajvaltic Jesucristoe.

²Ta sventa ti c'ot ta o'ntonal ta xch'unel ti Cristoe, laj jtatic ti lec oyotic ta stojol ti Diose. Ja' yip co'ntontic xchi'uc jpatoj co'ntontic ta yich'bel slequilal ti Diose.

³Ma'uc no'ox taje, ja' jech xtoc ximuyubajotic yu'un ti vocole. Jna'tic lec ti ta sventa ti vocole, ta xac' smuc'ul co'ntontic yo' mu xac' chibajel.

⁴C'alal oy smuc'ul co'ntontique, jun yutsil jc'oplaltic. C'alal jun yutsil ti jc'oplaltique, xpatet co'ntontic ta jmalatic ti oy c'usi ta jtatique.

⁵Mi ja'uc xlo'ilaj co'ntontic yu'un ma' ti oy c'usi jpatoj co'ntontic jmalaojtic ta jtatique. Jbel sc'oplal ta xc'ot ta pasel, yu'un ti Diose yac'ojbotic ta co'ntontic ti syail xc'uxul yo'nton ta sventa ti Ch'ul Espíritu ti laj yac'botique.

⁶C'alal mu xa cha'beluc stac' jcolta jba jtuctique, ja' o yorail tal chamuc ti Cristo ta scoj ti jsa'muliletique.

⁷Mu'yuc ono'ox buch'u sq'ueloj sba ta xac' sba ta milel ta sventa yan vinic ac'o mi lequil vinic xa'i sba. Mi oy c'usi lec pasbat yu'un ti vinique, xu' nan ti sq'ueloj sba ta xac' sba ta milel unbi.

⁸Ja'uc ti Diose laj yac' ta ilel ti c'ux ta xijya'iotique, yu'un laj yac' ta milel ti Cristo ta jcojtic ti c'alal jsa'mulilotique.

⁹Avi tana une, laj xa jtatic ti lec xij'ile yu'un ti Dios ta sventa ti cham ti Jesucristoe. Jech o xal un, oy lec smelol ti mu xba quich'tic tsitsel ta sventa stuc ti ta slajebal c'ac'ale.

¹⁰C'alal yajcontraotic to ox ti Diose, laj jtatic ti jun co'ntontic xchi'uc ta sventa cham ti Xnich'one. Avi tana un ti jech laj xa jtatic ti jun xa co'ntontic xchi'uc ti Diose, oy lec smelol ta j'ech'el ti ta xijcolotic ta sventa ti laj yac' xcuxlejal ta jtojoltique.

¹¹Ma'uc no'ox taj une, ta sventa Cristo xijmuyubajotic xa ta stojol ti Diose, yu'un ja' ta sventa laj jtatic ti jun co'ntontic xchi'uc ti Diose.

¹²Ta scoj jun vinic ayan talel ti mulil ta banomile. Ti jech ayan talel ti mulile, och talel ti lajel tubele. C'ot ta stojol ti jnaclejetic ta banomile, yu'un jsa'muliletic scotolic.

¹³C'alal mu'yuc to ox ti oy c'usi tsots sc'oplal albile, oy xa ono'ox ti mulil ta banomile, ac'o mi mu'yuc stijel ta alel ti mulil ti bu mu'yuc ta xich' tunesel ti oy c'usi tsots albil sc'oplale.

¹⁴Manchuc mi jech un, lic ono'ox talel ti mulil c'alal cuxul to ox ti Adane, ti jech o tal ti lajel tubel ti c'alal to cuxul ti Moisese, yu'un jsa'mulil scotolic. Ti smulic taje, ma'uc ta scoj ti laj sbajic jun mantal jech c'u cha'al laj spas ti Adane. Ti jech ic'ot ta pasel taje, ja' svinajeb ti oy c'usi ta jtatic ta sventa ti Buch'u ta xvul ta loq'uele.

¹⁵Ti matanal laj yac'botic ti Diose, mu xco'olaj xchi'uc ti c'usi laj jtatic ta scoj smul ti Adane. Yu'un ta smul no'ox jun vinic, laj jtatic ti chamel lajel jcotoltique. Ti ta yutsil slequil yo'nton ti Diose, laj jtatic ta matanal ta sventa ti Jesucristo ti jelavem yutsile, ja' slequilal scotolic.

¹⁶Ti c'u s'elan laj sta smul ti jun vinique, mu xco'olaj xchi'uc ti matanal laj yac'botic ti Diose. Ta scoj ti laj sbaj jbel mantal ti jun vinique, jcotoltic laj jtatic chapanel, ta jtojtic ti jmultique. Ja'uc ti matanal laj yac'botic ti Diose, ta matanal lec x'ile ti jnaclejetic yu'un ti Diose, manchuc mi mu albajuc laj sa' ti smulique.

¹⁷Ti ayan yip ti mulil ti ta xijchamotic yu'une, ja' ta scoj ti laj sta smul ti jun vinique. Oy lec smelol un ti ta sventa ti jun vinic Jesucristoe, laj jtatic ti ach' cuxlejal ta matanale. Laj jtatic ti lec xij'ile yu'un ti Dios ta sventa ti Jesucristoe.

¹⁸Laj staic ti ta stoj smulic scotol ti jnaclejetic ta banomil ta scoj smul ti vinic Adane. Ta sventa ti jun yutsil ti c'u s'elan laj spas ti Jesucristoe, jcotoltic mu'yuc ta jtatic ti chapanele, mi ja'uc ta jtoj ti jmultique.

¹⁹Ta scoj ti jun vinic ti laj sbaj ti jbel mantale, ja' yu'un un, jsa'mulil lijc'ot jcotoltic. Ta sventa xtoc ti jun jch'unej mantal vinique, yepal laj staic ti mu'yuc smul x'ileic yu'un ti Diose.

²⁰Tal ti oy c'usi tsots sc'oplal albile, yo' ta svinajesbotic ti mu albajuc ti jmultique. Ac'o mi jech mu albajuc ti jmultique, ja'uc le'e, ja' ijelav ti xc'uxul yo'nton Dios ta jtojoltique.

²¹Jech c'u cha'al ayan ti lajel tubel ta scoj ti mulile, ja' jech ayan yutsil slequil yo'nton ti Diose, ti laj jtatic ti lec xij'ile, xchi'uc ti laj jtatic ti cuxlejal sbatel osil ta sventa ti Cajvaltic Jesucristoe.