Read Tzotzil Romanos 9 Bible Online

Romanos 9 - Tzotzil bible

Romanos 9

¹Melel ti c'usi ta xcalboxuc ava'iique. Ti jech c'otem ta co'nton ta xch'unel ti Cristoe, ma'uc ta jut ti c'ope. Yu'un ta xiyac'bun jna' ta co'nton ti Ch'ul Espirítu ti ja' melel ti c'usi xcale:

²Mu x'ech' xjelav, xtuch'et ta xca'i ti co'nton yu'un ti at o'ntone,

³ti jc'anuc ca'i ta jip jba loq'uel ta stojol ti Cristoe yo' lamluc c'otuc ta jtojol ti bac vocol ti staicuc slequilal ti jchi'iltac ti ja' jvinquileltaque.

⁴Ti jchi'iltaque ja'ic snitilultac ti Israele. Bisbilic ta xnich'nab ti Diose. Jun yutsil laj sva'an sba ti Dios ta stojolique. Ac'batic comel ta sventainel ti trateetique. Ac'batic comel ta sbaic ti oy c'usi tsots sc'oplal albil yu'un ti Moisese. Ac'batic comel ta sventainel ti c'u s'elan ta yich'el ta muc' ti ch'ulnae. Albatic comel ti oy c'usi ta x'ac'batique.

⁵Taje, ja'ic snitilultac ti jmolmuc'totic ta vo'nee. Ti ta sts'unubalique, ayan talel ti Cristo ti laj yich' sbec'tale, ti ja' Dios yu'un scotol ti c'usi oye. Ich'biluc ta muc' sbatel osil. Jechuc.

⁶Ma'uc yu'un ch'ay ti c'usi yaloj ti Dios ta stojol ti Israele, yu'un mu scotoluc ti israeletic ta sventainic ti c'usi yaloj ti Diose, yu'un mu scotoluc bats'i snitilul ti Israel ta melele.

⁷Ja' jech xtoc mu scotoluc snitilultac Abraham ti ja' xnich'nabtac ti Dios ta melele. Yu'un xi laj yal ti Diose: “Ta sventa Isaac ta x'ayan talel ti anitilule.”

⁸Taje, ja' ta xac' ta na'el ti ma'uc xnich'nab Dios ta sventa ti voq'uem no'ox talel ta nitilule. Ti buch'u ta xc'ot ta xnich'nab Diose, ja' ti buch'u albil sc'oplal yu'un ti Diose, ja' bats'i nitiluletic unbi.

⁹Yu'un ti Diose xi laj yal ta stojol ti Abrahame: “Jech c'u cha'al ti c'ac'al li'e, ja' jech ora ta xivul ta loq'uel, oy xa ox yuni querem ti Sara une.”

¹⁰Ma'uc no'ox taje, ja' jech ti chib squerem ol ti Rebecae, jun ti stotique, ja' ti jmolmuc'totic Isaaque.

¹¹Yu'un ta xac' ta na'el ti ta xc'ot ta pasel yu'un ti Dios ti c'u s'elan ta st'ujan ta jujun tale, ti ma'uc ac'bil ta venta ti oy c'usi lec ta pasele, ti ja' no'ox ta sventa ti c'u s'elan ta xtavan ta iq'uel yu'un ti Diose. Yu'un c'alal mu'yuc to ox voq'uemic ti uni vachetique, ti mu sna'ic ta spasel ti c'usi chopole, mi ja'uc ti c'usi leque, yu'un xi ono'ox albat ti Rebecae: “Ti banquilale ta smosovinat yu'un ti its'inale.”

¹³Yu'un xi ts'ibabil sc'oplale: “C'ux laj ca'i ti Jacobe. Laj jbaj laj jten ti Esaue.”

¹⁴¿C'usi ta xcaltic un cha'e? ¿Mi mu'yuc stuq'uil yo'nton ti Diose? ¡Bu xata ti jech une!

¹⁵Ti Diose xi laj yalbe ti Moisese: “Ta jc'uxubin ti buch'u ta jc'an ta jc'uxubine. Ta jcolta ti buch'u ta jc'an ta jcoltae.”

¹⁶Ta tael ti c'uxubinel yu'un ti Diose, ma'uc ta sventa ti ac'bil xa yipal ti oy c'usi sc'an pasele, ja' no'ox ta sventa xc'uxul yo'nton ti Diose.

¹⁷Ti ts'ibabil ta ch'ul c'ope, xi albat yu'un Dios ti ajvalil ta Egipto banomile: “Laj jva'anot ta ajvalil yo' ta xcac' ta ilel ti jmuc'ul jtsatsal ta atojole, sventa yo' ta xtanij batel ti jc'oplal ta sjoylej banomile.”

¹⁸Va'i un cha'e, ti Diose ta xc'uxubin ti buch'u ta sc'an ta xc'uxubine. Ta spucujibtasbe yo'nton ti buch'u ta sc'an ta spucujibtasbee.

¹⁹Xu' nan ti xi ta xavalbeicune: “Mi jech taje, ¿c'usi xut ti Dios ta xalbe ti jnaclejetic ta banomil ti oy smule, ti c'alal mu'yuc buch'u xu' ta smacbe ta be ti c'usi oy ta yo'nton ti Diose?”

²⁰Ti vo'ote, ¿buch'uot ya'yel ta xatsacolan ta c'op ti Diose? Ti patbil bine mu xu' ti xi ta xal ta stojol ti jpatbine: “¿C'u cha'al ya'yel ti vi s'elan laj apasune?”

²¹Yu'un ti jpatbine oy ta yoc ta sc'ob ti ach'ele yo' ta spas ti c'u s'elan ta sc'ane. Ti ta juteb no'ox ach'ele, xu' spas jbej bin ti tsots sc'oplal ta xtune, o mi jbej bin ti yamal sc'oplal ta xtune.

²²Ja' no'ox jech ec ti Diose, oy ta yo'nton ta xac' ta q'uelel ti oy smuc'ul stsatsal xchi'uc ti oy sts'iquemal xcuchemale. Yu'un vo'ne xa sts'icojbe talel sbolilic ti buch'utic ja' xtunic o oy sc'oplal ta xich'ic tsitsele, xchi'uc ti oy sc'oplal ch'ayel ta xbatique.

²³Avi tana li' une, ti Diose sc'an ta xac' ta na'el ta jtojoltic ti smuc'ule, ti yutsilal slequilale, yu'un laj xc'uxubinotic, xchi'uc chapal yu'un ti ta jchi'intic ta slequilal yutsilale.

²⁴Ti Dios une laj staotic ta iq'uel jlom ti israelotique, jlom ti jyanlumetique

²⁵jech c'u cha'al ti xi ta xal ti ts'ibabil ta jpoc vun yu'un ti Osease: “Ti buch'u ma'uc to ox jteclumale, laj jbis ta jteclumal. Ti buch'u mu'yuc to ox staojic ti c'uxubinele, laj staic c'uxubinel.”

²⁶Xi albatic xtoque: “Ti vo'oxuque ma'uc jteclumaloxuc, avi tana une, bisbilic xa ta steclumal ti cuxul Diose.”

²⁷Ti Isaíase xi laj yalbe sc'oplalic ti israeletique: “Manchuc mi co'ol s'elan yi'al nab yepal snitilultac ti Israele, jun chib no'ox ta staic ti scolelique.

²⁸Ti c'u s'elan yaloj ti Diose, ta ono'ox xc'ot ta pasel yu'un ta sbejel banomil.”

²⁹Yu'un xi ono'ox laj yal ti Isaías ta vo'nee: “Ti manchucuc laj yictabotic comel jnitilultic ti Dios ti scotol xu' yu'une, ja' jech c'ot ta jtojoltic jech c'u cha'al c'ot ta stojol ti jteclum Sodoma xchi'uc ti Gomorrae.”

³⁰¿C'usi ta xcaltic yu'un taj une? Ta sventa ti ta xc'ot ta o'ntonal ta xch'unele, ti jyanlumetique laj xa staic ti ch'abal smul ta x'ileique, ti c'alal mi jutebuc oy ta yo'ntonic ta sa'el ti slequilalique.

³¹Ja'uc ti israeletic ti yac'ojbe yipal ta spasel ti oy c'usi tsots sc'oplal albil yo' ta staic ti ch'abal smulique, mu'yuc laj staic. Yu'un mu xc'ot ta pasel yu'unic ti c'u s'elan ta xal ti mantale.

³²¿C'u cha'al un? yu'un mu'yuc laj yac'beic yipal ta sa'el ti ch'abal smulic ta xc'otic ta sventa ti oy c'usi ta xc'ot ta o'ntonal ta xch'unele. C'ajomal no'ox ta sventa yabtelic yac'ojbeic yipal ti lec ta x'ileique. Jech o xal laj sbosi yacanic yu'un ti jmac-acanil tone.

³³Yu'un xi albil sc'oplal ta ch'ul c'ope: “Ta jbejan muc' ta ton ta jteclum Jerusalén, jun jbosiej-acanil ton. Ti buch'u ta spat yo'nton ta stojole mu xlo'ilaj ti yo'ntone.”