Read Tzotzil 1 Corintios 1 Bible Online

1 Corintios 1 - Tzotzil bible

1 Corintios 1

¹Vu'un Pablo, ti jech laj sc'an ti Diose, laj yic'un yo' ta xicom ta yajtacbolal ti Jesucristoe. Jmoj xchi'uc ti jchi'il Sóstenese

²ta jts'ibaboxuc talel ta atojolic jlic vun ti vo'oxuc jch'unolajeloxuc yu'un ti Diose, ti nacaloxuc ta jteclum Corintoe. Ta sventa ti Cristo Jesuse, lac'otic ta steclumal, lac'otic ta yu'untac Dios xchi'uc ti yan buch'utic xvocoletic ta sc'anbeic vocol ti Cajvaltic Jesucristo cu'untique, ti ja' Ajvalil yu'unic ec jech c'u cha'al ti vo'otique.

³Ac'o sva'an sba ta yac'beloxuc slequilal slamajemal ti Jtotic Diose xchi'uc ti Cajvaltic Jesucristoe.

⁴Colaval, Dios, xichi no'ox ta aventaic ti laj ataic ti c'uxubinel yu'un Dios ta sventa ti Cristo Jesuse.

⁵Ta sventa ti Jesucristoe, ti Diose laj yac'boxuc ep ta tos xch'ul-c'ulejal, xana'ic yalbel sc'oplal, xava'ibeic smelol.

⁶Ti c'u s'elan sc'oplal ti Cristoe, vinajem ta melel ti c'ot ta avo'ntonique.

⁷Ti jech taj une, laj xa ataic scotol ti c'usi oy sc'oplal ta xac' ti Diose. C'ajomal xa no'ox ta xamalaic ti sc'ac'alil c'usi ora ta xvul ta loq'uel ti Cajvaltic Jesucristoe.

⁸Ti Diose ta xac'boxuc yip avo'ntonic ti c'u sjalil li' oyoxuque yo' mu'yuc c'usi quechel macaloxuc ta xvul staoxuc ti Cajvaltic Jesucristo ti c'alal ta xcha'sut talele.

⁹Ti c'u s'elan yaloj ti Dios ta spase, ta xc'ot ta pasel yu'un, yu'un ja' ta sventa stuc laj xa yic'oxuc talel yo' pas ta jun acuxlejalic xchi'uc ti Xnich'one, ja' ti Cajvaltic Jesucristo cu'untique.

¹⁰Ti jech jchi'il jbatique, ta jc'anboxuc vocol ta sventa ti Cajvaltic Jesucristoe ti jmojuc avo'ntonique, ti mu yanucuc ti snopobil avu'unique. Co'oluc avo'ntonic cuxianic. Jechuc snopbenal avu'unic jech c'u cha'al ti yane.

¹¹Ti jech ta xcalboxuc ava'iic taje, Jchi'iltac, yu'un ti buch'u oyic ta sna ti Cloee laj yalbun ca'i ti it'ix ta xava'i abaique.

¹²Yu'un laj ca'i ti xi ta xavalique: “Ti vu'une sventainojun ti Pabloe.” Ti yan xtoque xi ta xale: “Ti vu'une sventainojun ti Apolose.” Ti jlom xtoque xi ta xale: “Sventainojun ti Pedroe.” Ti jvoc' xtoque xi ta xale: “Ja' sventainojun ti Cristoe.”

¹³Ti jech taje, ¿mi yu'un oy jayvo' xch'acoj sba ti Cristo avalojique? ¿Mi yu'un ja' laj yich' jipanel ta curus ti Pablo ta sventa ti acolelique? ¿Mi yu'un ja' ta sventa Pablo laj avich'ic ti vo'e?

¹⁴Coliyalbun ti Diose ti mu'yuc buch'u junucal avu'unic ti laj cac'be yich' ti vo'e, yu'un ja' no'ox laj cac'be yich'ic vo' ti Crispoe, ti Gayoe.

¹⁵Ti Jech taj une, mu'yuc buch'u xu' ta xal junuc ti laj yich'ic vo' ta jventae.

¹⁶Oy yan ti laj cac'be yich'ic ti vo'e, ja' laj cac'be yich'ic vo' ti c'u yepal oy ta sna ti Estefanase. Mu jna' un mi oy to buch'u yan laj cac'be yich' vo'.

¹⁷Yu'un ma'uc cabtel laj yac'bun Cristo ta yaq'uel ich' vo'. Ja' no'ox cabtel laj yac'bun ta yalel ti lequil ach' c'op yu'une. Ma'uc ma' ti jun xa yutsil ti que jti' ta jpas jba ti c'alal laj jchanubtasoxuque yo' mu xch'ay yip ti cham ta curus ti Cristoe.

¹⁸Ti sc'oplal cham ta curus ti Cristoe, lo'il no'ox ta xa'iic ti buch'utic ch'ayel ta xbatique. Ja'uc ti vo'otic ti jch'unojtic ta xijcole, ja' smuc'ul stsatsal ti Diose.

¹⁹Yu'un xi ta xal ti ts'ibabil ta ch'ul c'ope: “Ta jch'aybe sbijilic ti buch'utic oy sbijilique. Ta jch'aybe snopbenal yu'unic ti buch'utic oy c'usi lec sna'ique.”

²⁰¿Bu oy ti buch'u oy sbijile? ¿Bu oy ti buch'u sna' xchanubtasvane? ¿Bu oy ti buch'u ac'bat sna' ta sjol ta slo'iltael ti naca no'ox sc'oplal sba banomile? Naca jeche' lo'il c'op c'otem yu'un Dios scotol ti bijilil ta sba banomile.

²¹Ta sventa ti Diose, c'ot ta nopel yu'un ti mu cha'bel xtae ta ojtiquinel ta sventa sbijil no'ox stuquic ti jnaclejetic ta banomile. Ta sventa sc'op stuc, laj stic' sba ta scoltael ti buch'utic ta spat yo'ntonic ta stojole ac'o mi lo'il c'op no'ox ta xa'iic ti yane.

²²Ti israeletique c'ajomal no'ox ta sq'uelic ya'iic ti oy c'usi ch'ayal ta xc'ot o'ntonal yu'une. Ti jyanlumetique yac'ojbeic yipal ta sa'el ti sbijilique.

²³Ja'uc ti vu'uncutique ja' ta xcalcutic batel sc'oplal ti Cristo jipil ta curus chame. Ti israeletique q'uexlal sba ta xa'iic ti jech ta x'albatique. Ti jyanlumetique jeche' lo'il c'op no'ox ta xa'iic ti jech ta x'albatique.

²⁴Ja'uc ti buch'u ic'bilic yu'un ti Diose, ac'o mi israeletic, mi jyanlumetic, ta xa'ibeic sc'oplal ti ja' ta sventa smuc'ul stsatsal Dios tal chamuc ti Cristoe.

²⁵Ti bu co'ol s'elan jeche' lo'il c'op yilel laj spas ti Diose, x'ech' to xjelav sbijil ta j'ech'el, ja' mu sta sbijil ti jnaclejetic ti oy ta banomile. Ti bu co'ol s'elan yilel ti mu'yuc smuc'ul stsatsal ti Diose, x'ech' to xjelav ti smuc'ul stsatsale, ja' mu'yuc c'usi xu' yu'un ti jnaclejetic ti oy ta banomile.

²⁶Jchi'iltac, na'ic lec ti c'alal laj staoxuc ta iq'uel ti Diose, jun chiboxuc no'ox oy avuni bijilic ta xalic ti jnaclejetic ta banomile. Jun chiboxuc no'ox ti avich'oj tsots avabtelique, ti jech ich'biloxuc ta muq'ue.

²⁷Yo' jech q'uexlal ta xc'otic ti buch'utic oy sbijilique, t'ujeic yu'un Dios ti buch'utic ch'abal sbijilic ta x'albatic yu'un ti jnaclejetic ta banomile. Yo' jech q'uexlal ta xc'otic ti buch'utic tsots xa'i sbaique, t'ujeic yu'un Dios ti buch'utic ta x'albat ti mu'yuc c'usi xu' yu'unique.

²⁸Ti buch'utic bajbilic li' ta banomile, ja' t'ujbilic yu'un ti Diose yo' ac'o vinajuc ti mu'yuc stu ti buch'u jtunel ta xalique.

²⁹Ti jech taj une, mu'yuc buch'u xu' ta stoy sba ta stojol ti Diose.

³⁰Yu'un ti Diose laj spasoxuc ta jun xchi'uc ti Cristo Jesuse, ti c'ot ta pasel yu'un ti ja' jbijiltic ti Cristoe. Ta sventa ti Cristoe, laj jtatic ti lec xij'ilee, lijc'ot ta yu'un, laj jtatic pojel colel.

³¹Taj une, co'ol jech c'u cha'al ti xi ta xal ti ch'ul c'ope: “Mi oy buch'u ta sta ya'i ti mu'yuc xa buch'u xtaune, ta sventauc Cajvaltic, ac'o spas ti jech mu'yuc xa buch'u jech xtaun ta xa'ie.”