Read Tzotzil 1 Corintios 14 Bible Online

1 Corintios 14 - Tzotzil bible

1 Corintios 14

¹Ja' yu'un un cha'e, ac'beic yipal ti oyuc syail xc'uxul avo'ntonique. C'anic ach'ul-bijilic ta stojol ti Diose, ti ja'uc ta sventa ta xavalic ti c'usi ta xa'ac'bat ana'ic yu'un ti Diose.

²Ti buch'u ta xc'opoj ta yan c'opetique, ja' ta sc'opon ti Diose, yu'un ma'uc ta sc'opon ti jnaclejetic ta banomile, yu'un mu'yuc buch'u junucal xa'ibe ti smelole. Yu'un ti c'usi ta xal ta yan c'ope, mu a'yibaj smelol ta sventa ti oy c'usi ta x'ac'bat sna' yu'un ti Ch'ul Espíritue.

³Ja'uc ti buch'u ta xal ti oy c'usi ta xcaj'ac'bat sna' yu'un ti Diose, jech ta xc'opoj yo' ta sjambe sat ti yane, ta stsatsubtasbe yo'ntonic, ta spatbe yo'ntonic.

⁴Ja'uc ti buch'u ta xc'opoj ta yan c'opetique, ja' no'ox ta xac'be sba yip yo'nton stuc. Ti buch'u ta scaj'al ti oy c'usi ta x'ac'bat sna' yu'un ti Diose, ta xac'be yip yo'nton ti jch'unolajeletique.

⁵Jc'anuc ca'i ti acotolicuc xu'uc avu'unic ta xac'opojic ta yan c'opetique. Ja' xloc' venta ta xca'i ti xu'uc avu'unic ta scaj'alel ti oy c'usi ta xa'ac'bat ana'ic yu'un ti Diose, xloc' venta ma' taje, ja' mu sta sc'oplal ti c'opojel ta yan c'opetique. Ja' no'ox xloc' venta mi oy buch'u ta xalbe smelol ti c'usi ta xich' alel ta yan c'opetic yo' ta stsac yip yo'ntonic ti jch'unolajeletique.

⁶Ti jech jchi'il jbatique, mi naca xa ta yan c'opetic ta xic'opoj c'alal ta xtal jvu'lanoxuque, ¿c'usi bal o, c'usi xtun o avu'unic c'alal mu xava'ibeic ti smelole? Ja'uc le'e, mi ta xcalboxuc ava'iic ta ac'op atuquic ti c'usi li'ac'bat jna' yu'un ti Diose, mi ta xcalboxuc ava'iic ti oy c'usi ta xc'ot ta pasel yu'un ti Diose, mi ta xcalboxuc ava'iic ti c'u s'elan ta sc'an ti Dios ti ta jpastique, ta melel unbi, bal, xloc' venta, xtun avu'unic.

⁷Caltic no'ox ava'iic jech li'e, jech c'u cha'al ti músicaetique, ti amae, ti arpae, ti mi mu'yuc xbejlajan snuc' c'u s'elan ta xich' tijele, ti ta xich' oq'uisanele, mu xvinaj c'usi q'uejojal ta sliques.

⁸Jech xtoc yoq'ues ti soldadoetique, mi mu'yuc smelol ta xich' oq'uisanel ti oq'uese, mu sna'ic c'u s'elan ta xchapan sbaic ta ac'-leto.

⁹Ja' jech ti vo'oxuque, mi ta xac'opojic ta yan c'opetic ti mu stac' a'yiel ti smelole, mu'yuc buch'u xu' ta xa'i ti c'usi ta xavalique, jeche' no'ox ti oy c'usi ta xavalique.

¹⁰Ta melel ava'uquic, oy ep ta tos c'opetic li' ta sba banomile, scotol oy smelol.

¹¹Mi oy buch'u ta xisc'opon ta yan c'op ti mu xca'ie, co'ol s'elan jyanlumun ta stojol ti buch'u ta xisc'oponune. Ja' jech ti stuque, co'ol s'elan jyanlum ta jtojol ec.

¹²Jech o xal un, mi juteb ta avo'ntonic ti jbijiltic ti ta xac'botic ti Ch'ul Espíritu ta jujun tale, ja' c'ano abijilic ta yac'bel yip yo'nton ti jch'unolajeletique yo' jech ta xch'iic.

¹³Ja' yu'un un, ti buch'u ta xc'opoj ta yan c'ope, c'anbeic Dios ti oyuc buch'u ta sva'an sba ta svinajesbel smelol ti c'usi ta xal ta yan c'ope.

¹⁴Mi oy bu ta xic'opoj xiti'in ta yan c'opetique, melel un, ti jch'ulel canimae ta xc'opoj xti'in. ¡C'u stu un! mi ja'uc xca'ibe smelol ti c'usi ta xcale.

¹⁵Va'i un cha'e, ¿c'usi sc'an ta jpas? Sc'an jchi'ucuc jch'ulel c'alal ta xic'opoj xiti'ine yo' jech ta xca'ibe smelol. Sc'an jchi'ucuc jch'ulel c'alal ta xiq'uejine yo' ta xca'ibe smelol.

¹⁶Mi ja' no'ox ta xalequil-c'opon Dios ta yan c'op xchi'uc ti ach'ulel avanimae, ti buch'u ta xa'ie mu xu' ta xchi'inot ta yalbel vocol ti Diose, yu'un mu xa'ibe smelol ti c'usi ta xavale.

¹⁷Ac'o mi jun xa yutsil ta xavalbe vocol ti Dios ta yan c'ope, ¡c'u stu un! mu'yuc c'usi ta xich' tael yu'un.

¹⁸Col no'ox yalbun ti Diose ti xu' cu'un xic'opoj ta yan c'opetique, ja' mu sta ti vo'oxuque.

¹⁹C'alal oyun ta tsobobbail xchi'uc ti jch'unolajeletique, altic ta xcal lajunmil ta bel yan c'op ti mu a'yibaj ti smelole. Ja' lec ta xca'i mi vo'bel no'ox c'op ti stac' a'yibel ti smelole yo' jech ta staic chanubtasel ti yane.

²⁰Ti jech co'ol jchi'il jbatique, mu me snopbenuc olol ti c'usi ta xanopique. Mu'yucuc c'usi chopol oy ta avo'ntonic jech c'u cha'al ti ololetique, vulemuc lec ach'ulelic ta snopel.

²¹Yu'un ti ts'ibabil ta ch'ul c'ope xi ta xale: “Ti muc' ta lum li'e, ta jc'opon ta yan c'opetic ta sventa ti jyanlumetique. Mi ja'uc ta xich'icun ta muc'”, xi ti Cajvaltic Diose.

²²Ti jc'opojel ta yan c'opetique, ta xtun yo' ta svinajesbe stsatsal ti Diose ta sventa ti jch'unolajeletique, ma'uc ta xtun ta sventa ti ma'uc jch'unolajele. Ta scaj'alel ti c'usitic ta xc'ot ta pasel ti liquem talel ta stojol ti Diose, le'e, e'ch' ta xtun yo' ta svinajesbe stsatsal Dios ta stojol ti ma'uc jch'unolajele, ja' mu sta ta xtun ta sventa ti jch'unolajeletique.

²³Ja' yu'un un, mi acotolic ta xac'opojic ta yan c'opetic c'alal tsoboloxuque, mi ta x'och batel jun uni j'a'yiej-c'op ti mu'yuc c'usi c'otem ta yo'nton ta xch'unele, ta snop ti lic achuvajilique.

²⁴Ja'uc le'e, mi acotolic ta xavalic ti oy c'usi la'ac'bat ana'ic yu'un ti Diose, c'alal ta x'och batel ti ma'uc jch'unolajele, ta xa'i ti c'usi ta xavalique. Jech ti stuc une ta xlic ya'i sba ti oy smule.

²⁵Ti c'usi mu xvinaj mucul oy ta yo'ntone, ta svinajesbat yu'un ti c'usi ta xavalique. Ta xlic squejan sba ta yich'el ta muc' ti Diose. Ta xlic yal ti j'ech'el li' xchi'inojoxuc ti Diose.

²⁶Ti co'ol jchi'il jbatique, ta xcal ava'iic ti xi s'elan sc'an xapasic jech c'u cha'al li'e: Lec mi oy jlom avu'unic ta xq'uejinic, ta xchanubtasvan, ta xal ti c'usi ta x'ac'bat sna' yu'un ti Diose, ti oy c'usi ta xal ta yan c'opetique, ta svinajesbel smelol ti c'usi laj yich' alel c'alal tsoboloxuque, ti ja'uc ta sventa yo' ta xch'i ti jch'unolajeletique.

²⁷Mi oy buch'u ta xc'opoj ta yan c'ope, xu' ta sva'an sbaic ta yalel cha'vo', mi oxvo', ti ta jujun tal ta x'ech'ique, xchi'uc xtoc ti oy buch'u ta sjelubtas ta yalel ti c'usi laj yalic ta yan c'ope.

²⁸Mi mu'yuc buch'u xu' ta svinajesbe smelol ti c'usi ta xal ta yan c'ope, ja' lec mu xc'opoj ta yan c'op c'alal tsoboloxuque, ac'o lo'ilajuc xchi'uc ti Dios ta yo'nton stuque.

²⁹Ja' jech xtoc mi oy buch'u ta xalic ti oy c'usi ac'bat sna'ic yu'un ti Diose, ac'o c'opojicuc cha'vo', mi oxvo'. Ja' jech xtoc ti buch'u ta xa'i ti laj yale, ac'o snopilan lec c'usi laj yich' alel.

³⁰Mi oy c'usi ac'bat sna' yu'un Dios ti buch'u tey chotole, jech ti buch'u yacal ta xc'opoje, ac'o to spajtsan sba.

³¹Acotolic xu' xavalic ti c'usi ta xa'ac'bat ana'ic yu'un ti Diose. Ta jujun tal ac'o ech' yalic yo' jech acotolic ta xachanic, ta xatsatsubtasbe aba avo'ntonic.

³²Jech ti buch'u oy c'usi ta x'ac'bat sna' yu'un ti Diose, ac'o mi yo'ntonuc xa ya'i c'opojuc, ac'o smala ora.

³³Ti Diose ja' ta sc'an ti xlaet cuxetuc ti banomile, ti oyuc smelol c'usi ta xich' pasele, ma'uc sc'an ti voch voch c'ope. Jech xapasic jech c'u cha'al ta spasic ti jch'unolajeletic ti buyuc no'ox ta stsob sbaique.

³⁴Ti antsetique ts'ijlicuc c'alal oyic ta tsobobbaile, mu xtuch'ic ta be c'op. Yu'un ja' yabtelic nijil chimil ta stojol snup xchi'ilic jech c'u cha'al ta xal smantal ti Diose.

³⁵Mi oy c'usi ta sc'an ta sjac' ya'iique, ac'o sjac'beic ti snup xchi'ilic c'alal oy xa ta snaique. Mi ta xtuch' ta be c'op jun ants c'alal oy ta tsobobbaile, mu lecuc ta q'uelel.

³⁶Vuleso ta ajolic ma'uc li' lic ta atojolic ti sc'op Diose. Ma'uc no'ox vo'oxuc laj ach'unic ti sc'op Diose.

³⁷Mi oy buch'u xch'unoj ti ja' ac'bil sbijil xu' yu'un ta yalel ti c'usi ta x'ac'bat sna' yu'un ti Diose, mi xch'unoj ti tojobtasbil yu'un ti Ch'ul Espíritu yaloje, ac'o ya'i lec ti ja' smantal Cajvaltic ti jech ta jts'ibaboxuc talel ti jvun li'e.

³⁸Mi mu xac' ta venta ti c'usi laj jts'ibaboxuc talele, mu xavaq'uic ta venta ec.

³⁹Jech o xal un, ti co'ol jchi'il jbatique, ayanuc ta avo'ntonic ta yalel ti c'usi ta xa'ac'bat ana'ic yu'un ti Diose, c'opojanic ta yan c'opetic, mu xamacbe aba avo'ntonic.

⁴⁰Ja'uc le'e, scotol oyuc smelol stuq'uil ti c'usi ta xapasique.