Read Tzotzil 1 Corintios 16 Bible Online

1 Corintios 16 - Tzotzil bible

1 Corintios 16

¹Sc'oplal ti ta xatsob ataq'uinic yo' ta xacoltaic ti yan jch'unolajeletique, jech xapasic jech c'u cha'al laj calbe ya'iic ti jch'unolajeletic ti oyic ta jujun tsobobbail ta Galacia banomile.

²Ti jujunoxuque, ta sliqueb c'ac'al yu'un ti jujun xemunae, ch'aquic loq'uel ti c'u yepal laj apasic canale, ja' ti c'u yepal ta xloc' ta avo'ntonic yo' jech ta xacoltavanic. Jech tsobol xa avu'unic c'alal ta xic'ote.

³C'alal ta xivul ta atojolique, ta jtac batel ta Jerusalén viniquetic ti vo'oxuc ta xat'ujique. Ta xcac'beic batel scartaic xchi'uc scoltaelic ti jch'unolajeletic ti laj atsobique.

⁴Mi ta xca'i ti xu' ta xibat eque, ta xchi'inicun batel.

⁵C'alal ta xital ta atojolique, mu tuc'uc ta xic'ot, yu'un ba'yel ta xibat ta Macedonia banomil. Ts'acal to ta xic'ot ta ateclumalic Corinto.

⁶Xu' van ta xijalij ta atojolic. Xu' van tey ta x'ech' cu'un ti yorail sique. Mi lijalij teye, xu' nan ta xacoltaicun ta sventa stojol ti jbe ti bu xu' ta xibat ta ts'acal toe.

⁷Yu'un mu jc'an ti naca no'ox ta x'ech' jq'ueloxuque. Ta jc'an ta xijalij ta atojolic mi jech ta sc'an ti Cajvaltique.

⁸Li' to ta xicom ta jteclum Efesoe. Ja' to ta xiloc' batel c'alal mi ech' ti q'uin Pentecostese.

⁹Yu'un lec to jamal jbe ta xi'abtej yu'un ti Cajvaltique, ti xloc' venta ta j'ech'ele, ja'uc le'e, yepal no'ox xtoc ti contrainele.

¹⁰Mi ta xc'ot ta atojolic ti Timoteoe, junuc me yo'nton avu'unic, yu'un ta x'abtej yu'un ti Cajvaltique jech c'u cha'al ti vu'une.

¹¹Jech un cha'e, mu me oy buch'u junuc sjip sten avu'unic ti Timoteoe. Ti leque, coltaic yu'un ti stojol sbe yo' jech jun yo'nton ta xtal sq'uelun, yu'un li' ta jmalacutic xchi'uc ti yan jch'unolajeletique.

¹²Ja'uc ti Apolose, ti co'ol jchi'il jbatic xchi'uque, laj xa jc'anbe ep vocol ti ac'o xtal sq'ueloxuque xchi'uc ti yan jchi'iltique. Ti li'e, mu'yuc to c'usi xut xtal. Ja' to ta xtal sq'ueloxuc mi oy bu xocobe.

¹³J'ech'eluc viq'uiluc asatic. Staojuc yav junuc avo'ntonic ch'unic o ti Cajvaltique. Pasic me tsatsal. Mu xatsiq'ues avo'ntonic.

¹⁴Scotol ti c'usi ta xapasique, pasic ta syail xc'uxul avo'ntonic.

¹⁵Ti jech jchi'il jbatique, xana'ic ti Estéfanase xchi'uc ti c'u yepal oy ta snae, ja'ic ti ba'yel c'ot ta yo'ntonic ta xch'unel ti lequil ach' c'op ti oy ta Acayae. Avi tana une, yac'oj sbaic ta tunel yu'un ti jch'unolajeletique.

¹⁶Ti jech jch'unolajeletic taje, ti jech ta x'abtejique, ti jech ta xcoltavanique, ta jc'an ti ac'o ach'unbeic ti c'usi ta xalboxuque.

¹⁷Ximuyubaj ti li' tal ta jtojol ti Estéfanase, ti Fortunatoe, ti Acaicoe, yu'un ti stuquique ja' ta xiscoltaicun ti c'usi mu xu' avu'unic ta xacoltaicun ti jech nom oyoxuque.

¹⁸Yu'un ti stuquique ja' laj stsatsubtasbun co'nton, ti ja' jech laj spasic ta atojolic xtoque. Ti buch'u jech jch'unolajel taje, mu xach'ay ta avo'ntonic.

¹⁹Chabanuc xayalboxuc ti jch'unolajeletic oyic ta jujun tsobobbail li' ta Asia banomile. Ja' jech xtoc ti Aquilae, ti Priscilae, xchi'uc ti c'u yepalic jch'unolajeletic ta stsob sbaic ta snae, chabanucoxuc xayalbeic ta sventa ti Cajvaltique.

²⁰Scotol ti jch'unolajeletic li' oyic ta jtojole, chabanuc xayalboxuc. Ja' jech xtoc, chabanuc xavalbe abaic ta jujun tal. Tsacbo abaic ac'obic.

²¹Vu'unun Pablo, ta jc'ob ta jletra jtuc ti jech ta xcalboxuc chabanucoxuque.

²²Mi oy buch'u mu'yuc c'ux ta xa'i ti Cajvaltic Jesucristoe, ac'o batuc ta ch'ayel. La' no'ox xch'a, Cajval.

²³Ac'o sva'an stec'an sba ta atojolic ti Cajvaltic Jesucristoe.

²⁴Ta sventa ti Cajvaltic Jesucristoe, ta jtac talel ta atojolic ti syail xc'uxul co'ntone. Jechuc.