Read Tzotzil 1 Corintios 3 Bible Online

1 Corintios 3 - Tzotzil bible

1 Corintios 3

¹Jchi'iltac, c'alal li'ay ta atojolique, laj quiloxuc ti mu'yuc ventainbiloxuc yu'un ti Ch'ul Espíritue. Ataoj avavic jech c'u cha'al stalel ti jnaclejetic ta banomile, yu'un co'ol a'elanic jech c'u cha'al olol laj calboxuc ava'iic sc'oplal ti Cristoe.

²C'un ta a'yibel smelol ti c'u s'elan laj jchanubtasoxuque, co'ol jech c'u cha'al jun jchu'nel olol ti uni chu'il no'ox yipanoje, yu'un mu to xu' avu'unic slajesel ti c'usi yijic ta lajesele. Ataoj to avavic avi tana li'e.

³Yu'un oy to yit'ixal avo'ntonic ta stsacolanel abaic ta c'op. Mu jmojuc avo'ntonic. Ja' no'ox ta xapasic jech c'u cha'al ta spasic scotol ti yan jnaclejetic ta banomile.

⁴Yu'un oy jlom xi ta xalique: “Ti vu'une sventainojun ti Pabloe.” Ti yan xtoque xi ta xale: “Ti vu'une sventainojun ti Apolose.” Ti jech taj une, naca stalel no'ox jnaclejetic ta banomil ti c'u s'elan ta xanopique.

⁵Ti xcaltic un cha'e, ¿buch'u ti Pabloe? ¿buch'u ti Apolose? Naca uni jtuneletic no'ox ti ja' ta sventaic ti c'ot ta avo'ntonic ta xch'unel ti Cajvaltique. Ti jujununcutique ja' laj cabtelancutic ti xi s'elan li'ac'bat jbaincutic yu'un ti Diose:

⁶Vu'un laj jts'un ti ts'unobale. Ja' lic smalta ti Apolose. Ja'uc ti ts'unobale, Dios ta sts'ites talel.

⁷Ti xcaltic une, ti buch'u ta sts'une xchi'uc ti buch'u ta smalta ti ts'unobale, ja' no'ox jech yepal xu' yu'unic. Yu'un c'otem ta sventa Dios scotol. Yu'un ja' ta xac' ch'iuc talel ti ts'unobale.

⁸Yu'un co'ol s'elan yabtel c'otemic ti buch'u ta sts'une, ti buch'u ta smaltae. Ja'uc le'e, ta xtojeic yu'un Dios ti c'u s'elan ti yabtelic ta jujun tale.

⁹Co'ol jchi'il jbacutic ta abtel, yajtuneluncutic ti Diose. Ti vo'oxuque c'otemoxuc jech c'u cha'al sbanomil Dios ti yacal ta x'abtej ta atojolique, co'ol a'elanic jech c'u cha'al jbej na ti yacal ta smeltsan ti Diose.

¹⁰Ti vu'une, co'ol j'elan jech c'u cha'al ti j'al-mantal j'albanyil ti bu laj yac'bun Dios ta jliquesbe sliqueb ti nae. Yan o ti buch'u yacal ta sva'an batele, ti jujunique sc'an bijicuc ti c'u s'elan ta xlic slatsic muyel ti spac'obale.

¹¹Ti bu xa liquem ti sliquebe, mu'yuc xa buch'u yan xu' ta stic'be yan sliqueb ti c'alal oy xa ti sliquebe. Ti sliqueb nae, ja' sc'oplal ti Jesucristoe.

¹²Ta sba ti bu liquem xae, oy nan yan xu' ta sva'anic muyel ta oro, ta plata, ta ton ti yan yutsile. Mi mo'oje, xu' ta sva'anic muyel ta naca te', ta c'ajben, mi ta anjobel ti jujubej nae.

¹³Ti yabtelic laj spasic ta jujune, ja' o ta xvinaj c'alal ta xc'ot sc'ac'alil ti chapanele. Ti jech c'ac'al taje, ta xvul ta loq'uel ti c'oq'ue. Jech ti c'oq'ue ta svinajes c'u s'elan yabtel laj spasic ta jujun.

¹⁴Mi ta xcuch yu'un c'oc' ti c'u s'elan laj sva'an ti yabtele, ta xich' stojol.

¹⁵Ja'uc le'e, mi ta xc'ac' ta c'oc' ti yabtel laj sva'ane, ta xch'ay scotol. Ac'o mi ta xcol ti stuque, me'un ta xcom jech c'u cha'al ti buch'u ta xjatav loq'uel ti c'alal ta xc'ac' ti snae.

¹⁶¿Mi mu xana'ic ti vo'oxuc c'otemoxuc ta xch'ulna ti Diose, ti snacanoj sba ti Xch'ul Espíritu ti Dios ta atojolique?

¹⁷Mi oy buch'u ta soquesbe xch'ulna ti Diose, ac'o sna' ya'i ti ta x'ac'bat svocol yu'un ti Diose. Yu'un ti ch'ulna taje, c'otem ta sventa ti Diose. Ti ch'ulna taje, ja' ac'oplalic vo'oxuc.

¹⁸Mu'yucuc buch'u slo'la sba. Mi oy buch'u bij xa'i sba jech c'u cha'al sbijil ti jnaclej ta banomile, ac'o spas sba ti mu'yuc c'usi sna'e yo' jech ta sta sbijil.

¹⁹Yu'un ti bijilil liquem li' ta banomile, naca jeche' lo'il c'op ta xil ti Diose. Yu'un ti ch'ul c'ope xi ta xale: “Ti buch'utic oy sbijilique, ja' syacobilic ta stojol Dios yo' ta x'ochic ta pets' ti stuquique.”

²⁰Oy bu xi ta xal xtoque: “Ti Cajvaltique sna'oj lec ti naca jovil lo'il c'op snopobil yu'unic ti buch'u bij yalojique.”

²¹Jech o xal un, mi junuc stac' stoy sba ta sts'acliel no'ox jun vinic, yu'un scotol c'otem ta aventaic yo' lec oyoxuc:

²²Yu'un ti vu'un Pabloe, ti Apolose, ti Pedroe, ti banomile, ti cuxlejale, ti lajebale, ti c'usi oy xae, ti c'usi ta to xtale, scotol taje, c'otem ta aventaic yo' lec oyoxuc.

²³Ti vo'oxuque c'otemoxuc ta yu'un ti Cristoe. Ti Cristoe ja' yu'un ti Diose.