Read Tzotzil 1 Corintios 4 Bible Online

1 Corintios 4 - Tzotzil bible

1 Corintios 4

¹Bisuncutic no'ox ta yajcoltaobba Cristo, ti oy ta jventacutic ta yalel ti c'usi mucul to ox snopoj ti Diose.

²Ti buch'u ac'bil yabtel yu'un ti Diose, ac'o yac' ta q'uelel ti stuc'ulanuc sba xchi'uc ti yabtele.

³Ti vu'une mu tsotsuc sc'oplal ta xca'i ta co'nton ti c'u s'elan ti jc'oplal avu'unic ta sventa ti cabtele, mi ja'uc ti c'u s'elan xchapan ti jchapanvanej li' ta banomile, mi ja'uc xcalbe xa jba ti c'u j'elane.

⁴Ac'o mi ta xac'bun jna' ti jol co'nton ti mu'yuc jmul ta xca'i ti c'u s'elan ta xbat ti cabtele, mi ja'uc xu' ta xcal ch'abal ti jmule. Ti buch'u ta xischapanune, ja' stuc ti Cajvaltique.

⁵Ja' yu'un un cha'e, ma'uc ti xacajchapanbe xa sc'oplal ti yane. Mala avilic ora ti ja' ta xchapan stuc ti Cajvaltic ti c'alal ta xvul ta loq'uele. Ta svinajes ta saquil osil ti c'usi mucule. Ti Cajvaltique ta xac' ta ojtiquinel c'u s'elan oy ta yut yo'ntonic ti jujune. Ta xac' ta q'uelel c'u s'elan ta x'ileic yu'un Dios ta jujun tal.

⁶Jchi'iltac, ti va'i s'elan ta xcalboxuc ava'iic jc'oplalcutic xchi'uc ti Apolose, ja' alequilalic yo' jech ti vo'oxuque ta xaco'oltas abaic xchi'uc ti c'u s'elan ts'ibabile, yo' mu xatoy abaic xchi'uc ti june, ti ta xabaj xajipic ti yane.

⁷Avi une, ¿mi yu'un ta xanop xana' ti x'ech' to lec oyote, ti ja' mu sta ti yane? Ti bijilile, ¿buch'u laj yac'bot? Mi ja' laj yac'bot ti Diose, ¿c'u cha'al ta xatoy abaic xchi'uc ti c'usi la'ac'bate, ti co'ol s'elan laj avac'be aba atuque?

⁸Ti xaval yilele, jc'ulej xa xava'i abaic, ataojic xa scotol ti c'usi ta xac'anique, ajvalil xa xava'i abaic. Mu xa xac'an xavac'uncutic ta venta. Ti ajvalilucoxuc la ta melele, co'ol ta jpastic mantal ti jechuque.

⁹Oy bu xca'i ti vu'uncutic jcholc'opuncutique ti slajeb xa bu laj yac'bun cavilcutic ti Diose, ti co'ol s'elan jc'oplalcutic jech c'u cha'al ti buch'u chapal sc'oplal ta xich'ic milele. J'ac'-elovuncutic ta sba ta sat ti ánjeletique, ta sba ta sat ti buch'uuc no'oxe, xchi'uc ta sba ta sat ti jnaclejetic ta banomile.

¹⁰Ta sventa ti Cristoe, sbiseluncutic ta jech mechuc ma' ti vu'uncutique, ja'uc ti vo'oxuque, col la'albatic yu'un Cristo ti ta xa'albatic ti oy abijilique. Ti vu'uncutique, ch'abal xa yipal ta xca'icutic c'alal oy yipal avu'unic ti vo'oxuque. Bajbil tenbiluncutic ti vu'uncutique, ja'uc ti vo'oxuque ich'biloxuc ta muc' yu'un ti yane.

¹¹Jech to staoj yav avi tana li'e, oy jvocolcutic ta vi'nal, ta taqui ti'il, Ch'abal lec jc'u'cutic. Ilbajinbiluncutic yu'un ti jnaclejetic ta banomile. Ch'abal jnacutic.

¹²Xlub xcham xa coc jc'obcutic ta abtel yo' ta jmalq'uin jbacutic. Mi ta xibisecutic ta cotol chavale, ta lequilal ta jtac'cutic sutel. Ilbajinbiluncutic, sc'a'epal satuncutic, ts'iquem cuchem cu'uncutic un.

¹³Sbiseluncutic ta cotol chaval, ta lequilal ta utsilal ta jtac'cutic sutel. Jech staoj to yav ti c'ac'al avi tana li'e, c'a'ep ta xi'ilecutic ta banomil, mu'yuc jtucutic.

¹⁴Ma'uc ta jc'an ta xcac'oxuc ta q'uexlal ti va'i s'elan laj jts'ibaboxuc talel ti jlic vun li'e. Ja' no'ox oy ta co'nton ta jbijubtasoxuc jech c'u cha'al jnich'naboxuc, yu'un c'uxoxuc ta co'nton.

¹⁵Ta sventa ti jech jch'unolajeloxuque, manchuc mi oy ta atojolic lajunmil (10,000) jchanubtasvanejetic ta xalboxuc sc'oplal ti Cristoe, ti totil avu'unique, mu epuc. Ta sventa ti laj calboxuc ava'iic ti lequil ach' c'ope, lic'ot jech c'u cha'al totil avu'unic ti jech c'ot ta avo'ntonic ta xch'unel ti Jcoltavanej Jesuse.

¹⁶Jech un cha'e, ta jc'anboxuc vocol ta atojolic, pasic jech c'u cha'al ta jpase.

¹⁷Ti jech taj une, ta jtacboxuc talel ta atojolic ti Timoteoe, ti ja' jun jc'uxubinbil nich'on ta sventa ti jun yo'nton ta stojol ti Cajvaltique. Ta xtal svulesboxuc ta avo'ntonic ti c'u s'elan cuxulun ti c'otem ta co'nton ta xch'unel ti Cristo Jesuse, ti ja' jech ta jchanubtas ti jch'unolajeletic ta jujun tsobobbail ti buyuc no'ox ta xi'ech'e.

¹⁸Oy jlom avu'unic ti vo'oxuque stoyoj xa sba ta xc'opojic ti ta snopic ti mu'yuc ta xtal jvu'lanoxuque.

¹⁹Mi jech oy ta yo'nton ti Cajvaltique, ta xtal jq'ueloxuc no'ox. Va'i unbi, ta xquil bu c'alal c'usi stac' spasic ti jtoyobbaetique, ma'uc no'ox ti yeic ti c'usi ta xloc' ta alel yu'unique.

²⁰Ti ventainel yu'un ti Diose, oy smuc'ul stsatsal, ma'uc naca sba eil.

²¹¿C'usi ti lec ta xava'iique? ¿Mi ja' ta xac'anic ti chapalun ta stsitseloxuque? ¿Mi ja' ta xac'anic ti ta syail xc'uxul co'nton ta xtal jq'ueloxuque?