Read Tzotzil 1 Corintios 6 Bible Online

1 Corintios 6 - Tzotzil bible

1 Corintios 6

¹C'alal oy ac'opic xchi'uc ti buch'u jch'unolajele, ¿c'u cha'al ta xba ac'anic parte ta stojol ti jchapanvanejetic ti ma'uc jchi'iltic ta xch'unel ti Cristoe? ¿C'u cha'al mu ja'uc xavac' abaic ta chapanel ta stojol ti buch'utic c'otemic ta steclumal ti Diose?

²¿Mi mu xana'ic ya'yel ti vo'oxuc steclumaloxuc ti Diose, ti ta sta yorail ta xachapanic ti jnaclejetic ta banomile? Ti jech ta xachapanic ti jnaclejetic ta banomile, ¿c'u no'ox la xi mu xchapaj avu'unic ti c'usiuc no'ox uni bic'tal c'opetique?

³¿Mi mu xana'ic xtoc ti ta sta yorail ta jchapantic ti ánjeletique? Jech ti uni c'opetic yu'un ti cuxlejal li' ta banomile, x'ech' to xu' avu'unic ta xchapanel ma' ti jechuc une.

⁴Mi oy ac'opic ti sc'an chapanele, ¿c'u cha'al ta xba avac' abaic ta chapanel ta stojol ti buch'utic ma'uc c'otem ta sventa ta xchapanel ti jch'unolajeletique?

⁵Ti jech ta xacalboxuc taje, yo' jech xaq'uexavic. ¿Mi yu'un mu'yuc buch'u junucal avu'unic ti oy sbijil ta xchapanel sc'op ti achi'ilique?

⁶Yu'un c'alal mu xlaj sc'opic ti co'ol xchi'il sbaique, yu'un tsots sc'oplal ta xa'i ta xba yac' sbaic ta chapanel ta stojol ti jchapanvanejetic ti yan o c'usi xch'unoje.

⁷Ti jech ta xatsacolan abaic ta c'ope, ma'uc xa jech smelol atamojic batel. ¿Mi mu ja'uc lec xana' ti ts'icuc cuchuc avu'unic ti ilbajinele? ¿Mi mu ja'uc lec xana' ti aq'uelojuc no'ox yelc'anicuc batel ti c'usi oy avu'unique?

⁸Ja'uc le'e, mu'yuc stuq'uil ti c'usi ta xapasbe abaique, yu'un ta xavelc'anbe abaic ti c'usi oy avu'unic ti co'ol achi'il abaique.

⁹¿Mi mu xana'ic ya'yel ti buch'utic mu'yuc xch'ulel xa'i sbaique, mu x'ochic batel ti bu ta xventainvan ti Diose? Bijanic, mu xalajic ta lo'lael. Yu'un ti buch'u ta xmulivaje, ti jlo'laej jolile, ti ta xrioxinel ti c'usi meltsanbil ta c'abale, ti buch'u ta xmulivajic ti co'ol xchi'il sbaic ta vinicale xchi'uc ti co'ol xchi'il sbaic ta antsile,

¹⁰ti j'eleq'ue, ti ta yu'ninel ti c'usi ma'uc yu'une, ti jyacubele, ti jlo'iltavaneje, scotolic taje mu x'ochic batel ti bu oy ti ventainel yu'un ti Diose.

¹¹Na'ic ti jech to ox a'elanic jlom ti vo'oxuque. Avi tana une, pocbil tusbiloxuc xa, yu'un lac'otic ta yajtunel ti Diose. Ch'abal xa amulic, lec xa'ileic ta sventa ti Cajvaltic Jesuse, xchi'uc ta sventa ti Xch'ul Espíritu ti Dios cu'untique.

¹²Oy buch'u xi ta xalique: “Colemun ta spasel ti c'usiuc no'ox lec ta xca'ie.” Jech melel, ja' no'ox mu scotoluc ti lec ta xc'ot ta loq'uele. Manchuc mi colemun ta spasel ti c'usi lec ta xca'ie, ja'uc le'e, mu jq'uelojuc jba ti tsalbil ta xic'ot yu'une.

¹³Oy bu ti xi ta xale: “Ti ve'lile ja' sventa ti ch'utile. Ti ch'utile ja' sventa yavil ti ve'lile.” Jech ono'ox ta melel, ti xchibal taje ta xc'ot ta tsutsel yu'un ti Diose. Ja'uc ti jbec'taltique c'otem ta sventa Dios, ma'uc sventa mulivajel. Jech ti Diose sventainoj ti jbec'taltique.

¹⁴Jech c'u cha'al cha'cuxesat yu'un Dios ti Cajvaltique, ja' jech ta xischa'cuxesotic ti Dios ta sventa ti smuc'ul stsatsale.

¹⁵¿Mi mu xana'ic ya'yel ti jbec'taltic jujunotique ja' sbec'talinoj ti Cristoe? ¿Mi yu'un xu' ta xcac'be xchi'in jmulivajel ants ti jbec'tal ti c'alal ja' yu'un ti Cristoe? ¡Bu la xata ti staq'ue!

¹⁶¿Mi yu'un mu xana'ic ya'yel xtoc ti jun vinic c'alal ta xchi'in ti jmulivajel antse, ti xchibalique, jun ta xc'ot ti sbec'talique? Yu'un ti ch'ul c'ope xi ta xale: “Ti xchibalique ta xc'otic ta jun sbec'talic.”

¹⁷C'alal mi oy buch'u c'otic ta jun xchi'uc ti Cajvaltique, ti xchibalique jun xa ti snopobil c'ot yu'unique.

¹⁸Lajuc sc'oplal avu'unic ta j'ech'el ti mulivajele. Yu'un ti mulivajele ta soques ta j'ech'el ti jbec'taltique. C'usiuc no'ox ti yan mulile, ja' mu sta.

¹⁹¿Mi mu xana'ic ya'yel ti abec'talique ja' c'otem ta xch'ulna ti Ch'ul Espíritu ti laj yac'boxuc ti Diose? Jech ti Ch'ul Espíritue nacal ta atojolic, ma'uc avu'un aba atuquic.

²⁰Yu'un ti Diose toyol atojolic laj smanoxuc. Jech o xal un, tsots sc'oplal, aq'uic ta ich'el ta muc' Dios yu'un ti abec'talique xchi'uc ti ach'ulelique. Ti xchibal taje ja' yu'un ti Diose.