Read Tzotzil 2 Corintios 11 Bible Online

2 Corintios 11 - Tzotzil bible

2 Corintios 11

¹¡Ta lec no'ox, ts'icuc cuchuc avu'unic ti cuni chuvajil ta j'ech'ele! Jech melel, ts'icbeicun.

²Ti j'ech'el mu lecuc ta xca'i ti c'u s'elan oyoxuque, liquem talel ta stojol ti Diose. Yu'un cac'oj xa que ta stojol Cristo ti oyuc alequilic ta xc'ot jva'anoxuc ta stojol jech c'u cha'al jun tojol tseb ti jac'bil xa ti oy sc'oplal x'iq'ue yu'un ti vinique.

³Ta jvul co'nton avu'unic mi ta xavac' abaic ta lo'lael jech c'u cha'al lo'lae ti Eva yu'un ti manyoso jlo'lavanej jti'oval chone. Ti vo'oxuc xtoque yic'al nan x'ech' to ta xalajic ta lo'lael mi ta xyanij ti snopobil avu'unic c'alal mi ta xavicta abaic ti jech sjunul avo'ntonic ta stojol ti Cajvaltique.

⁴Yu'un ti vo'oxuque lec ta xava'iic ti oy buch'u ta xc'ot ta atojolic ta yalbel sc'oplal ti Jesuse ti mu xco'olaj xchi'uc jech c'u cha'al laj calcutic ava'iique. Sjunul avo'ntonic ta xavich'ic ta muc' stalel no'ox jun vinic ti mu xco'olaj xchi'uc jech c'u cha'al ti Ch'ul Espíritu ti laj avich'ique. Ta xavich'ic ta muc' yan c'op ti mu xco'olaj xchi'uc jech c'u cha'al ti colebal lequil ach' c'op ti laj calcutic ava'iique.

⁵Laj to ta alel sc'oplal ma' ti ta xispec'tsanbun jc'oplal ti banquilal jcholc'opetic ti ts'acal to vul ta atojolic ti nabaloxuc xa ta stojole.

⁶Ac'o mi mu xitojob xavilic ti c'u s'elan ta xic'opoje, ja'uc le'e, mu jechuc ma' ti c'usi sc'an ojtiquinele, ti cac'ojcutic xa ono'ox avilic ta scotol ti c'u s'elan ta jpascutique.

⁷¿Mi yu'un mu'yuc stuq'uil laj jpas ti mu'yuc laj jc'anboxuc stojol ti c'alal laj calboxuc ti colebal lequil ach' c'op, ti co'ol s'elan olol laj jpas jba ta atojolic yo' jech cajal ac'oplalic ta xac'otic ti vo'oxuque?

⁸Ti jech laj cac' jba ta tunel ta atojolique, lec laj ca'i ta xch'amel taq'uin ti laj yac'beicun ta jtojol ti liquem talel ta stojol ti yan jch'unolajeletique.

⁹C'alal mu'yuc c'usi x'ayan cu'un c'alal oyun ta atojolique, mu'yuc laj cac' abainic ti c'usi ta xtun cu'une. Ja' laj sbainic ti jch'unolajeletic ti liquem talel ta Macedonia c'alal vulic ta jtojole. Laj jtuc'ulan jba ti mu xcac' abainic ti c'usi xtun cu'une, ti ja' jech ta jpasolan o batel ta atojolique.

¹⁰J'ech'el jtsinanoj jba ti xcojtiquin bu ja' melel yu'un ti Cristoe, ti mu'yuc buch'u xismacbun co'nton ti ta matanal no'ox ta xcal ti lequil ach' c'op ta stojol ti c'u yepal nacal ta alumalic li' ta Acayae.

¹¹¿C'u cha'al jech ta xcalboxuc un? ¿Mi yu'un mu'yuc c'uxoxuc ta co'nton? Sna' lec ti Diose ti ep c'uxoxuc ta co'ntone.

¹²Mi ja'uc xquicta jba ti c'usi yacalun ta spasele yo' jech ta jmacbe ye sti'ic ti jcholc'opetic teye, ti ta xalboxuc ti co'ol ta xi'abtejcutic xchi'uque.

¹³Yu'un naca jlo'lavanej jcholc'opetic ti sbisoj xa sbaic yilel ta yajtuneltac ti Cristoe.

¹⁴Taje, mu xa yanuc ti stalelique, yu'un ti pucuj eque ta sbis sba ta jun ánjel ti xojobin no'ox ti yutsile.

¹⁵Jech o xal ti yajtuneltaque, razon ti sva'an xa sbaic yilel ta spasel ti c'usi leque. ¡Ta xc'ot ta tsutsel ti yabtelique jech c'u cha'al ti stuquic ta xc'otic ta tsutsel ti loc' ta sa'el yu'unique!

¹⁶Ta xcalboxuc xtoc, mu xanopic ti chuvajibemune. Mi jech ta xanopic ti chuvajibemune, ac'o c'opojcun jech c'u cha'al jun chuvaj yo' jech xu' ta jtoy jba ta atojolic ec.

¹⁷Ti jech xitoyet xa xca'i jba ta xic'opoje, chuvajibemun xchi'uc ta j'ech'el unbi, ma'uc jech loq'uem ayanem ta yo'nton ti Cajvaltique.

¹⁸Ti yepal no'ox ti oy buch'u stoyoj sbaic xchi'uquic ti c'usi ta spas ta stuquique, xu' jtoy jba ta atojolic ec un.

¹⁹Ti vo'oxuque toj ven bij xava'i abaic yilel ti c'alal lec ta xava'iic slo'il ti chuvaje.

²⁰Yu'un ti vo'oxuque ts'iquem cuchem avu'unic stalel ti buch'utic ta smosovinoxuque, ti yac'ojboxuc avocolic ta xch'olbel ta ye ta sti'e, ti pasbiloxuc ta mantal yu'une, ti bajbil tenbiloxuc yu'une, ti xtoyet ye sti' ta atojolique.

²¹Mi jech ta sc'an pasbel ti jcholc'opetique, ta xiq'uexav avu'unic ti mu'yuc yipal cu'uncutic ti mu jechuc laj jpascutic ta atojolique. Ja'uc le' une, xu' ta jco'oltas jba jech c'u cha'al ti buch'utic stoyoj sbaique, ac'o mi co'ol s'elan chuvaj ti c'usi ta xcale.

²²¿Mi hebreo ti stuquique? hebreoun ec. ¿Mi israeletic ti stuquique? ja' jechun ec. ¿Mi snitilultac Abraham ti stuquique? ja' jechun ec.

²³¿Mi yajtuneltac Cristo ti stuquique? x'ech' to yajtunelun ti vu'une, ja' mu sta ti stuquique, ac'o mi co'ol s'elan chuvaj ti va'i s'elan ta xcale. Yu'un vu'un x'ech' to ta xi'abtej, ja' mu sta ti stuquique. Ti vu'une quich'oj ep tsitsel, ja' mu sta ti stuquique. Ep ta coj litic'at ta chuquel. Ep ta coj jutuc xa mu quich' milel.

²⁴Vo'coj laj stsitsun ta nucul ti jchi'iltaque, yu'un laj yac'bun quich' balunlajuneb xcha'vinic (39) ta moj nucul ti jujucoje.

²⁵Oxten laj smajicun ta te'. Jten liyac'beicun ton xtoc. Oxten limut'ij ta barco ti yacal ta xixanav batele. Jten xicajet licom ta ba nab jun c'ac'al xchi'uc jun ac'ubal ti jutuc xa mu lijic'ave.

²⁶Yepal no'ox bu xanavemun. Quiloj xi'el yu'un xtuch'el ti uc'umetique, xi'el yu'un ti j'eleq'uetique, xi'el yu'un ti jchi'iltaque, xi'el yu'un ti jyanlumetique. Quiloj xi'el ta muc' ta lum, xchi'uc buyuc no'ox ta beetic, ta muc' ta nab. Quiloj xi'el xtoc yu'un ti buch'u sbisoj sbaic ta jch'unolajele.

²⁷Yepal no'ox jvocol quiloj yu'un ti cabtele. Yepal no'ox mu'yuc vayel cu'un. Yepal laj ca'i vi'nal xchi'uc taqui ti'il. Oy bu mu'yuc ve'el yu'un ti cabtele. Quich'oj vocol ta sts'iquel sic, ta scoj ti ch'abal jc'u'e.

²⁸Ma'uc no'ox jech yepal taje, yu'un jujun c'ac'al jcuchoj vocol yu'un vul co'nton ta scoj ti jch'unolajeletique.

²⁹Mi oy jch'unolajeletic mu'yuc yip ti yo'ntonique, co'ol to s'elan ja' xa jtuc mu'yuc yip ti co'ntone. Mi oy bu ta soquesbat yo'nton ti jch'unolajeletique, ta xcat co'nton yu'un q'uexlal, yu'un chopol ta xca'i ta j'ech'el.

³⁰Ja' xa la me jtoyoj jba caloj xchi'uc ma' ti mu'yuc c'usi xu' cu'une, ja' laj to sc'oplal ma' ti mu'yuc buch'u xtaun ta xca'ie.

³¹Melel ti jech xcale, yu'un yiloj ti Diose, Stot ti Cajvaltic Jesucristo cu'untic ti ich'bil ta muc' sc'an sbatel osile.

³²C'alal oyun ta jteclum Damascoe, ti gobernador ti yac'oj sba ta tunel yu'un ti ajvalil Aretase, laj sva'an jpa'ivanej ta jujun ochebal sti' ti jteclume yo' jech ta xistsaquic batel ta chuquel.

³³Ja'uc le'e, oy buch'u laj xchechanicun yalel ta jun moch ta ti' ventana ta spat smocal ti jteclume, jech licol batel un.