Read Tzotzil Gálatas 3 Bible Online

Gálatas 3 - Tzotzil bible

Gálatas 3

¹Toj alticoxuc ta j'ech'el, galataetic, ¿buch'u laj stic'boxuc xchamel avo'ntonic ti jech mu xa xach'unic ti lequil ach' c'op ti ja' melele? Yu'un ti c'alal laj calboxuc ava'iic ti sc'op Diose, co'ol to s'elan laj ataic ta ilel ta asatic ti jipil ta curus cham ti Cristoe.

²Ja' no'ox ta jc'an, tac'beicun talel ca'itic ti xi ta jac'boxuque: C'alal laj avich'ic ti Ch'ul Espíritu yu'un ti Diose, ¿mi ja' ta sventa ti laj apas ti oy c'usi tsots sc'oplal albil yu'un ti Moisése, mi ja' ta sventa laj ach'unic ti lequil ach' c'op laj ava'iique?

³¿C'u cha'al toj pim xava'i abaic? ¿Mi yu'un ta xac'an ta xats'acubtas ta avip atuquic ti c'usi laj xa sliques ti Ch'ul Espíritue?

⁴¿Mi mu'yuc c'usi tun o avu'unic ti avocolic laj avich'ique? ¡Ta xcal ti tun van avu'unique!

⁵Ti Dios ti ta xac'boxuc ti Xch'ul Espíritue, ti oy c'usitic ch'ayal ta xc'ot o'ntonal yu'un ti c'usi ta xac' iluc ta atojolique, ¿c'u cha'al jech ta spas? Ma'uc ta sventa ti laj ach'unic ta spasel ti oy c'usi tsots sc'oplal albile, yu'un ja' no'ox ta sventa ti c'ot ta ch'unel avu'unic ti lequil ach' c'op laj ava'iique.

⁶Ti Abrahame laj xch'un ti xc'ot xc'opoj ti Diose. Ti jech teq'uel c'ot ta yo'nton ta xch'unele, laj sta ti lec x'ile yu'un ti Diose.

⁷Ja' yu'un un, sc'an xana'ic ti buch'utic bats'i snitilultac ti Abrahame, ja'ic ti buch'utic ta xc'ot ta yo'ntonic ta xch'unel ti Diose.

⁸Ti ch'ul c'ope, vo'ne xa ono'ox laj svinajesbe sc'oplal ti jyanlumetic ta staic ti lec ta x'ileic yu'un Dios ta sventa ti ta xc'ot ta yo'ntonic ta xch'unele. Jech o xal ti Diose laj svinajes ti lequil ach' c'op yu'un ta stojol ti Abrahame: “Ta aventa vo'ot, ta staic slequilal yutsilalic ti jnaclejetic ti oyic ta sjoylej banomile”, xi ti Dios ta stojol ti Abrahame.

⁹Jech o xal un, buch'uuc no'ox ti ta xc'ot ta yo'ntonic ta xch'unele, co'ol ta staic slequilalic jech c'u cha'al laj sta ti Abrahame, yu'un c'ot ta yo'nton ta xch'unel.

¹⁰Ti buch'utic ta spat yo'ntonic yalojic ta xcolic ta sventa ta xch'unic ta spasel ti oy c'usi tsots sc'oplal albil yu'un ti Moisése, chapal xa sc'oplal ta stoj ti smulique, yu'un xi ta xal ti ch'ul c'ope: “Ti buch'utic mu xc'ot ta pasel yu'unic scotol ti c'usi ts'ibabil ta jpoc svunal yu'un ti mantale, chapal xa sc'oplal ta xbat stoj ti smulique.”

¹¹Ja' yu'un un, ma'uc ma' ti mu'yuc xcuchoj smul ti buch'utic ja' no'ox xch'unoj ta spasel ti c'usi ta xal ti oy c'usi tsots sc'oplal albile, yu'un xi ta xal ti ch'ul c'ope: “Ti buch'u ch'abal smul ta xquile, ja' no'ox ti buch'u c'otem ta yo'nton ta xch'unele, jech ta xcuxi o.”

¹²Ja'uc ti oy c'usi tsots sc'oplal albil yu'un ti Moisese, ma'uc ta xalbe sc'oplal ti oyuc c'usi c'otuc ta o'ntonal ta xch'unele, yu'un xi ta xal ti mantale: “Ti buch'u ta xch'un ta spasel scotol ti c'usi ta xal ti oy c'usi tsots sc'oplal albile, ja' to jech ta xcuxi.”

¹³Ti Cristoe tal scoltaotic ta scoj ti mu xc'ot ta ch'unel cu'untic ti oy c'usi tsots sc'oplal albile. Ti stuque co'ol s'elan jbaj-mantal c'ot, yu'un xi ta xal ti ch'ul c'ope: “Ti buch'u jipil ta curus ta xlaje, ja' jun jbaj-mantal.”

¹⁴Taje, ja' ic'ot ta pasel ti jech ono'ox yaloj ti Dios ta stojol ti Abrahame, ti ta staic slequilal yutsilal Dios ti jyanlumetic ta sventa ti Cristo Jesuse, yo' jech jcotoltic ta xquich'tic ti Ch'ul Espíritu ti yaloj ono'ox ti Dios ta xac' ta sventa ti ta xc'ot ta o'ntonal ta xch'unel ti Jesucristoe.

¹⁵Ti jech co'ol jchi'il jbatique, ta xcalboxuc ava'iic jech c'u cha'al ti xi s'elan ta spasic ti jnaclejetique: C'alal yac'oj xa spirma ti jun vinic ta sventa ti trate laj spasique, mu'yuc xa buch'u xu' ta stub, mi ja'uc oy buch'u xu' ta to stic'be yan xchi'il ti c'usi laj spasique.

¹⁶Ja' jech laj yal ec ti Dios ta stojol ti Abraham ta sventa sc'oplal ti jun snitilule. Ti ts'ibabil ta ch'ul c'ope, ma'uc ta xal ti ta sventa snitilultac ti Abrahame, ti ta staic slequilal yutsilal ti jnaclejetique, ti co'ol s'elan jun yepal ya'luque. Mo'oj, yu'un laj yal ti Diose ti ta staic slequilal yutsilal ti jnaclejetic ta sventa ti jun snitilul ti Abrahame, ja' sc'oplal Cristo ma' taje.

¹⁷Ti c'usi ta jc'an xcale, xi s'elane: Ti Diose stuc laj sva'an sba ta rextico ti laj spasic jun trate xchi'uc ti Abrahame. Ti ta chanibal ciento xchi'uc lajuneb xcha'vinic (430) jabil c'alal ja' o vul ta loq'uel ti oy c'usi tsots sc'oplal albil yu'un ti Moisese, mu ja'uc tal ta xch'aybe sc'oplal ti c'usi ba'yel yaloj ti Diose.

¹⁸Ti yu'unuc ta sventa ti oy c'usi tsots sc'oplal albil yu'un ti Moisés ta jtatic ti oy c'usi yaloj ti Diose, mu xa yu'unuc q'uelanbiluc ti oy c'usi yaloj ti Dios ta xaq'ue. Ja'uc le'e, ti c'usi yaloj ti Dios ta xac'be ti Abrahame, ja' jun matanal.

¹⁹Va'i un cha'e, ¿c'usi xtun o ti oy c'usi tsots sc'oplal albil yu'un ti Moisese? Vul ta loq'uel yo' ta xac' jna'tic ti oy jmultique. Ja' itun o c'alal to ic'ot sc'ac'alil ti vul ta loq'uel ti jun snitilul ti Abraham ti albil ono'ox sc'oplal yu'un ti Diose. Ti oy c'usi tsots sc'oplal albile, jelav talel ta sc'ob ti ánjeletique, laj yich' ti Moisese. Ti Moisese laj yac'be sna' ti israeletique.

²⁰Ja'uc ti c'usi yaloj ti Dios ti ta spase, ma'uc xa tsots sc'oplal oy buch'u ta xet'es talel, yu'un ja' ta spas stuc ti Diose.

²¹Ati xcaltic un cha'e, ti oy c'usi tsots sc'oplal albil yu'un ti Moisese, ¿mi ta scontrain sbaic xchi'uc ti oy c'usi yaloj ti Dios ta xaq'ue? ¡Bu xata ti jeche! Ti tauc xac' cuxlejal ti oy c'usi tsots sc'oplal albile, va'i unbi, ti lequilal utsilale, ta xich' talel ta sventa ta xich' pasel ti c'usi ta xal ti oy c'usi tsots sc'oplal albile.

²²Ja'uc ti ch'ul c'ope, ta xal ti jcotoltic chuculotic yu'un ti mulile. Ja' yu'un un, ja' no'ox ti buch'utic ta xc'ot ta yo'ntonic ta xch'unel ti Jesucristoe, xu' ta xich'ic ti oy c'usi yaloj ti Dios ta xaq'ue.

²³C'alal mu'yuc to ox ta xvul ta loq'uel ti Buch'u oy sc'oplal ta xc'ot ta o'ntonal ta xch'unele, tey chuculuncutic yu'un ti oy c'usi tsots sc'oplal albile, yu'un jmalaojcutic ti vuluc ta loq'uel ti Buch'u oy sc'oplal ta xc'ot ta o'ntonal ta xch'unele.

²⁴Ti oy c'usi tsots sc'oplal albile, laj sbainuncutic ta yaq'uel quilcutic ti c'usi sc'an pasele, jech c'u cha'al junuc olol ti tojobtasbil batel yu'un ti mosovile. Lijcom ta stojol, ja' to ti c'uxi tal ti Cristo yo' ta xc'ot ta o'ntonal ta xch'unele, yo' ta jtacutic ti ch'abal jmultic ta stojol ti Diose.

²⁵Tana li' une, vul xa ta loq'uel ti Buch'u oy sc'oplal c'otuc ta o'ntonal ta xch'unele. Ma'uc xa tsots sc'oplal ta xisbainuncutic ta yaq'uel jna'cutic ti c'usi sc'an pasbel ti oy c'usi tsots sc'oplal albile.

²⁶Ta sventa ti c'otem ta o'ntonal ta xch'unel ti Jesucristoe, yalab xnich'naboxuc ti Dios ta sventa ti jech oyoxuc xa ta stojol ti Jesucristoe.

²⁷Acotolic ti laj xa avich'ic vo' ta sventa ti oyoxuc ta stojol ti Cristoe, laj xa ac'u'inbeic xcuxlejal ti Cristoe.

²⁸Ti jech oyoxuc ta stojol ti Cristoe, junoxuc xa, laj xa sc'oplal ti ta xavalbe abaic mi israele, mi jyanlum, mi mosovil, mi colem, mi vinic, mi ants.

²⁹Mi yu'unoxuc ti Cristoe, va'i unbi, bats'i snitiluloxuc ti Abrahame, yajval rextoiloxuc ti albil sc'oplal yu'un Dios ti ta xaq'ue.