Read Tzotzil Efesios 5 Bible Online

Efesios 5 - Tzotzil bible

Efesios 5

¹Ti vo'oxuc xnich'naboxuc ti Dios ti c'uxubinbiloxuc yu'une, ac'beic yipal ta spasel jech c'u cha'al ti stuque.

²Oyuc xc'uxul avo'ntonic c'uxianic jech c'u cha'al laj xc'uxubinotic ti Cristoe, ti laj yac' sba ta milel ta jcojtic ti co'ol s'elan jcot uni chij ti laj yich' aq'uel ta smoton Dios ti jun yutsil slequil laj yile.

³Ti jech yu'unoxuc xa ti Diose, j'ech'el lajuc ta alel sc'oplal avu'unic ti mulivajele, ti c'usitic yan ta soquesvane, ta yu'ninel ti c'usi oy yu'un ti yane.

⁴Mu xavalic ti c'usi q'uexlal sbae, ti c'usi mu'yuc smelole, ti bol c'opetique, yu'un mu'yuc c'usi xtun o ti jech taje. Ja' lec, ja' albeic slequilal yutsilal ti Diose.

⁵Ti buch'utic yac'ojbeic yipal ti mulivajele, ta spasel ti c'usi chopole, ta yu'ninel ya'i ti c'usi oy yu'un ti yane, (taje, co'ol s'elan ja' xrioxinoj ti c'usi meltsanbil ta c'abale), ti buch'utic jech taje, xana'ic lec ti mu xu' ta x'ochic batel ti bu ta xventainvan ti Cristoe xchi'uc ti Diose.

⁶Mu aq'uelojuc xavac' abaic ta lo'lael yu'un mi junuc ti buch'utic naca yesomal sjolic ti c'usitic ta xalique. Ta scoj ti jech taje, q'uelel xa talel ta stojol ti tsots tsitsel yu'un ti Diose.

⁷Mu xaco'oltas avo'ntonic xchi'uc ti buch'utic jech stalelic taje.

⁸Ta vo'ne ti vo'oxuque, oyoxuc to ox ta ic'al osil ti naca vocol xale. Avi tana li'e, oyoxuc ta saquilal osil ta sventa ti junoxuc xchi'uc ti Cajvaltique. Jech o xal un, ac'beic yipal ta spasel jech c'u cha'al ti buch'utic oy ta saquilal osile.

⁹Yu'un ta sventa ti oyoxuc ta saquilal osile, ta x'ayan slequilal yutsilal avo'ntonic, ti stuq'uil jol o'ntonale, ti lec ta q'uelel ti acuxlejalique.

¹⁰Ja' ac'beic yipal ta spasel ti c'usi lec ta xil ti Cajvaltique.

¹¹Mu xacap abaic ta spasel ti c'usitic mu'yuc stuq'uil ta spasic ti buch'utic oyic ta ic'al osile. Ja' lec, ac'bo sna'ic ti mu'yuc smelol ti c'usi chopol ta spasique.

¹²Yu'un ti c'usi ta spasic ta mucul ti buch'utic taje, mu stac' alel, toj q'uexlal sba.

¹³Mi ta xavac'be sna' ti c'usitic chopol ta spasique, ta xlic ya'i sbaic, ta xlic sq'uel sbaic yo' mu staojuc ta spasic ti c'usi chopole.

¹⁴Ta sventa ti jech jamal ta xich' albele, xu' ta xlic stij yo'nton xchi'uc. Jech o xal xi ta xale: “Julavan ti jech vayalote. Tamo aba liquel ti jech achi'inojan ti animaetique, tey xojobin no'ox vulel ta atojol ti Cristoe.”

¹⁵Ja' yu'un chae, q'uelo abaic lec c'u a'elanic ta x'ech' avu'unic ti jujun c'ac'ale. Oyuc abijilic. Mu me teyuc no'ox xach'ayetic.

¹⁶Tunesic lec ti jujun c'ac'al ta x'ech'e, yu'un ti jujun c'ac'ale, naca vocol sq'ueloj talel.

¹⁷Mu xapasic pojol chac'al ti mu xava'ibeic ti xchiquinale. Ja' ac'beic yipal ta ya'yiel c'usi ta sc'an ti Diose.

¹⁸Mu xayacubic, yu'un ti yacubele mu'yuc xa tuq'uil melolil yu'un. Ja' lec, ventainbiluc avo'ntonic yu'un ti Ch'ul Espíritue.

¹⁹Ta sventauc ti sc'op Diose, ta sventa ti q'uejimoletique, tsatsubtasbo aba avo'ntonic ta jujun tal. Ta sjunuluc avo'ntonic, muyubtaic ta sq'uejintael ti Cajvaltique.

²⁰C'usiuc no'ox ta xc'ot ta atojolique, colaval, utic ti Dios ta sventa ti Cajvaltic Jesuse.

²¹Ich'o abaic ta muc' ta jujun tal ta sventa ti xana' xaxi'taic ti Diose.

²²Antsetic ti vo'oxuc nupul ts'acaloxuque, ich'ic ta muc' ti amalalique jech c'u cha'al ta xavich'ic ta muc' ti Cajvaltique.

²³Yu'un ti jun vinic nupul ts'acale, sbainoj ti snup xchi'ile jech c'u cha'al ti jch'unolajeletic bainbilic yu'un ti Cristoe. Ti jch'unolajeletique, ja' Jcoltavanej yu'un ti Cristoe, xchi'uc yich'ojbeic ti sbec'tal stacopale.

²⁴Jech c'u cha'al ti jch'unolajeletic ta xich'ic ta muc' ti Cristoe, ja' jech ac'o yich'ic ta muc' snup xchi'ilic ti antsetique.

²⁵Viniquetic ti vo'oxuc nupul ts'acaloxuque, c'uxubino ti avajnilique jech c'u cha'al ti Cristo ta xc'uxubin ti jch'unolajeletique, yu'un laj yac' sba ta milel ta sventaic.

²⁶Jech laj spas ti Cristoe yo' jech ta xc'otic ta yu'untac Dios c'alal pocbil tusbil c'otic yu'un ti sc'ope.

²⁷Jech laj spas ti Cristoe yo' jech mu'yuc c'usi quechel macal yu'unic, mi jutebuc xchopolalic, mi jutebuc oy c'usi soquem yu'unic, jun yutsil, jun slequil scotol ti jch'unolajeletic ta xc'ot sva'an sba yu'un ta stojol ti Diose.

²⁸Ti jun vinic ti buch'u nupul ts'acale, ja' jech ac'o xc'uxubin ti snup xchi'il jech c'u cha'al ta xc'uxubin ti sbec'tal stacopal stuque. Yu'un ti buch'u ta xc'uxubin ti snup xchi'ile, ja' ta xc'uxubin sba.stuc.

²⁹Yu'un mu'yuc buch'u junucal xti'et sjol yu'un ti sbec'tal stacopal stuque, ja' no'ox ta xc'uxubin, ta smalq'uin. Ja' jech ta spas ti Cristo ta stojol ti jch'unolajeletique.

³⁰Yu'un c'otemotic ta sbec'tal stacopal ti Cristoe.

³¹Yu'un xi ta xal ti ch'ul c'ope: “Jech o xal ti vinique ta scomtsan ti stot sme'ique yo' ta xnupij sts'aquij xchi'uc ti yajnile. Ti xchibalique ta xc'otic ta jun.”

³²Ti va'i s'elan taj une, toj chucul ta a'yibel ti smelole. Ta xcal ti vu'une, ja' sc'oplal ti Cristo xchi'uc ti jch'unolajeletique.

³³Jech un cha'e, ta jujun tal ti vo'oxuc vinicoxuque, c'uxubino ti anup achi'ile jech c'u cha'al ta xac'uxubin aba atuquique. Ti ants ti buch'u nupul ts'acale, ac'o yich' ta muc' ti smalale.