Read Tzotzil Efesios 6 Bible Online

Efesios 6 - Tzotzil bible

Efesios 6

¹Ti vo'oxuque, alab nich'nabiletic ta sventa ti Cajvaltique, ja' avabtelic ta xach'unbeic smantal ti atot ame'ique, yu'un jech sc'an pasel.

²Yu'un oy bu xi ta xal ti sliquebal ti oy c'usi tsots sc'oplal albil yu'un Dios ti oy c'usi ta xich' tael yu'une: “Ich'o ta muc' atot ame'

³yo' jech xamuyubaj, yo' jech ta xnatij acuxlejal li' ta banomile.”

⁴Ti vo'oxuque, totil me'iletic, mu me xajajeticuc ta stojol ti avalab anich'nabique yo' jech mu soc yo'nton avu'unic. Ta sventauc syail xc'uxul yo'nton ti Cajvaltique, tojobtasic batel.

⁵Ti vo'oxuque, mosoviletic, ch'unbeic smantal ti ajvalil avu'unic li' ta banomile, xi'taic, ich'ic ta muc', junuc avo'ntonic ta stojolic ti co'oluc s'elan ja' Cristo ta xava'iic ti ta xatunic ta stojole.

⁶Ma'uc no'ox avac'oj xa abaic ta tunel yilel c'alal va'al sq'uelojoxuque yo' lec ti ac'oplalic yu'unique. Ta sventa ti jech yajtuneloxuc ti Cristoe, pasic ta sjunul avo'ntonic ti c'usi ta sc'an ti Diose.

⁷Pasic ta sjunul avo'ntonic ti avabtelique, co'oluc to s'elan ava'iic ja'uc tunanic yu'un ti Cajvaltique, ti ma'uc no'ox avac'oj abaic ta tunel ta stojol ti jnaclejetic ta banomile.

⁸Yu'un xana'ic xa lec, mi mosovil, mi ma'uc mosovil, ta xtojbatic yu'un Cajvaltic ta jujun ti c'usi lec laj apasique.

⁹Ja' jech xtoc ti vo'oxuque, ajvaliletic, oyuc slequil yutsilal avo'ntonic ta stojol ti avajmosovique, mi ja'uc xasibtasic. Na'ic me lec, ti vo'oxuque xchi'uc ti stuquique, co'oloxuc ta stojol ti Cajvaltic ti oy ta vinajele, ti mu sna' jeltos yo'nton ta stojol ti jnaclejetic ta banomile.

¹⁰Avi tana, ti jech co'ol jchi'il jbatique, ta sventauc smuc'ul stsatsal stuc ti Cajvaltique, tsotsanic ti jech oyoxuc ta stojole.

¹¹Lapic, maco abaic yu'un scotol ti amacobbailic ti ac'biloxuc yu'un ti Diose yo' jech mu xalajic ta lo'lael yu'un ti pucuje.

¹²Yu'un ma'uc yacalotic ta scontrainel ta stsalel ti jnaclejetic ta banomil ti oy sbec'tal xch'ich'elique. Yu'un ja' yacalotic ta scontrainel ta stsalel ti pucujetic ti oy yipic ta spasel ti c'usi chopole, ti ta ic' ta xanavique, ti ja' ta spas ta mantal ti jnaclejetic ta banomil ti oyic ta ic'al osile.

¹³Jech o xal un, tsaquic scotol ti amacobbailic ac'biloxuc yu'un ti Diose yo' jech ti c'alal ta xc'ot sc'ac'alil ti vocol q'uelel talel ta atojolique, xu' xcuch avu'unic stsalel ti pucuje. C'alal mi cuch avu'une, xu' xa avu'un, mu xa stsic' avo'nton yu'un.

¹⁴Jechuc chaplanic jech c'u cha'al soldado ti yich'oj lec yip ti lec chucul ta xch'ut ti xchuque. Jechucoxuc ec un ti ja'uc c'otemuc ta apojobbailic ti c'usi melele, ti oy slequil yutsil avo'ntonique.

¹⁵Chaplanic ta yalel batel ti jun o'ntonal xa xchi'uc ti Diose jech c'u cha'al ti soldado ti chapal slapoj ti xonobe.

¹⁶Ti tsots sc'oplale, ja'uc c'otemuc ta amaquic ta apojobbailic ti jech c'otem ta avo'nton ta xch'unel ti Cajvaltique yo' jech ta xtub avu'un sc'ac'al sni' syolob ti pucuje.

¹⁷Sc'oplal ti pojel colele, ja'uc c'otemuc ta smac ajolic, xchi'uc ja'uc c'otemuc ta avespadaic ti sc'op Dios ta xac'boxuc ti Ch'ul Espíritue.

¹⁸Xi ta xcalboxuc ava'iique: Mu xavicta abaic ta c'opojel ti'inel, xchi'uc ta sventauc ti Ch'ul Espiritue, vocoletanic, c'anbeic ti Dios ti c'usi sc'an pasele. J'ech'eluc viq'uiluc asatic, mu xatsiq'ues avo'ntonic ta c'opojel ti'inel ta sventa ti buch'utic yu'untac xa ti Diose.

¹⁹C'opojanic ti'inanic ta jventa yo' jech ti Diose ta xiyac'bun ta que ta jti' ti c'usi xu' ta xcale, ti oyuc yip co'nton ta yalel ti colebal lequil ach' c'op ti mucul to oxe.

²⁰Tacbilun yu'un Dios ta yalel ti lequil ach' c'op ti tiq'uilun ta chuquel yu'un avi tana li'e. C'oponic Dios yo' mu ta xi'eluc ta xcal ti lequil ach' c'ope, yu'un ja' cabtel.

²¹Ti jchi'iltic Tíquicoe, ti jun yo'nton ta xiscolta ta sventa yabtel ti Cajvaltique, ja' ta xalboxuc ava'iic ti c'u j'elane, ti c'usi ta jpase.

²²Jech o xal ta jtac talel ta atojolic yo' jech ta xalboxuc ava'iic ti c'u j'elancutique. Ti jech une, ta xac'boxuc yip avo'ntonic.

²³Jech ti jch'unolajeletique, ac'baticuc yu'un ti Jtotic Diose xchi'uc ti Cajvaltic Jesucristoe, ti slamajemal yo'ntonique, ti syail xc'uxul yo'ntonique, ti c'otuc o ta yo'ntonic ta xch'unele.

²⁴Ac'o ac'baticuc slequilal yutsilal Dios ti buch'utic staoj yav yo'ntonic c'ux ta xa'iic ti Cajvaltic Jesucristoe. Jechuc.