Read Tzotzil Filipenses 1 Bible Online

Filipenses 1 - Tzotzil bible

Filipenses 1

¹Vu'un Pablo xchi'uc ti Timoteo ti yajtuneluncutic ti Jesucristoe, ta jts'ibaboxuc talel jvuncutic ta atojolic ti vo'oxuc jch'unolajeloxuc nacaloxuc ta jteclum Filipose, ti jventaivanej avu'unique, xchi'uc ti xchi'iltac ta abtel ti yu'unoxuc xa ti Dios ta sventa ti oyoxuc ta stojol ti Jesucristoe.

²Ti Jtotic Diose xchi'uc ti Cajvaltic Jesucristoe, ac'o xasc'uxubinoxuc, ac'o xayac'boxuc ti slamajemal yo'ntone.

³Colaval, xichi ta stojol Dios ti c'alal ta xavulic ta co'ntone.

⁴Ti c'alal ta xic'opoj xiti'in ta aventaique, ximuyubaj xa ta jc'anbe Dios ti j'ech'eluc ac'o sva'an sba ta atojolique.

⁵Yu'un ta sliquebal ono'ox, lic acoltaicun talel ta sventa ti lequil ach' c'ope, ti jech to staoj yav ta xapasic avi tana li'e.

⁶Yu'un c'otem lec ta co'nton ti j'ech'el ta stsutses ti lequil abtel laj sliques ta atojolic ti Diose, ti jna' ti lec xvul staoxuc ti Cajvaltic c'alal ta xcha'sut talele.

⁷Xloc' venta ti jech ta jnop ta atojolic acotolique, yu'un oyoxuc ta co'nton, yu'un avac'oj avoc ac'obic ta yabtelanel ta sventa ti c'uxubinel laj yac'botic ti Diose, manchuc mi tiq'uilun ta chuquel, mi yacalun ta spaquel jc'oplal ta stojol ti jchapanvanejetique, mu ja'uc xquicta jba ta yalel ti lequil ach' c'ope.

⁸Sna' lec Dios ti co'ntonuc xa jc'an jq'ueloxuc ca'ie, yu'un ech'em c'uxoxuc ta co'nton jech c'u cha'al c'uxoxuc ta yo'nton ti Jesucristoe.

⁹Ti c'alal ta xic'opoj xiti'ine, ta jc'anbe ti Diose ti yepaluc ac'o xayac'boxuc xc'uxul avo'ntonique, xchi'uc ayanuc abijilic ta yojtiquinel scotol,

¹⁰yo' jech ta xana'ic st'ujel ti c'usi leque, yo' lec oyoxuc, yo' mu'yuc amulic ta xvul staoxuc ti Cajvaltic c'alal ta xcha'sut talele.

¹¹Ti jech ta x'abtej ti Jesucristo ta atojolique, yo' ta x'ayan ti oyuc yutsil slequil ti c'usi ta xapasique, sventa yich'el ta muc', yo' lec sc'oplal avu'unic ti Diose.

¹²Ti jech jchi'il jbatique, ta xcac' ana'ic ti loc' venta ti c'usitic laj c'otanuc ta jtojole, yu'un laj scoltaun ta yalel batel ti colebal lequil ach' c'ope.

¹³Yu'un scotol ti soldadoetic ti oyic ta cabiltoe, xchi'uc ti yan jnaclejetique, sna'ic lec ti tiq'uilun ta chuquel ta sventa ti ta jts'acli ti Cristoe.

¹⁴C'alal laj yilic ti jch'unolajeletic ti ochemun ta chuquele, jutuc xa mu scotolicuc mu ta xi'eluc ta xalic ti sc'op Diose. Yu'un x'ech' to laj spat yo'ntonic ta stojol ti Cajvaltique.

¹⁵Oy jlom, ta melel, ta soquemal yo'ntonic, ta yit'ixal yo'ntonic, ta xalic sc'oplal ti Cristoe. Oy jlom xtoc ta slequil yutsil yo'ntonic ta xalic.

¹⁶Oy buch'utic xtoc un, ta yutsil slequil yo'ntonic ta xalic ti lequil ach' c'ope, yu'un sna'ic lec ti jva'anoj jba ta spacbel sc'oplal ti lequil ach' c'ope.

¹⁷Ja'uc ti jlom xtoque, naca xalbeic no'ox batel sc'oplal ti Cristo yilele, ti c'alal ja' no'ox oy ta yo'ntonic ta xilbeicun ya'i jvocol ti jech chuculune, xchi'uc ta sa'el ti c'usi ta xtun yu'un stuquique.

¹⁸Ja'uc le'e, ximuyubaj no'ox ta xca'i, ¿c'usi jventa? mi ta soquemal yo'ntonic, mi ta slequilal yo'ntonic ta xalic batel, yu'un ta ono'ox xpuc batel sc'oplal ti Cristoe.

¹⁹Colavalic xtoc un, ti ta xataic ta c'oponel ti Dios ta jventae, xchi'uc ti ta stic' sba ta scoltaelun Xch'ul Espíritu ti Jesucristoe, ta xic'ot ta pojel colel yu'un.

²⁰Ti c'usi ta jc'an avi tana li'e, ti j'ech'el jpatoj co'ntone, ja' ti mu xiq'uexave, ti jamaluc que jti' ta yalel sc'oplal ti Cristoe, ti vinajuc smuc'ul stsatsal Cristo ta stojol scotolic ta sventa ti c'usiuc no'ox ta jpase, ac'o mi xicham, mi cuxulun to ta xicom.

²¹Yu'un ti jech cuxulun li'e, ja' no'ox ta xcac' ta ich'el ta muc' ti Cristoe. Ja'uc mi lichame, cuch xa cu'un unbi.

²²Ti jech cuxulun to xchi'uc ti jbec'tal jtacopale, xu' to ta xi'abtej yu'un ti Cajvaltique. Ti jech taj une, mu stac' a'yeluc ta xca'i bu ta t'ujel.

²³Yu'un xi s'elan ta xca'i vocol ta jt'uj ti cha'tos taje: ti june, jc'an xa chamcun ca'i yo' jech chba jchi'in ti Cristoe, yu'un ech'em lec xloc' venta ta xca'i.

²⁴Ta sventa ti vo'oxuc une, tsots sc'oplal ta xca'i ta co'nton ti cuxulucun toe yo' jech ta xitun avu'unic.

²⁵Ti jech c'otem ta co'nton taje, cuxul to ta xicom yo' ta jcoltaoxuc ta yac'bel batel yipal, yo' x'ech' to xamuyubajic ti c'otem ta avo'ntonic ta xch'unel ti Cajvaltique.

²⁶Va'i unbi, xamuyubajic xa liquel ta stojol ti Jesucristo c'alal ta xic'ot ta atojolic xtoque.

²⁷Xi ta xcalboxuc ava'iic xtoque: cuxianic ta yac'bel yipal ta spasel co'ol xchi'uc jech c'u cha'al ta xal ti lequil ach' c'op yu'un ti Cristoe. Mi bat jq'ueloxuc, mi mu'yuc, ja' no'ox ta jc'an ta xca'i ac'oplalic mi jmoj vololoxuc avac'ojbeic yipal ta xch'unel ti colebal lequil ach' c'ope.

²⁸Mu xavac' abaic ta sibtasel yu'un ti avajcontraique. Ti jech mu xaxi'ic taje, ja' svinajeb ti ch'ayel ta xbat ti stuquique. Ja' jech xtoc ja' svinajeb ti ta xlic talel acoltaelic ta stojol ti Diose.

²⁹Ti vo'oxuc oyoxuc ta stojol ti Cristoe, ta xavich' avocolic ta sventa, ma'uc no'ox ti latic'bat ta ajol ta avo'ntonic ta xch'unele.

³⁰Ti vo'oxuc xchi'uc ti vu'une, co'ol ta xquich'tic ti contrainele, yu'un avilojic xa c'u s'elan laj quich' contrainel. Jech to ta xquich' contrainel avi tana li'e.