Read Tzotzil Filipenses 2 Bible Online

Filipenses 2 - Tzotzil bible

Filipenses 2

¹Ja' yu'un un cha'e, mi laj yac' yip avo'ntonic ti Cristoe, mi ta spat avo'ntonic yu'un ti syail xc'uxul o'ntonale, mi oy ta atojolic ti Ch'ul Espíritue, mi c'ux ta xava'i abaique, mi ta xacolta abaique, xmuyubaj xa co'nton ta xca'i avu'unic.

²Mi jun avo'nton cuxuloxuque, mi jmoj c'ux ta xava'i abaique, mi jun ti c'usi ta xanopique xchi'uc ti c'usi ta xavalique, ximuyubaj ta j'ech'el unbi.

³Biq'uit xavac' abaic, mu ta toyobbailuc, mu ta soquemaluc ajolic ti c'usi sc'an pasele. Nopic ta jujun tal ti x'ech' to yutsil c'usi ta spas ti yane, ti ja' mu sta ti stuque.

⁴Ja'uc me ac'o spas ti c'usi ta xtun yu'un ti yane. Mu me ja'uc no'ox ta sa' ti c'usi ta xtun yu'un ti stuque.

⁵Jechuc xanopic jech c'u cha'al laj snop ti Cristoe,

⁶yu'un xi s'elane: Ac'o mi ja' stalel Dios ono'ox ti stuque, mu'yuc snopoj ti sujoj sba yo' xco'olaj xchi'uc Dios ono'ox ti stuque.

⁷Yu'un stuc laj yicta comel ti c'u s'elan bu to ox oye, c'ot jech c'u cha'al junuc jtunel, yu'un laj yich' sbec'tal stacopal, voc' ta banomil.

⁸C'alal jech laj yich' sbec'tal stacopale, laj snijan xchiman sba, laj yac' o sjol sbaquil xchi'uc, ac'o mi toj q'uexlal sba ti jech c'ot ta pasel laj cham ta curuse.

⁹Jech o xal aq'ue ta ich'el ta muc' yu'un Dios, ti mu'yuc buch'u yan x'ech' to ich'bil ta muc' jech c'u cha'al ti stuque.

¹⁰C'alal ta xa'iic “Jesús”, xi ti sc'oplale, scotol ti buch'utic oy ta vinajele, ti oy ta banomile, ti oy ta c'atimbaque, ta squejan sbaic ta stojol.

¹¹Scotol jamal ta xalic ti ja' Ajvalil ti Jesucristoe, yo' jech ich'bil ta muc' ta xc'ot ti Dios Totile.

¹²Jech o xal un, ti co'ol jchi'il jbatique, c'alal oyun to ox ta atojolique, laj ach'unbeicun ti c'u s'elan laj jchanubtasoxuque. Ti jech nom oyun ta atojolic avi tana li'e, x'ech' to ch'unbeicun. Xi'anic, bic'tajes abaic, tijo avo'ntonic yu'un ti acoltaelique.

¹³Yu'un ti Diose, ja' ta xac'boxuc yutsilal slequil avo'ntonic yo' jech ta xapasic ti c'usi ta sc'ane, yu'un ja' ta scoltaoxuc ta spasel ti c'usi lec ta xa'ie.

¹⁴Mu ta ijeteluc, mu ta vulvul c'opuc ti c'usi ta xapasique,

¹⁵yo' jech mu xatabat amulic achopolalic, yo' jech bats'i xnich'nabucoxuc Dios ta stojol ti jnaclejetic ta banomil ti mu'yuc xch'ulel xa'i sbaique. Co'oluc a'elanic ta stojol jech c'u cha'al junuc c'anal ti xojobin ta ic'al osile,

¹⁶c'alal yacaloxuc ta yalbel ya'iic ti cuxlejal ach' c'ope. Ja' yu'un un, c'alal ta xcha'sut talel ti Cristoe, ximuyubaj ta atojolic, yu'un jna' lec mu jeche'uc no'ox ech' vocol ti li'abej ta atojolique.

¹⁷Ac'o mi ta xmal ti jch'ich'el yo' ta xc'ot ta ts'aquiel ti co'ol s'elan matanal ta xavac'beic Dios ta sventa ta xc'ot ta avo'ntonic ta xch'unele, ximuyubaj xa, ta xataic ec ti xamuyubajic xa cu'une.

¹⁸Muyubajanic ec un, jech c'u cha'al ximuyubaj ta atojolique.

¹⁹Mi jech ta sc'an ti Cajvaltic Jesuse, ta jtacboxuc no'ox talel ta atojolic ti Timoteoe yo' ta sq'ueloxuc, yo' ximuyubaj xa c'alal ta xiyalbe ca'i ti ac'oplalique.

²⁰Yu'un mu'yuc buch'u yan jech ta snop jech c'u cha'al ta jnope, ti ja' no'ox ta sc'an ti lec oyoxuque.

²¹Scotol ti yane, ja' no'ox ta sa'ic ti c'usi ta xtun yu'un ti stuquique, ma'uc tsots sc'oplal ta xa'iic ta yalbel sc'oplal ti Jesucristoe.

²²Ja'uc ti vo'oxuque ana'ojic xa c'u s'elan ta x'abtej ti Timoteoe, co'ol s'elan jnich'on ta xiscolta ta abtel. Ti Timoteoe, yu'un jmoj ta xi'abtejcutic ta yalel ti lequil ach' c'ope.

²³Ja' yu'un un cha'e, c'alal mi laj ca'i c'u s'elan ta xbat ti jc'oplale, ta jtacboxuc talel ta atojolic ti Timoteoe,

²⁴ac'o mi jpatoj co'nton yu'un ti Cajvaltique ti ta xtal jq'ueloxuc no'oxe.

²⁵Ja' jech xtoc, tsots sc'oplal ta xca'i ta jtacboxuc talel ta atojolic ti jchi'iltic Epafroditoe, ja' ti jchi'il ta abtele, ja' ti jchi'il ta ich' vocole, ti vo'oxuc laj ataquic talel yo' ta scoltaelun ta sventa ti c'usi ta xtun cu'une.

²⁶Yu'un ti stuque oy ta yo'nton ta xtal sq'ueloxuc ya'i acotolic, yu'un oy ta vul o'nton ti laj ava'iic ti ipaje.

²⁷Melel ono'ox un, jutuc xa mu cham, Ja'uc le'e, c'uxubinat yu'un ti Diose. Ma'uc no'ox stuc c'uxubine, yu'un laj xc'uxubinun ec ti Diose yo' mu xa xich' xchi'il ti oyun ta at o'ntone.

²⁸Jech o xal un, ta jtac talel ta atojolic yo' jech xamuyubajic xa c'alal ta xavilbeic ti sat xtoque, yo' mu teyuc no'ox oyun ta at o'nton avu'unic.

²⁹Muyubajanic, ich'ic ta muc' ti jchi'iltic Epafroditoe, yu'un co'ol achi'il abaic ta sventa ti Cajvaltique. Ti buch'u xco'olaj yo'ntonic jech c'u cha'al ti stuque, ich'ic ta muc' ta sjunul avo'ntonic.

³⁰Yu'un jutuc xa mu laj yac' sjol sbaquil ta sventa ti ta xtun yu'un ti Cristoe, yu'un sjunul yo'nton laj sts'ic svocol ti laj yac' sba ta tunel cu'une, c'alal mu xu' avu'unic ta xtal acoltaicune.