Read Tzotzil Filipenses 3 Bible Online

Filipenses 3 - Tzotzil bible

Filipenses 3

¹Avi tana une, Jchi'iltac, muyubajanic yu'un ti Cajvaltique. Ma'uc vocol ta xca'i ta jcha'alboxuc ava'iic ti c'usi laj xa ono'ox calboxuque, yu'un ta xtun avu'unic.

²Bijanic yu'un ti buch'utic co'ol s'elan ts'i' xa'i sbaic ti stalelique, ti chopol ta j'ech'el ti c'usi ta spasique, ti ta xaq'uic ta ich'el ti circuncisione.

³Yu'un ti buch'utic yich'ojic ti bats'i circuncisione, ja' ti vo'otique. Yu'un ta xquich'tic ta muc' ti Dios ta yutil co'ntontic ta sventa ti Ch'ul Espíritue. Xijmuyubajotic ti jech oyotic ta stojol ti Cajvaltic Jesucristoe. Yu'un ma'uc ta jpat co'ntontic ti lec oyotic ta sventa ti c'usi ta xich' pasel ta spat xocon no'oxe.

⁴Ti buch'u ta spat yo'nton yu'un taje, vu'un x'ech' to ta jpat co'nton ti jechuque, yu'un xi s'elan ti oy lec jrazone:

⁵c'alal quich'oj xvaxaquibal (8) c'ac'al jvoq'uele, li'ac'bat quich' circuncisión. Yu'un sts'unubalun Israel, snitilulun ti Benjamine, vu'un hebreoun yu'un ja' hebreoetic ti jtot jme'e. Bats'i fariseo xca'i jba ta sventa ti c'u s'elan liquem yu'unic ti israeletic ta xal ti mantal yu'unique.

⁶Ti tsots sc'oplal laj ca'i ta co'nton ti c'u s'elan liquem cu'uncutique, laj quilbajin ti jch'unolajeletique. Ta sventa yo' ta xc'ot ta pasel cu'un ti c'u s'elan ta xal ti oy c'usi tsots sc'oplal albile, mi jutebuc ta stabun ti jmule.

⁷Scotol ti va'i s'elan tsots sc'oplal laj ca'i ti caloje, avi tana li' une, mu xa tsotsuc sc'oplal ta xca'i, yu'un jpatoj xa co'nton ta stojol ti Cristoe.

⁸Ti jech ech'em xloc' venta laj ca'i ta yojtiquinel ti Cajval Cristo Jesuse, ta jech yepal, laj, tub sc'oplal ta co'nton ta sventa Cristo ti c'usi tsots sc'oplal laj ca'i sc'an pasel to oxe. Yu'un laj xa jbis ta c'a'ep scotol yo' jech oyun ta stojol ti Cristoe,

⁹yo' jech jun co'nton jchi'uc. Ti jech oyun ta stojole, mi ja'uc ta sventa jlequilal cutsilal jtuc, mi ja'uc ta sventa mantal ti mu'yuc xa jcuchoj ti jmule. Yu'un laj jta ti jlequilal ta sventa ti c'ot ta co'nton ta xch'unel ti Cristoe. Ch'abal xa jcuchoj jmul ta stojol Dios ta sventa ti c'ot ta co'nton ta xch'unel ti Cristoe.

¹⁰Ti c'usi ta jc'ane, ac'o cojtiquin ti Cristoe, ca'iuc ta jtojol smuc'ul stsatsal ti cha'cuxie, ti co'oluc quich' jvocol jech c'u cha'al c'alal cham ti stuque,

¹¹yo' jech ta jpat co'nton ti ta xicha'cuxi eque.

¹²Mu yu'unuc cuchem xa cu'un ti jech ta xcale. Mu yu'unuc ta xcal ti jtaoj xa scotole. Ja'uc le'e, jpatoj co'nton ti ta xcac'be yipal ta stael batele, yu'un ba'yel laj staun ta iq'uel ti Cristo Jesuse.

¹³Ti jech jchi'il jbatique, mu yu'unuc ta xcal ti laj xa jta scotole. Yu'un ti c'usi ta jpase, ta jch'ay ta co'nton ti c'usi com ta patile. Yu'un ta xcac'be yipal ta stael batel ti c'usi mu'yuc to jtaoje.

¹⁴Yu'un ta jc'an ta xic'ot ti bu oy ti spajebe yo' jech ta xquich' ti jmoton ti jech ic'bilun yu'un Dios ti oy ta vinajele, ta sventa ti oyun ta stojol ti Cristo Jesuse.

¹⁵Jechuc ac'o jnoptic jcotoltic ti c'otem xa ta co'ntontic ta xch'unel ti Cajvaltique. Mi yan ti c'usi ta xanopic xtoque, Dios ta xayac'boxuc avilic.

¹⁶Ti c'u yepal laj xa jtatique, j'ech'eluc tsotsuc sc'oplal junuc co'ntontic cuxicutic batel xchi'uc.

¹⁷Jchi'iltac, pasic jech c'u cha'al c'u s'elan ta jpas ta xavilique. Tuc'ulano avilic lec ti buch'utic yacal ta spasel ti c'u s'elan laj cac'becutic yilique.

¹⁸Ep xa ta velta laj calboxuc ava'iic, ta ya'lel jsat ta jcha'alboxuc, ti yepal no'ox oy buch'utic ta scontrainic ti cham ta curus ti Cristoe.

¹⁹Ti jech ta spasique, ch'ayel sq'uelojic batel, yu'un ja' xrioxinojic ti c'usitic lec ta xa'iique. Yu'un xcajet xa'i sbaic xchi'uc ti c'usi ac'o q'uexavuc xchi'uque. Yu'un ja' no'ox c'upil ta xa'iic ti c'usitic oy li' ta sba banomile.

²⁰Ja'uc ti vo'otique, ja' cosilal jbanomiltic ti vinajele, yu'un jmalaojtic ta xtal ta vinajel ti Jcoltavanej Cajvaltic Jesucristoe.

²¹Ti jech mu'yuc yutsil slequil ti jbec'tal jtacopaltique, ta xtal sjeltabotic yo' jech ta xquich'tic jbec'taltic jech c'u cha'al ti stuc ti jun yutsil slequil ta j'ech'ele. Ta xc'ot ta pasel un, ta sventa ti smuc'ul stsatsale, yu'un oy ta yoc ta sc'ob scotol ti c'usitic oye.