Read Tzotzil Colosenses 1 Bible Online

Colosenses 1 - Tzotzil bible

Colosenses 1

¹Vu'un Pablo, loc' ayan ta yo'nton Dios ti jech jcholc'opune, ti tacbilun yu'un ti Jesucristoe. Jmoj xchi'uc ti jchi'il ta abtel Timoteoe,

²ta jts'ibaboxuc talel ti jvuncutic ta atojolic ti co'ol jchi'il jbatique, ti jun avo'ntonic ta stojol ti Cristoe, ti yu'unoxuc xa Dios ti li' nacaloxuc ta jteclum Colosase. Ac'o sva'an sba ta atojolic ti Jtotic Diose, xchi'uc ac'o yac'boxuc ti slamajemal yo'nton ta atojolique.

³C'alal ta jtacutic ta c'oponel Dios ta aventaique, colaval, xcutcutic ono'ox ti Diose, Stot ti Cajvaltic Jesucristoe.

⁴Yu'un laj ca'i ac'oplalic ti c'otem o avo'ntonic ta xch'unel ti Cristo Jesuse, xchi'uc ti c'ux ta xava'iic scotol ti buch'utic ja' yu'untac ti Diose.

⁵Ti jech taje, yu'un apatoj avo'ntonic ta smalael ti oy c'usi q'uejbiloxuc ta vinajel ti ja' avu'unique, ti ja' o laj ava'iic c'alal lic ava'iic sc'oplal ti colebal lequil ach' c'ope.

⁶Ti lequil ach' c'op laj avich'ic albel taje, yacal ta slecubtasbe yo'ntonic ti jnaclejetic ta sjoylej banomile jech c'u cha'al c'ot ta pasel ta atojolic c'alal laj ava'iic syail xc'uxul yo'nton ti Diose, ti c'ot ta avo'ntonic ti ja' melele.

⁷Taje, yu'un ja' laj yac' ana'ic ti Epafras ti co'ol jchi'il jbatic xchi'uque, ti laj xchi'inuncutic ta abtele, ti jun yo'nton ta xtun yu'un ti Cristoe.

⁸Ja' laj yal ca'icutic ac'oplalic ti c'ux ta xava'i abaic ta sventa ti Ch'ul Espíritu ti oy ta atojolique.

⁹Ti c'alal jech laj ca'icutic ti ac'oplalique, jech o xal mu xquicta jbacutic ta sc'oponel ta sc'anbel Dios ti ac'o yac'boxuc avilic ti c'usi ta sc'ane, ti ac'o yac'boxuc ep ta tos abijilique, ti ac'o yac'boxuc sbijil ajol avo'ntonique.

¹⁰Yu'un ja' to jech xu' avu'unic ta spasel jech c'u cha'al ti buch'utic ja' yu'untac ti Cajvaltique, ti yacaloxuc ta spasel ti c'usi lec ta xile, ti yepal no'ox oy ep ta tos slequil yutsil avo'ntonic ta spasel ti c'usi leque, xchi'uc ta yojtiquinel ti Diose.

¹¹Ta jc'anbecutic Dios ti ac'o yac'boxuc avipic ta sventa yutsil slequil ti smuc'ul stsatsale yo' jech oy smuc'ul avo'ntonic, yo' jech xamuyubajic ta xcuch avu'unic ti c'usiuc no'ox ta xc'ot ta atojolique,

¹²yo' jech xavalbeic no'ox vocol ti Jtotic Diose ti ta sventa stuc ti chapal xa c'oplaltic ta yich'el ti oy c'usi ta x'ac'batic ti buch'utic yu'untac ti oyic ta saquilal osile.

¹³Yu'un ti Diose laj spojotic loq'uel ta yoc ta sc'ob ti ic'al osil ti q'uelel ta jtojoltique. Laj xa yic'otic ochel ti bu ta xventainvan ti xc'uxubinbil Nich'one,

¹⁴ti ja' ta sventa laj jtatic pojel colele, xchi'uc laj jtatic ti ch'aybil c'ot ti jmultic yu'une.

¹⁵Ti mu xvinaj ta q'uelel ti Diose, tal yac' sba iluc ta sventa ti Xnich'one. Yu'un ti Xnich'one, oy xa ono'ox c'alal lic meltsajuc talel scotol ti c'usitic oye.

¹⁶Ta sventa Cristo, meltsaj yu'un Dios scotol ti c'usitic oy ta vinajele, ti c'usitic oy ta banomile, ti c'usitic xvinaj ta q'uelele, ti c'usitic mu xvinaj ta q'uelele. Scotol c'usitic mu xvinaj ta q'uelele jech c'u cha'al ti jpas-mantaletique, ti j'abteletique, ti buch'u tsots xu' yu'unique, scotol meltsaj yu'un Dios ta sventa ti Cristo yo' jech ta xtun yu'un ti stuque.

¹⁷C'alal mu'yuc to ox scotol ti c'usitic oye, oy xa ono'ox ti Cristoe. Ja' ta sventa stuc, lec ta xanav ta xbein scotol ti c'usitic oye.

¹⁸Ma'uc no'ox taj une, yu'un ti Cristoe ja' c'otem ta Banquilal yu'unic ti jch'unolajeletic ti vololic ta stojole. Ta sventa Cristo oy xcuxlejal ti jch'unolajeletique. Ja' jech xtoc ba'yel cha'cuxi yo' jech c'ot ta totil yu'un scotol.

¹⁹Scotol stalel yutsil ti Diose, loc' ayan ta yo'nton stuc ti yich'ojuc c'ot ti Cristoe,

²⁰yu'un ta sventa Cristo, ti Diose lecub yo'nton xchi'uc scotol ti c'usitic oy li' ta banomile, ti oy ta vinajele, ta sventa ti laj smal xch'ich'el ta curus ti Cristoe.

²¹Ti ta vo'nee, jyanlumoxuc to ox, acontrainojic Dios ta avo'ntonic ta scoj ti naca chopol ti c'usi ta xapasique.

²²Avi tana une, ch'abal xa amulic ta xayiloxuc ti Diose ta sventa ti laj yich' svocol ta sbec'tal stacopal c'alal cham ta curus ti Cristoe. Jech laj spas ti Diose yo' mu'yuc amulic, yo' oy alequil avutsilic ta xc'ot ava'an abaic ta stojol.

²³Ti jech taj une, tsots sc'oplal j'ech'el c'otuc o ta avo'ntonic ta xch'unel ti Cajvaltique, ti ats'unoj lec ta avo'ntonic ti ta xacolic ta sventa ti colebal lequil ach' c'op ti laj ava'iique. Taje, ja' ti lequil ach' c'op ti buyuc no'ox ta xich' alel ta sjoylej banomile. Yu'un ta jcolta jba ta yalel ti vu'un Pabloune.

²⁴Manchuc mi ta xquich' jvocol ta aventaic yo' jech lec oyoxuc ta sventa ti cabtele, mu'yuc c'usi xal ti co'nton yu'une, ximuyubaj xa yu'un. Yu'un ta sventa ti jech ta xquich' jvocole, ta sts'aquij cu'un ti quechel mac to svocol ti Cristo ta sventa ti jch'unolajeletic ti vololic ta stojole.

²⁵Yu'un ja' cabtel laj yac'bun Dios yo' jech ta xitun yu'un ti jch'unolajeletique yo' jech lec oyoxuc, yu'un jamal que jti' ta yalel ti sc'op Diose,

²⁶ti xcaltique, ja' ti c'usi mu'yuc to ox vinajem talel sc'oplal ta vo'nee, ti oy xa sjaylajun-chopal laj ech'uc ti jnaclejetic ta banomil ti mu'yuc laj svinajes ti Diose. Avi tana une, laj xa yac'be sna' ta yojtiquinel ti buch'utic ja' yu'untaque.

²⁷Ti stuquique ac'bat sna'ic yu'un Dios ti c'usi mucul to ox ti c'otem ta sventa yutsil sc'ulejal ti muc'tiquil lum jyanlumetique, ti ja' tey xa oy ta avo'ntonic ti Cristoe, ti ja' ta sventa amalojic ti c'usi toj jun yutsil ta to xataique.

²⁸Ti jech ac'bil jbijilcutique, yacaluncutic ta yalbel sc'oplal ti Cristoe, ta sventa atojobtaselic achanubtaselic acotolic yo' jech ta xava'ibeic ti smelole, yo' mu'yuc c'usi quechel macal avu'unic ta xc'ot jva'anoxuc ta stojol ti Cristoe.

²⁹Ja' ta sventa ti jech yacal ta xi'abteje, ti jpasoj tsatsal ta yabtelanel ta sventa smuc'ul stsatsal ti Cristo ti ta xiyac'bune.