Read Tzotzil 1 Tesalonicenses 1 Bible Online

1 Tesalonicenses 1 - Tzotzil bible

1 Tesalonicenses 1

¹Vu'un Pablo xchi'uc ti Silvanoe, xchi'uc ti Timoteoe, ta jts'ibaboxuc talel ti jvuncutic ta atojolic ti jch'unolajeloxuc oyoxuc ta jteclum Tesalónicae, ti oyoxuc ta stojol ti Jtotic Diose xchi'uc ti Cajvaltic Jesucristoe. Ac'o sva'an sba ta atojolic ti Jtotic Diose xchi'uc ti Cajvaltic Jesucristoe. Ac'o yac'boxuc slamajemal yo'nton ta atojolic.

²C'alal ta xavul ta co'ntoncutic acotolique, colaval xichicutic ta stojol Dios c'alal ta xic'opoj xiti'incutique.

³Ta sba ta sat ti Jtotic Dios cu'untique, j'ech'el mi ja'uc xach'ay ta co'ntoncutic c'alal ta xvul ta jolcutic ti c'ot no'ox ta avo'ntonic ta xch'unel ti Cajvaltique, ti ta syail xc'uxul avo'ntonic laj avac' abaic ta tunele, ti tsots ava'anoj abaique manchuc mi oy ti vocol ta atojolic ta sventa ti amalaojic ti Cajvaltic Jesucristoe.

⁴Ti jech jchi'il jbatique, c'ux ta xa'ioxuc ti Diose. Jna'cutic lec ti ja' laj st'ujoxuc ti stuque.

⁵Yu'un c'alal laj calboxuc ava'iic ti colebal lequil ach' c'ope, ma'uc ti naca xivulvuncutic ta atojolique, yu'un ja' smuc'ul stsatsal ti Ch'ul Espíritu lic abtejuc ta atojolique, ti j'ech'el c'ot ta avo'ntonic ti ja' melel laj ava'iique. Xana'ic lec ti laj jtuc'ulan jbacutic ta atojolic yo' jech lec oyoxuc.

⁶Jech ti vo'oxuque laj achan co'ntoncutic xchi'uc laj achanbeic yo'nton ti Cajvaltique. Manchuc mi yepal no'ox ti avocolique, xamuyubajic no'ox ta sventa ti laj yac'boxuc avipic ti Ch'ul Espíritue.

⁷Ti jech cuch avu'unic ti avocolique, laj avac'beic yilic ti jch'unolajeletic ti oyic ta yosilal Macedoniae xchi'uc ti oyic ta Acayae, ti jechuc cuchuc yu'unic ti svocolique.

⁸Vo'oxuc ta aventaic ti ma'uc no'ox ta Macedonia ti ta Acaya puc batel avu'unic ti lequil ach' c'op yu'un ti Cristoe, yu'un buyuc no'ox puc batel avu'unic, xchi'uc buyuc no'ox a'yinbil ac'oplalic ti c'otem ta avo'ntonic ta xch'unel ti Diose, ti ma'uc xa tsots ta xcalcutic ti ac'oplalique.

⁹Yu'un ja' stuquic ta xalic ti ay calcutic ava'iic ti lequil ach' c'op ta atojolique, xchi'uc ta xalic ti laj avich'uncutic ta muq'ue. Ta xalic xtoc ti laj xa avictaic comel ta yich'el ta muc' ti c'usitic meltsanbil ta c'abale yo' jech laj xa avac' abaic ta tunel yu'un ti bats'i cuxul Diose.

¹⁰Ta xalic xtoc ti amalaojic ta xcha'sut talel ta vinajel ti Jesuse, ti ja' Xnich'on Diose, ti Buch'u cha'cuxesat yu'un ti Diose, ti Jpojvanej cu'untic yo' mu xquich'tic ti tsots tsitsel ti ta to xtale.