Read Tzotzil 1 Tesalonicenses 2 Bible Online

1 Tesalonicenses 2 - Tzotzil bible

1 Tesalonicenses 2

¹Ti jech co'ol jchi'il jbatique, xana'ic lec atuquic ti mu ta jeche'uc no'ox li'aycutic ta atojolic.

²Manchuc mi quich'ojcutic talel jvocolcutic ta ilbajinel ta jteclum Filipose, xana'ic lec ti ja' laj scoltauncutic ti Diose, yu'un laj yac'bun quipcutic ta yalbeloxuc ava'iic ti lequil ach' c'ope manchuc mi ep ti contrainele.

³Yu'un jna'cutic lec ti mu'yuc ch'ayemuncutic ta be ti c'usi laj calcutic ava'iique, mi ja'uc laj jc'oponoxuc ta xchopolal co'ntoncutic, mi ja'uc oy ta co'ntoncutic ta jlo'laoxuc.

⁴Yu'un ti Diose lec laj yiluncutic, laj yac' jbaincutic ta yalbel sc'oplal ti colebal lequil ach' c'ope, co'ol jech c'u cha'al laj calcutic ava'iique. Yu'un ma'uc laj jc'ancutic ti lecuc xi'ilatcutic yu'un ti jnaclejetic ta banomile. Ja' laj jc'ancutic ti lec xi'ilatcutic yu'un ti Diose, ti ja' yiloj ti co'ntoncutique.

⁵Xana'ic lec ti mu yu'unuc jun xa yutsil ti que jti'cutic laj jpas jbacutic ta atojolique, ti xtal no'ox ta jolcutic ta yalel c'usi c'opetic yo' ta jloq'uescutic ti ataq'uinique. Ja' rextico stuc ti Diose.

⁶Yu'un xi s'elan laj jpas jbacutic ti ma'uc laj jsa'cutic ti ich'biluncutic xa ta muc' yu'un junuque: mi ja'uc ti vo'oxuque, mi ja'uc ti yane. Xu' nan ta xcac'cutic avocolic ta yac'beluncutic ti c'usi ta xtun cu'uncutic jechuque, ti jech tacbiluncutic yu'un ti Cristoe. Ja'uc le'e, mu jechuc laj jpascutic.

⁷Yu'un ja' no'ox laj jc'uxubinoxuc jech c'u cha'al ti me'il ta sts'itesel ta xc'uxubinel ti yalabe.

⁸Ti jech toj ech'em c'uxoxuc ta co'ntoncutique, ma'uc no'ox laj calcutic ava'iic ti sc'op Diose, yu'un laj jip laj jten ti jcuxlejcutic ta aventaic yo' lec oyoxuque, yu'un mu tuch'bajoxuc ta co'ntoncutic.

⁹Ti co'ol jchi'il jbatique, xana'ic lec ti laj jpascutic tsatsal ta abtel yo' jech ta jta ti jve'elcutic ti jech li' cuxuluncutique. Yu'un c'ac'al ac'ubal li'abtejcutic yo' jech mu'yuc buch'u junucal avu'unic ta xisbainuncutic c'alal laj calcutic ava'iic ti sc'op Diose.

¹⁰Vo'oxuc rexticooxuc, rextico xtoc ti Diose ti laj jtuc'ulan jbacutic lec ta atojolic ti vo'oxuc jch'unolajeloxuque yo' jech mu'yuc buch'u xisa'bun ti jmulcutique.

¹¹Xana'ic lec xtoc ti laj jtsatsubtas laj jmuq'uibtas ti avo'ntonique jech c'u cha'al ta spas ti totil ta stojol ti xnich'nabe.

¹²Yu'un ic'biloxuc ochel yu'un Dios ti bu ta xventainvane xchi'uc ta yich'bel ti slequil yutsilale. Jech o xal laj jc'ubanboxuc ti jechuc me xapasic jech c'u cha'al ti buch'utic ja' yu'untaque.

¹³Ti jech taj une, mu xquicta jbacutic ta yalbel vocol ti Diose, yu'un c'alal laj ava'iic ti sc'op Diose, ma'uc naca no'ox sc'op viniquetic laj ava'iic, ja' sc'op Dios laj ava'iic. Melel, ja' ono'ox sc'op Dios abtej ta atojolic ti c'ot ta avo'ntonic ta xch'unele.

¹⁴C'alal laj avich'ic ilbajinel yu'un ti avinquilelique, Jchi'iltac, jech c'ot ta atojolic jech c'u cha'al ti buch'utic c'otemic ta yu'untac Dios ti oyic ta Judeae, ti ja' yu'untac ti Cristo Jesuse, yu'un laj yich'ic ilbajinel ec yu'un ti xchi'iltac ja' ti israeletique.

¹⁵Ti israeletique ja'ic laj smilic ti Cajvaltic Jesuse, xchi'uc laj smilbeic ti yaj'alc'optaque, xchi'uc laj snutsuncutic loq'uel ec. Mu lecuc x'ileic yu'un ti Diose. Yu'un scontrainojic scotol ti jnaclejetic ta banomile.

¹⁶C'alal ta jc'an xcalbecutic ya'iic sc'op Dios ti jyanlumetic yo' jech ta sta ti scolelique, jech ti israeletique mu xac' xcalcutic. Ti jech taje, yacal xa ta toyel ti smulique. Ti muc'ul tsitsel yu'un ti Diose oy xa ta stojolic avi tana le' une.

¹⁷Manchuc mi oy bu laj jch'ac jbatic c'uc sjaliluc ti mu'yuc xquilbe jba satique, Jchi'iltac, oyoxuc ono'ox ta co'ntoncutic ta jc'an xtal jq'ueloxuc ca'icutic.

¹⁸Jech co'ntoncutic ti ta xtal jq'uelotcutique. Yu'un ti vu'un Pabloune ep ta velta ti jech laj cac' persae. Ja'uc ti c'alal jech ta jnop ti jujucoje, laj smacuncutic ta be ti pucuje

¹⁹¿C'usi ti spatobil co'ntoncutic un cha'e, ti smuyubajel ti co'ntoncutique, ti matanal ti ximuyubaj ta xquich'cutique? Ja' ti vo'oxuc c'alal ta xcha'sut talel ti Jesucristoe.

²⁰Melel, ti vo'oxuque ja' ti spatobil co'ntoncutique xchi'uc ti smuyubajel co'ntoncutique.