Read Tzotzil Josué 10 Bible Online

Josué 10 - Tzotzil bible

Josué 10

¹Ti Adonisédec ti ja' ajvalil yu'un ti jteclum Jerusalene laj ya'ibe sc'oplal ti Josué ti laj xa yu'nin ti jteclum Haie, ti sts'ijlajan laj yicta comele, ti laj smilbe xtoc ti ajvalil yu'une jech c'u cha'al laj spas ta Jericó xchi'uc ti ajvalil yu'une. Laj ya'ibe xtoc sc'oplal ti jnaclejetic ta Gabaón ti laj xa spas trate xchi'uc ti israeletic ti oyic xa ta stojolique.

²Ti jech taj une, ep lic xi'uc ta j'ech'el. Yu'un ti jteclum Gabaone, muc' ta lum ta j'ech'el ti tsots sc'oplal c'oteme, ti ja' mu sta ti jteclum Haie, xchi'uc naca tsatsaquil viniquetic ti jnaclejetic yu'une.

³Ti jech taj une, ti Adonisedeque laj stac batel mantal ta stojol ti Hoham ajvalil yu'un ti Hebrone, ti Piram ajvalil yu'un ti Jarmute, ti Jafía ajvalil yu'un ti Laquise, xchi'uc ti Debir ajvalil yu'un ti Eglone, ti xi laj yalbe ya'iique:

⁴“La'ic li'e, la' coltaun ta stsaquel ta leto ti jteclum Gabaone. Yu'un laj xa sco'oltas sjolic xchi'uc ti Josuee, xchi'uc ti israeletique.”

⁵Ti vo'ob ajvaliletic yu'un ti amorreoetic xcaltic une, ja' ti ajvalil yu'un ti Jerusalene, ti Hebrone, ti Jarmute, ti Laquise, xchi'uc ti Eglone, laj stsob sbaic. Xvoletic batel xchi'uc svinic yo' ta xc'ot slaman sbaic ta sts'el jteclum Gabaón yo' jech ta stsaquic ta leto.

⁶Ja'uc ti ta sventaic ti buch'utic nacalic ta Gabaone, xi s'elan laj staquic batel mantal ta stojol ti Josué ti lamalic ta Gilgale: “Mu xajalta aba ta scoltael ta spojel ti avajtuneltaque. La' ta ora ta jpojel jcoltaelcutic. Yu'un scotol ti ajvalil amorreoetic ti oyic ta vitstique, laj xa svol sbaic yo' ta xistsacuncutic ta leto.”

⁷Va'i un, ti Josuee loc' batel ta Gilgal xchi'uc scotol ti svinictac ti mu sna' xi'ique.

⁸Xi albat yu'un ti Diose: “Mu xaxi' yu'unic. Ta xcac'bot ta avoc ta ac'ob. Yu'un mi ja'uc junuc ti xyolet no'ox ta stsacot ta letoe.”

⁹Loc' batel ti Josué ta Gilgal une. Ta ac'ubaltic xlametic batel ti ch'ayal yo'ntonic c'ot stsac ta leto ti amorreoetique.

¹⁰C'ot ta pasel yu'un Dios ti sibtasatic ta j'ech'el ti amorreoetic yu'un ti israeletique, ti mu no'ox albajuc yepal milvan ti Josué ta Gabaone. Laj taj une, snutsoj batel jlom ta sbelel Bet-horón. Xquechet no'ox laj smilan ech'el ti amorreoetic ti c'ot ta Azeca xchi'uc ta Maquedae.

¹¹C'alal palch'ujic xa yalel ti amorreoetic ta stselej yu'un Bet-horón ta jatvil yu'un ti israeletique, ta jech to yepal, ti Diose tal yu'un muc'tiquil bot ti ja' yepal to laj smilan ti amorreoetique, ti ja' mu sta yepal ti lajic ta espada yu'un ti israeletique.

¹²C'alal ac'batic xa ta yoc ta sc'obic yu'un Dios amorreoetic ti israeletique, ti Josuee xi laj sc'opon ti Dios ta sba ta sat ti jteclume: “C'ac'al, ti ta stuq'uil Gabaone, pajeso to aba ta xanobal. U, ti ta stuq'uil stenlej Ajalone, pajeso to aba ta xanobal.”

¹³Jech ti c'ac'ale, xchi'uc ti ue lic spajes sbaic ta xanobal ja' to ti c'uxi tsal yu'unic yajcontraic ti jteclume. Taje, ja' jech ta xal Libro yu'un ti Justo sbie. Ti c'ac'ale, ta o'lol vinajel lic spajes sba ta xanobal. Yu'un jutucuc mu sjunuluc c'ac'al, mu'yuc xch'ay batel ti c'ac'ale.

¹⁴Taje, mi ja'uc oy bu c'otem ta pasel ta vo'nee. Mi ja'uc ta to xc'ot ta pasel yan velta ti jech c'ac'al ti laj ya'ibe sc'opojel jun vinic ti Diose. Yu'un ti Diose letovaj ta spojel ti israeletique.

¹⁵Ts'acal to un, ti Josuee xchi'uc ti israeletique sutic batel ti bu lamalic ta naclej ta Gilgale.

¹⁶Ja'uc ti vo'ob ajvaliletique jatavic batel, bat snac' sbaic ta jun nail ch'en ti oy ta Maquedae.

¹⁷Ta ts'acal to un, vinaj ti nac'alic ti ta nail ch'en taje. Va'i un, laj yalbeic ya'i ti Josuee.

¹⁸Va'i un, ti Josuee xi s'elan xcholet lic yal ti mantale: “Balalinic ech'el tonetic c'alal to sti' ti ch'ene, maquic lec, aq'uic jchabivanejetic ta sq'uelel ti ti' ch'ene.

¹⁹Ja'uc ti vo'oxuc une, mu li'uc no'ox xach'ayetique. Nablanic ech'el ta snutsel ta scontrainel ti comemic ta patile. Mu teyuc no'ox aq'uelojic ta sutic ech'el ta slumalic. Yu'un ti Ajvalil Dios avu'unique laj xa yac'boxuc ta avoc ta ac'obic.”

²⁰Ti Josuee xchi'uc ti israeletic ti laj xa stsutsesic ta j'ech'el ti amorreoetique, ep no'ox laj smilic ta j'ech'el. Ja'uc ti buch'u cuxul to comic ti amorreoetique, bat snac' sbaic ta slumalic.

²¹Ja'uc ti lum Israele mu'yuc c'usi laj snuptanic, lec sutic talel ta Maquedá ti bu lamalic ti yane xchi'uc ti bu oy ti Josuee. Mu'yuc xa junuc ti oy buch'u ta xchopol c'opoj, ti ta stoy ye sti' ta stojol ti israeletique.

²²Va'i un, ti Josuee xi laj yale: “Jamic ti sti' nail ch'ene, loq'uesic talel ti vo'ob ajvaliletique.”

²³Jech laj spasic ti israeletique. Laj sloq'uesic talel ta nail ch'en ti vo'ob ajvaliletique, ja' ti ajvalil yu'un ti Jerusalene, ti ajvalil yu'un ti Hebrone, ti ajvalil yu'un ti Jarmute, ti ajvalil yu'un ti Laquise, xchi'uc ti ajvalil yu'un ti Eglone.

²⁴C'alal laj yiq'uic talel ta stojol ti Josuee, lic stsob talel scotol ti israel viniquetic ti xi laj yalbe ti banquilal jtsobvanej tey xchi'inojique: “La' pech'beic ta teq'uel snuc' ti ajvaliletic li'e.” Ja' jech laj spasic.

²⁵Va'i un, xi albatic yu'un ti Josuee: “Mi ja'uc xaxi'ic yu'un. Mu xatsiq'ues avo'ntonic yu'un. Ja'uc le'e, c'ajomaluc no'ox tsotsanic. Oyuc lec yip avo'ntonic. Yu'un ja' ono'ox jech ta spas ti Dios ta stojol scotol ti avajcontraique.”

²⁶Ts'acal to ti Josuee laj sliques smilel ti ajvaliletique. Laj yal mantal ti ac'o yich' joc'anel ta te' ti jujunique, ti joc'olic o bat c'ac'ale.

²⁷C'alal ta xa xch'ay batel ti c'ac'ale, laj yal mantal ti Josuee ti syalesicuc ti jech joc'olic ta te'e, ti batuc yaq'uic ta nail ch'en ti bu nac'alic to oxe. Ts'acal to un, lic smaquic comel ta muc'tiquil ton sti' ti nail ch'ene, ti xvinaj to avi tana le'e.

²⁸Ta sc'ac'alil no'ox ti jech yorail taje, ti Josuee lic yu'ninic ti jteclum Maquedae. Laj slilin ta j'ech'el. Laj smil ta espada scotol ti buch'u tey nacalique. Mu ja'uc junuc ti cuxul laj yicta comele. Jech laj spasbe ti ajvalil yu'un ti Macedae jech c'u cha'al laj spasbe ti ajvalil yu'un ti Jericoe.

²⁹Ti bu taje, loc' batel ti Josué xchi'uc ti israeletique, c'otic ta jteclum Libna ti laj stsaquic ta letoe.

³⁰Ti jteclum taje, xchi'uc ti ajvalil yu'une, c'ot ta pasel yu'un Dios ti ac'batic ta yoc ta sc'obique, ti mu junuc ti oy buch'u cuxul com yu'une, ti jech c'ot ta stojol ti ajvalil yu'un Libna jech c'u cha'al laj spasbe ti ajvalil yu'un Jericoe.

³¹Laj taj une, ti Josuee xchi'uc ti israeletique loq'uic batel ti ta Libnae, lamal c'otic ta sts'el jteclum Laquis ti ta stsaquic ta letoe.

³²Ta xchibal c'ac'al un, ac'batic ta yoc ta sc'obic yu'un Dios ti jteclum Laquise. Ti israeletique laj smilic ta espada scotol ti jnaclejetique xchi'uc ti chon bolometique jech c'u cha'al laj spasic ta jteclum Libnae.

³³Ti Horam ti ja' ajvalil yu'un ti jteclum Gezere, loc' batel xchi'uc svinictac ta spojel ti jteclume Laquise. C'u stu un, tsalbil c'otic yu'un ti Josuee. Mi junuc ti cuxul laj yicta comele.

³⁴C'alal tsuts xa comel yu'unic ta j'ech'el ti jteclum Laquise, jech ti Josuee xchi'uc ti israeletique batic c'alal to jteclum Eglón, ti lamal c'otic ta stojole, ti ta stsaquic ta leto xtoque.

³⁵Ta yorail no'ox ti jech c'ac'al taje, laj yu'ninic ti jteclume. Laj smilic ta espada scotol ti jnaclejetic teye. Laj slilinic ta j'ech'el ti c'usitic x'ayane jech c'u cha'al laj spasbeic ti jteclum Laquise.

³⁶Loq'uic batel ta jteclum Eglón. Laj stam batel sbeic ta jteclum Hebrón ti laj stsaquic ta letoe.

³⁷C'alal laj yu'ninique, laj slilinic ta j'ech'el. Laj smilic ta espada ti ajvalile, scotol ti jnaclejetique, ti chon bolometique. Ti jteclumetic ti nopol nacalic ta spat xocone, jech laj spasbeic jech c'u cha'al laj spasbeic ti jteclum Eglone.

³⁸Ti bu taje, loq'uic batel ti Josuee xchi'uc ti israeletique. Laj stam batel sbeic ta jteclum Debir ti laj stsaquic ta letoe.

³⁹Va'i un, laj smilic ta espada ti ajvalil yu'une, xchi'uc ti jnaclejetic yu'un ti lumetic ti nopol oyique. Mi junuc jnaclejetic yu'un jteclum Debir ti cuxul laj scomtsanique. Yu'un laj stsutsesic ta j'ech'el scotolic jech c'u cha'al laj spasbeic ti jteclum Hebrone, ti jteclum Libnae, xchi'uc ti ajvaliletic yu'une.

⁴⁰Ti Josué une laj yu'ninan scotol lumetique. Laj tsal ti ajvaliletic ti nacalic ta vitstic ta Négueve, ta stenlejaltic, ta q'uixin osil. Scotol laj stubbe sts'unubal. Laj smil scotol. Mi juteb c'usi x'ayan com. Mi junuc oy buch'u cuxul com jech c'u cha'al laj yal mantal ti Ajvalil Dios yu'un ti israeletique.

⁴¹Yu'un ta j'ich' no'ox laj stsal ti ajvaliletique. Laj yu'ninbe scotol ti slumaltaque, ti lic ta Cades-barneae, ech' ta Gaza, xchi'uc scotol yosilal ti jteclum Gosene, ti c'ot c'alal to jteclum Gabaone.

⁴²Yu'un ti Ajvalile, ti ja' Dios yu'un ti israeletique, sva'anoj sba ta spasel leto ta spojel ti israeletique.

⁴³Ts'acal to un, ti Josuee sut batel xchi'uc scotol ti israeletic ti bu vololic ta naclej ta Gilgale.