Read Tzotzil Josué 11 Bible Online

Josué 11 - Tzotzil bible

Josué 11

¹Taje, laj ya'i scotol ti Jabín ti ja' ajvalil yu'un ti jteclum Hazore. Jech o xal un, laj stac batel mantal ta stojol ti ajvalil Jobab ta jteclum Madone, xchi'uc ta stojol ti ajvaliletic yu'un ti jteclum Simrone, xchi'uc ti jteclum Acsafe.

²Ma'uc no'ox taje, laj stac batel mantal ta stojol scotol ti ajvaliletic ti nacalic ta muc'tiquil vitstic ti oy ta yolon ti yolon xocon sloq'ueb c'ac'ale, xchi'uc ti ajvaliletic ti oy ta stenlejal yu'un ti uc'um Jordán ti oy ta yolon ti yac'ol xocon sloq'ueb c'ac'al ta nab Quinérete, xchi'uc ti ajvaliletic ti oy ta stenlejtic ti nopol xil ti jteclum Dor ti oy ta yeloval smaleb c'ac'ale.

³Ma'uc no'ox taje, laj stac batel mantal xtoc ta stojol ti cananeoetic ti nacalic ta yeloval sloq'ueb c'ac'ale, xchi'uc ti nacalic ta yeloval smaleb c'ac'ale, ti amorreoetique, ti hititaetique, ti ferezeoetique, ti jebuseoetic ti nacalic ta muc'tiquil vitstique, xchi'uc ti heveoetic ti oyic ta vits Hermon ti oy ta yosilal ti Mizpae. Scotol ti c'u yepal taje, laj yich'ic mantal yo' jech ta svol sc'opic xchi'uquic.

⁴Scotol ti ajvaliletic taje loq'uic batel xchi'uc yajsoldadoic ti mu no'ox albajuc yepal sca'ique, xchi'uc scarretaic sventa ac'ob-leto. Bats'i mu stac' atel ta j'ech'el ti soldadoetique, ti co'ol s'elan yepalic jech c'u cha'al ti yi' ti oy ta sti'il ti nabe.

⁵Scotolic laj sco'oltas sjolic. Laj scomon svol ti sc'opique. Bat slaman sbaic ta sts'el vo' Merom yo' ta stsaquic ta leto ti israeletique.

⁶Ja'uc ti Dios une xi laj yalbe ti Josuee: “Mu xaxi' yu'un. Ti oc'om jech c'u cha'al avi ora li'e, ta xc'ot ta pasel cu'un ti aviloj ta aba ta asatic ti scotolic ta xchamique. Ti vo'ot une ta xavabtelin ta sc'asbel yacantac ti sca'ique, xchi'uc ta stic'bel sc'ac'al ti scarretaic ti sventa ac'ob-letoe.”

⁷Va'i un, ti Josuee xchi'uc scotol ti j'ac'-letoetic yu'une, ch'ayal yo'ntonic bat stsaquic ta leto ti yajcontraic ta sts'el vo' Merome.

⁸Ti Diose laj yac'be stsal yajcontratac ti israeletique, ti xc'anobaj no'ox batel yu'unic ti letovajele, ti snutsojic batel c'alal to muc' ta jteclum Sidóne, xchi'uc ta jteclum Misrefot-maim, ti c'ot c'alal to stenlej Mizpa ti oy ta sloq'ueb c'ac'ale. Scotolic taje, mi junuc cuxul laj yictaic comel.

⁹Ti Josuee c'ot ta pasel yu'un ti c'u s'elan pase ta mantal yu'un ti Diose. Yu'un laj sc'asanbe yoctac sca'ic ti yajcontrae. Laj stic'be sc'ac'al ti scarretaetic sventa ti ac'ob-letoe.

¹⁰Ts'acal to un, sut batel ta yu'ninel ti jteclum Azore, ti ja' to ox banquilal tsobvanej yu'unic ta svolel ti sc'opique. Laj smilbe ti ajvalil yu'un ti jteclume.

¹¹Ma'uc no'ox taje, yu'un laj stsutsesic ta j'ech'el ti buch'u nacalique. Yu'un ta j'ech'el laj slilin. Laj stic'be sc'ac'al ti jteclume.

¹²Yu'un ja' ono'ox jech laj spasbe ti jteclumetic ti jun sc'opic xchi'uque, ti xi s'elan c'ot ta stojolique: laj yu'nin, laj smilbe ti ajvaliletic yu'une. Ta j'ech'el laj stsutses jech c'u cha'al yaloj mantal ti Moisés ti yajtunel Diose.

¹³Manchuc mi jech un, mi junuc ti jteclumetic ti oyic ta stselej ti laj stic'beic sc'ac'al ti israeletique, c'ajomal no'ox laj stic'beic sc'ac'al ti jteclum Azore.

¹⁴Laj smilic ta espada scotol ti jnaclejetic ta jteclum taje. Mi junuc ti cuxul laj yictaic comele. Laj yu'ninbeic ti chon bolometique, xchi'uc ti c'usitic x'ayan yu'unique.

¹⁵Ti Diose laj yalbe ya'i mantal ti Moisese. Ti Moisese laj yalbe ya'i ti Josuee, ti c'ot ta pasel yu'un scotole. Mu jtosuc ti laj yech'ta comele.

¹⁶Yu'un ti Josuee laj yu'nin scotol ti banomil taje, ti lec ta alele, ti yosilal vitstique, scotol yosilal ti Négueve, scotol ti sbanomil Gosene, ti stselejtique, ti stenlejtic yu'un ti Jordane, xchi'uc scotol ti vitstic stenlejaltic yosilal ti Israele.

¹⁷Laj yu'nin ti lic ta vits Halac ti muy batel ta Seire, ti c'ot c'alal to Baal-gad ti oy ta stenlejtic yu'un ti Líbanoe, ti oy ta yoc vits Hermone. Yu'un ti Josuee och ta yoc ta sc'ob ti ajvaliletique, ti laj smilan scotol ti ja' yu'unic ti jteclum taje

¹⁸ti c'alal ep c'ac'al jalij ta spasel leto ti Josuee, xchi'uc ti ajvaliletic taje.

¹⁹Jun xa no'ox ti jteclum laj sco'oltas yo'nton xchi'uc ti israeletique, c'ajomal xa ti heveoetic ti nacalic ta jteclum Gabaone. Scotol ti yane laj yich' tsatsal u'ninel ta jbel sc'oplal.

²⁰Yu'un pucujibtasbat yo'ntonic yu'un Dios ti yajcontraique, ti xu' xa yu'unic ta stsaquic ta c'op ti israeletique yo' jech mu'yuc syail xc'uxul o'ntonal ta stsutsesatic yu'un ti israeletique, co'ol jech c'u cha'al albil mantal yu'un Dios ti Moisese.

²¹Ti jech yorail taj xtoc une, ti Josuee laj yu'nin, laj stsutses ta j'ech'el scotol ti jteclumetic yu'un ti anaquitaetic ti nacalic ta vits Hebrone, ti ta Debire, ti ta Anabe, xchi'uc scotol ti oy ta vitsetic ta Judae, xchi'uc ti ta Israele.

²²Ta j'ech'el mi junuc com snitilultac ti inate' vinic ta sjunul yosilal ti Israele, Ti bu xa no'ox com snitilultac ti inate' vinic Anaque, ja' xa no'ox ti ta Gazae, ti ta Gate, xchi'uc ti ta Asdode.

²³Va'i un, c'ot me ta pasel ti laj yu'nin scotol banomil ti Josuee, ti jmoj c'ot ta pasel scotol jech c'u cha'al albil yu'un Dios ti Moisese. Laj taj une, lic xch'acanbe ta jujuvoc' snitilultac ti Israele yo' ta xc'ot ta xrextoic. Ti jech c'ot ta pasel taj une, ts'acal to un, lamaj ti c'op ta sbejel banomil ti bu taje.