Read Tzotzil Josué 13 Bible Online

Josué 13 - Tzotzil bible

Josué 13

¹C'alal mol xa ti Josuee, xi albat yu'un ti Diose: “Oy xa talel ajabilal, sc'an to ep u'ninel ti banomile.

²Yu'un sc'an to u'ninbel sbejel yosil ti filisteoetique, xchi'uc yosil ti gesureoetique,

³ti q'uiil batel ta ti' uc'um Sihor, ta yeloval sloq'ueb c'ac'al yu'un ti Egiptoe, ti ta xc'ot c'alal to sts'ac ti Ecrone, xchi'uc ti oy ta yolon ti yolon xocon sloq'ueb c'ac'ale ti c'otem ta yosilic ti cananeoetique. Tey oy xtoc vo'ob ajvalil filisteoetique ti nacalic ta jteclum Gazae, ti ta jteclum Asdode, ti ta jteclum Ascalone, ti ta jteclum Gate, xchi'uc ti ta jteclum Ecrone. Ta sc'an u'ninel xtoc yosilalic ti aveoetique.

⁴Ma'uc no'ox taje, oy to ti yosilal ta yolon ti yac'ol xocon sloq'ueb c'ac'ale, xchi'uc scotol yosilic ti cananeoetique, ti ta xlic ech'el ta jteclumetic yu'un ti sidonioetique ti ta xc'ot c'alal to Afeque, ti sts'aquinoj sba xchi'uc ti amorreoetique.

⁵Sc'an to xtoc yosilalic ti giblitaetique, xchi'uc scotol ti Líbanoe ti oy ta yeloval sloq'ueb c'ac'ale, ti ta xlic ech'el ta Baal-gade, ti oy ta yoc vits Hermone, c'alal to ochebal yu'un ti jteclum Hamate.

⁶Ti ta sba ta sat ti israeletique, ta jten loq'uel ti sidonioetique, xchi'uc scotol ti c'u yepal nacalic ta muc'tic vitstique, c'alal to ta Líbano ti ta xbat c'alal to Misrefot-maime. Ta xabain ta xch'aquel ti banomil taje yo' ta xavac'be yosilinic ti israeletique jech c'u cha'al calojbot ti mantale.

⁷Ta xabain ta xch'aquel ti banomil taje, ta balunvoc' nitiluletic xchi'uc ti o'lol jvoc' snitilultac ti Manasese.”

⁸C'alal ch'acbat yosilic yu'un Moisés snitilultac ti Rubene, ti Gade, xchi'uc ti o'lol jvoc' ti ja' snitilul ti Manasese, ja' ac'batic ti banomil ti oy ta yeloval sloq'ueb c'ac'al yu'un ti Jordane.

⁹Yu'un ja' laj yich'ic scotol ti banomil ti ta xlic ta Aroere, ti oy ta sti'il uc'um Arnone, xchi'uc ti jteclumetic ti oy ta o'lol stenleje, xchi'uc scotol ti stenlej jol vits yu'un ti Medebae, ti c'ot c'alal to ta Dibone.

¹⁰Laj yich'beic xtoc steclumaltac ti Sehón ti ja' ajvalil yu'un ti amorreoetic ta Hesbone, ti c'ot c'alal sts'ac ti amonitaetique.

¹¹Laj yich'beic xtoc yosilal ti Galaade, xchi'uc sbanomilic ti gesureoetique, xchi'uc xtoc ti maacateoetique, scotol ti vits Hermone, scotol yosil ti Basane, ti c'ot c'alal to ta Salcae.

¹²Laj stsobbe xtoc ti c'u yepal smacoj ti Og ti ajvalil yu'un ti Basane, ti sventainoj ti Astarote xchi'uc ti Edreie, ti ja' slajeb sts'unubal ti refaítaetique, ti tsalatic nutsatic loq'uel yu'un ti Moisese.

¹³Ti jnaclejetic ta Gesure xchi'uc ti ta Maacae, mu'yuc xjipatic loq'uel. Yu'un c'ajomal no'ox lic xchi'in sbaic ta naclej xchi'uc ti israeletic jech c'u cha'al avi tana le'e.

¹⁴Ja'uc snitilultac ti Levie, mu'yuc x'ac'bat sbanomil yu'un ti Moisese. Yu'un ti stuquique ja' c'otem ta xrextoic ti smoton Dios ti ta xich' chiq'uel sventa yich'obil ta muc' ti Ajvalil Dios yu'un ti Israele, yu'un jech o no'ox yaloj ti stuque.

¹⁵Ti Moises une laj xch'ac ti banomil ta stojol ti jvoc' snitilultac ti Rubene, ja' ti c'u yepalic ti jujuchope.

¹⁶Ja' yu'un un, ti bu c'alal xjoybij talel ti sts'aquil yosilique, lic batel ta Areor ti oy ta sti'il uc'um Arnone, ti ech' ta jteclum ti oy ta o'lol stenleje, ti ech' ta stenlej jol vits ti oy ta Medebae.

¹⁷Va'i un, xi s'elan lic ech'el ti ts'ac ti c'ot c'alal to Hesbone, xchi'uc scotol ti jteclumetic ti oy ta stenlej jol vitse: ti Dibone, ti Bamot-baale, ti Bet-baal-meone, ti Jahase, ti Cademote, ti Mefáate, ti Quiriataime, ti Sibmae, ti Zaret-sahar ti oy ta yoc stenleje. ti Bet-peore, ti Bet-jesimot ti oy ta yelovaltic yu'un ti vits Pisgae.

²¹Ti lec xcaltique, ja' ti jteclumetic ti oy ta stenlej jol vitse, xchi'uc scotol ti c'u yepal smacoj ti Sehón ti ja' ajvalil yu'un ti amorreoetic ta Hesbone. Yu'un ti Moisese, ti c'alal laj stsal ti Sehone, xi tsalatic ec ti banquilaletic yu'un ti Madián ti ja' yajtuneltaque: ti Evie, ti Requeme, ti Zure, ti Hure, xchi'uc ti Rebae.

²²Ma'uc no'ox taje, ti israeletique laj smilic ti jt'unvanej Balaam xnich'on ti Beore, xchi'uc yepal to laj smilic ti yane.

²³Ti sjamlej yosilic jvoc' snitilultac ti Rubén ti laj yich' ch'acbel ti c'u yepal ta jujuchope, c'ot c'alal to ta uc'um Jordán. Ja' stsacbil ta venta xtoc scotol ti jteclumetic teye.

²⁴Ja' jech xtoc snitilultac ti Gade, ch'acbat yosilic yu'un ti Moisese, ja' ti c'u yepal ti jujuchop nitiluletique.

²⁵Ja' c'ot ta sventaic ti jteclum Jazere, xchi'uc scotol ti jteclumetic ti oy ta Galaade, xchi'uc o'lol jxet' yosilic ti amonitaetic ti c'ot c'alal to ta jteclum Aroer ti oy ta yeloval jteclum Rabae.

²⁶Laj yich'ic xtoc ti osil ti oy ta o'lol yu'un ti Hesbone, ti Ramat-mizpae, ti Betonime, xchi'uc ti osil ti oy ta o'lol yu'un ti Mahanaime, xchi'uc ti bu x'ech' sts'aquil yosilal ti jteclum Debire.

²⁷C'ot ta yu'unic xtoc ti jteclumetic ti lamal ta stenlejale, ti Bet-arame, ti Bet-nimrae, ti Sucote, ti Zafone, ti ja' slajeb xa sbainel ta sventainel yu'un ti Sehón ti ja' ajvalil yu'un ti Hesbone. Ja' yu'un un, sjamlej ti yosilique, ta xlic batel ta stuq'uil sloq'ueb c'ac'al yu'un ti Jordane, ti c'ot c'alal to ta yolon ti yac'ol xocon smaleb c'ac'al ti oy ta nab Quinérete.

²⁸Scotol ti jteclumetic taje, xchi'uc ti c'u yepal joyol ta spat ta xocone, laj yich'ic snitilultac ti Gade, ja' ti c'u yepalic yu'un ti jujuchope.

²⁹Ja' jech xtoc ti Moisese laj xch'acbe yosil ti o'lol jvoc' ti ja' snitilultac ti Manasese.

³⁰Yu'un ja' c'ot ta sventaic ta yu'ninel scotol ti bu sventainoj to ox ti Og ti ja' ajvalil yu'un ti Basane. Ti lec xcaltique, ja' scotol ti jteclum Basane, ti lic batel ta Mahanaime, xchi'uc ti oxvinic (60) ta chop bic'tal lum ti sbainoj to ox ti Jaire.

³¹Laj yu'ninic xtoc o'lol jxet' yosil ti Galaade, xchi'uc ti jteclum Astarote, xchi'uc ti jteclum Edrei. Scotol taje, ja' laj yich' ti o'lol jvoc' snitilultac ti Maquire xnich'on ti Manasese, ja' ti c'u yepalic ta jujuchope.

³²Ja' jech yepal sbanomilic ac'bat xrextoinic yu'un Moisés ta stenlej Moab ti oy ta stuq'uil sloq'ueb c'ac'al yu'un ti uc'um Jordane, ti oy ta yeloval ti Jericoe.

³³Ja'uc snitilultac ti Levie, mu'yuc x'ac'bat xrexto osilic. Yu'un c'ajomal no'ox xi albatique: “Ti c'usi albil sc'oplal ti ta xc'ot ta yu'un ti Ajvalil Dios yu'un ti Israele, ja' arextoic.”