Read Tzotzil Josué 16 Bible Online

Josué 16 - Tzotzil bible

Josué 16

¹Ti bu c'ot yorail yu'unic ti laj yich' yosilic snitilultac ti Josee, lic batel ta yeloval sloq'ueb c'ac'al ti oy ta uc'um Jordane, ta yac'ol sat vo'etic yu'un ti Jericoe. Ta stam ech'el ti c'ot c'alal to sbajtical banomile. Ta stam ech'el ti c'u sjamlej ti muc'tiquil vitsetic ti ta xc'ot ta Jericoe, xchi'uc ti ta Betele.

²Ta xlic ech'el ta Betel ti ja' Luz ti yan sbi xtoque. Ta x'ech' batel ta sts'ac yosilic ti arquitaetique, ti c'ot c'alal to Atarote.

³Ts'acal to un, jelav ech'el ta stuq'uil smaleb c'ac'al ta sts'aquil yosilic ti jafletitaetique, ja' to ti c'ot c'alal ta sts'ac yosil Bet-horón ti oy ta olone, ti c'ot ta Gezere. Ti bu taj une, c'ot ta loq'uel c'alal to ta muc' ta nab Mediterráneo.

⁴Ti bu laj yich'ic ti c'ot ta rexto osilic ti snitilultac ti Manasese xchi'uc ti Efraine, ti ja' snitilultac ti Josee, xi s'elan jech c'u cha'al li'e:

⁵Ti bu lic sts'aquil yosilic ti jvoc' ta jujuchop snitilultac ti Efraine, lic batel ta yeloval sloq'ueb c'ac'al ti ta x'ech' ta Atarot-adare, ti c'ot c'alal to Bet-horón ti oy ta ac'ole.

⁶Ti bu taje, lic stam batel ti c'ot c'alal to nab Mediterráneoe. Ti sts'aquil yosilic ti oy ta yolon ti yolon xocon sloq'ueb c'ac'ale, ja' ti Micmetate. Ti bu taje, laj stam batel ta stuq'uil sloq'ueb c'ac'al, ti c'ot c'alal to Taanat-siloe, ti laj stam ech'el xtoc ti c'ot ta Janóahe.

⁷Ti bu taje, laj stam yalel ta Atarot, ta Naará, ti c'ot snup sba xchi'uc ti Jericoe, ti c'ot c'alal to ta uc'um Jordane.

⁸Ti ts'ac ti lic ta Tapuae, laj stam ech'el ta stuq'uil smaleb c'ac'al, ti c'ot c'alal to ta uc'um Canae, xchi'uc ti muc' ta nab Mediterráneoe. Ja' jech sjamlej ti banomil taje ti laj yich'ic snitilultac ti Efraine, ti laj yich'ic ch'acbel yu'un ti jujuchope.

⁹Ti bu laj yich'ic yosilic snitilultac ti Manasese, oy jteclumetic xchi'uc bic'tal lumetic ti laj yich' snitilultac ti Efraine.

¹⁰¡C'u stu un! ti snitilultac ti Efraine mu'yuc laj sjipic loq'uel ti cananeoetic ti nacalic ta Guezere. Lec no'ox laj ya'iic ti xchi'inojic ta nacleje ac'o mi ta sujic ta stojel patanil. Avi tana le' une, tey nacal o yu'unic.