Read Tzotzil Josué 18 Bible Online

Josué 18 - Tzotzil bible

Josué 18

¹Scotol ti c'u yepal svoloj sbaic ti israeletique, laj stsob sbaic ta Silo yo' ta sva'anic ti Axibalna ti bu nupel ta be yu'un ti Dios ti bu taje. Yu'un cuchem xa ox yu'unic yu'ninel ti banomile.

²Ja' no'ox un, oy to vucvoc' snitilultac israeletic ti mu'yuc to ac'bilic ti xrexto banomilique.

³Va'i un, ti Josuee xi laj yalbe ti israeletique: “¿C'usi xa ta xamalaic ta yu'ninel ti banomil ti ac'biloxuc xa yu'un ti Ajvalil Dios yu'unic ti amolmuc'totique?

⁴T'ujic oxvo'uc viniquetic ta jujuvoc' nitiluletic yo' jech ta jtac batel ta xaniel ti c'u sjamlej ti banomile, yo' jech ta xalbeicun ca'i c'u s'elan ta xlic yich' tuch'el.

⁵Ti viniquetic taje, tsots sc'oplal ta spasic ta vuc-ch'ac ti c'u sjamlej ti banomil oye, ti ta xictabeic comel yosil ti Judá ta stuq'uil yolon ti yac'ol xocon sloq'ueb c'ac'ale, ta xictabeic comel yosil snitilultac ti José ta stuq'uil yolon ti yolon xocon sloq'ueb c'ac'ale.

⁶Ts'acal to un, c'alal mi laj xa xch'aquic ta vuc-ch'ac ti osile, ac'o tal yac'beicun quil senyail ti c'u s'elan laj xtuch'ique. Va'i un, ta xlic jq'uel ti yorail ta sba ta sat ti Ajvalil Dios cu'untique.

⁷Ja'uc ti levitaetic une, mu'yuc ta xich' sparteic. Yu'un c'ajomal no'ox xrextoic ti ta xc'otic ta paleal yu'un ti Diose. Ja'uc ti snitilultac ti Gade, ti Rubene, xchi'uc o'lol jvoc' ti ja' snitilultac ti Manasese, yich'oj xa yosilic ti oy ta stuq'uil sloq'ueb c'ac'al yu'un ti uc'um Jordane, ti ja' ac'batic yu'un ti Moisés ti yajtunel ti Diose.”

⁸Ti buch'utic ta xbatic ta xchapanel ti c'u s'elan ta xich' tuch'el ti banomile, xi albatic yu'un ti Josuee ti c'alal ta xa xloq'uic batele: “Ba q'uelic ti c'u sjamlej oy ti banomile. Tuch'ic comel. Xasutic talel c'alal mi laj avo'ntonique yo' jech ta jq'uel yorailic ta sba sat ti Dios ti li' ta Siloe.”

⁹Ti viniquetic taje batic ta xaniel ti c'u sjamlej ti banomile. Laj spasic ta vuc-ch'ac ti jteclumetic yu'une. Laj stsaquic lec ta vun scotol. Ts'acal to un, sutic talel ta Silo ti bu lamalic ta nacleje, bu nacal ti Josué eque.

¹⁰C'alal oy ta Siloe, ti Josuee, ta sba ta sat ti Diose, lic xch'acbe yosilic ti bu c'ot yorail yu'unic ti israeletic ti c'u sjamlej bu ech'em sts'aquil ti banomile.

¹¹C'alal q'uelbat xa yorail ti bu ta xc'otic snitilultac ti Benjamine, laj yich'ic ti banomil ti oy ta o'lol yu'un yosilic snitilultac ti Judae, xchi'uc yosilic snitilultac ti Josee.

¹²Ti sts'aquil ti banomil taje, ta xlic ta yolon ti yolon xocon sloq'ueb c'ac'al ti oy ta uc'um Jordane, ti laj stam ech'el ta stuq'uil yolon ti yolon xocon sloq'ueb c'ac'al yu'un ti Jericoe, ti laj stam ech'el ta yosilal muc'tiquil vitstic ti oy ta yeloval smaleb c'ac'ale, ti vul ta loq'uel ta sbajtical banomil yu'un Bet-avene.

¹³Ti bu taje, laj stam ech'el ti c'ot ta Luz (ti Betel xcaltique) ta stuq'uil yolon ti yac'ol xocon sloq'ueb c'ac'ale, ti yal ech'el ta Atarot-adar ti ta vits ti oy ta yolon ti yac'ol xocon sloq'ueb c'ac'al yu'un ti Bet-horón ti oy ta olone.

¹⁴Ts'acal to un, joybij sutel tal ti sts'aquil ta stuq'uil muc' ta nab Mediterráneoe, ti ech' ta o'lol xch'ut vits ti oy ta yolon ti yac'ol xocon sloq'ueb c'ac'al ta yeloval ti Bet-horone, ti c'ot c'alal to Quiriat-baale, ti sbiinoj xtoc Quiriat-jearime, ti bu xa c'otem yosil snitilultac ti Judae. Taje, ja' me ti ts'ac ti oy ta stuq'uil smaleb c'ac'ale.

¹⁵Ti ts'ac ti oy ta yolon ti yac'ol xocon sloq'ueb c'ac'ale, ta xlic ta Quiriat-jearim, laj stam ech'el ta stuq'uil smaleb c'ac'ale, ti c'ot c'alal to sat vo' Neftoae.

¹⁶Va'i xtoc un, yal ech'el ta xocon vits ti oy ta yeloval stenlej yu'un ti Ben-hinome, ta stenlej yu'un Refaim ti oy ta yolon ti yolon xocon sloq'ueb c'ac'ale. Ts'acal to un, yal ech'el ta stenlejal yu'un Hinom, ti ech' batel ta stuq'uil yolon ti yac'ol xocon sloq'ueb c'ac'al ti oy ta o'lol vits yu'un ti Jebuse. Laj stam ech'el, ti c'ot ta sat vo' yu'un ti En-rogele.

¹⁷Ts'acal to xtoc un, sut batel ta yolon ti yolon xocon sloq'ueb c'ac'ale, ti c'ot ta loq'uel ta En-semese. Laj stam ech'el c'alal to Gelilot ti oy ta stselej yu'un ti Adumine. Va'i un, yal ech'el ta lican ch'entic yu'un ti Bohan Ben-rubene.

¹⁸Tey ech' batel xtoc ta stuq'uil yolon ti yolon xocon sloq'ueb c'ac'al yu'un ti stselej ti oy ta yeloval ti Jordane, ti yal ech'el c'alal to ta uc'um Jordane,

¹⁹ti ech' ta stuq'uil ta yolon ti yolon xocon sloq'ueb c'ac'al yu'un ti Bet-hoglae, yo' xc'ot ta tsutsel ta xoj-xojil Sts'ijlajan Nab ti oy ta yolon ti yolon xocon sloq'ueb c'ac'al ti bu xc'ot ta ch'ayel yoc ti uc'um Jordane. Taje, ja' me ti sts'aquil ti oy ta yolon ti yac'ol xocon sloq'ueb c'ac'ale.

²⁰Ti ts'ac ti oy ta sloq'ueb c'ac'ale, ja' ti uc'um Jordane. Taje, ja' me ti ts'aquetic ti bu laj yich'ic ch'acbel snitilultac ti Benjamine.

²¹Ti jteclumetic ti laj yich'ic ta jujuchop yu'un ti jvoc' snitilultac ti Benjamine, xi s'elan jech c'u cha'al li'e: ti Jericoe, ti Bet-hoglae, ti Emec-quesise, ti Bet-arabae, ti Semaraime, ti Betele, ti Avime, ti Parae, ti Ofrae, ti Quefar-haamonie, ti Ofnie, xchi'uc ti Gebae. Ja' lajcheb (12) jteclumetic xchi'uc ti c'u yepal joyolic ta spat ta xocontaque.

²⁵Laj yu'ninic xtoc ti Gabaone, ti Ramae, ti Beerote, ti Mizpae, ti Cafirae, ti Mozahe, ti Requeme, ti Irpeele, ti Taralae, ti Zelae, ti Élefe, ti Jebuse (ti Jerusalén xcaltique), ti Gabaae, xchi'uc ti Quiriate. Ja' chanlajuneb (14) jteclumetic xchi'uc ti bic'tal lumetic ti joyol ta spat ta xocontaque. Taje, ja' me ti sbanomilic laj yich'ic ta jujuchop yu'un ti jvoc' snitilultac ti Benjamine.