Read Tzotzil Josué 2 Bible Online

Josué 2 - Tzotzil bible

Josué 2

¹Ta Sitim to, ti Josuee ta mucul laj stac batel cha'vo' jpa'ivanej jq'uel-osil viniquetic ti xi laj yalbe batele: “Batanic ta xchajel ta q'uelel yosilal ti jteclum Jericoe.” Ti stuquique batic, c'otic ta sna jun ants ti sna' sbolomalin sba ti Rahab sbi ti nacal ta Jericoe. Laj xch'amunbeic sna yo' ta x'ech' yu'unic ti ac'ubale.

²Ja'uc le' une, oy buch'u xi bat yalbe ya'i ti ajvalil yu'un ti Jericoe: —Talemic jun chib israeletic ta xchajel ta q'uelel osil ti ac'ubal li'e.

³Va'i un, ti ajvalile laj stac batel mantal ti xi bat yalbeic ya'i ti Rahabe: —Ti viniquetic li' oy ta yut na avu'une, ac'o loq'uicuc talel, yu'un ja' jpa'ivanej talemic.

⁴Ja'uc ti stuc une lic snac'. Jech o xal xi laj yale: —Melel ava'uc quic ay svu'lanun viniquetic. Ja' no'ox un, mu jna' ti bu liquelic talele.

⁵Yu'un ja' o loq'uic batel ti c'alal ta xa x'och talel ti ac'ubale, ja' ti yorail xa ta xich' maquel ti sti' smocal ti jteclume. Mu'yuc xquil c'uxi batic. Yan ti mi ta xaloq'uic batel ta anil ta slubiel ta bee, xu' to nan ta xataic.

⁶Ti stuc une yo'nton xa sna'. Yu'un muy batel yu'un ta xcha'cojal sjol sna ti nac'alic lec ta epal chucbiquil lino ti smuyesoj batel yo' ta xac' taquijuque.

⁷Svinictac ti ajvalil une st'unojic batel ta snutsel ta stuq'uil uc'um Jordán, ti c'otic c'alal to slomleje. Ti jech loq'uic batel ta anil ti soldadoetique, ta jech no'ox yepal ta anil laj smaquic sti' smocal ti jteclume.

⁸Va'i un, ti Rahabe muy batel ta xcha'cojal sjol sna ti c'alal mu to ta xvayic ti jpa'ivanej jq'uel-osiletique, ti xi laj yalbe ya'iique:

⁹—Ca'binoj lec, ti Diose yac'ojboxuc xa ti banomil li'e. Yu'un c'ot xa ta pasel ti ja' stuc ta xac' ep xi'el ta co'ntoncutique. Yu'un scotol ti c'u yepal nacalic li'e, batem xa xch'ulelic ta xi'el avu'unic.

¹⁰Jna'cutic lec ti c'alal laloq'uic talel ta Egiptoe, ti Diose laj staquijesbe ya'lel ti Tsajal Nabe yo' jech ta xajelavic. Jna'cutic lec xtoc ti laj atsutsesic ta j'ech'el ti Sehone, xchi'uc ti Oge, ja' ti chib ajvalil yu'un ti amorreoetic ti oy ta jot uc'um Jordane.

¹¹Ti c'alal ta xca'icutic ac'oplalic ti mu'yuc buch'u xu' xastsaloxuc ta letoe, toj ech'em ta xixi'cutic avu'unic. Yu'un ti Ajvalil ti ja' Dios avu'unique, yu'un ja' ono'ox Dios yu'un ti vinajele, ti banomile.

¹²Jech o xal un, avocolicuc, va'ano abaic ta yalbelun avi li'e, xchi'uc ta sba ta sat ti Diose, ti c'uxubinicun xchi'uc ti cuts' calaltac jech c'u cha'al laj jc'uxubinoxuque. Ac'bun quil ec un ti yutsilal slequilal avo'ntonique.

¹³Avocoluc to me un ti pojuc avu'unic ti jtote, ti jme'e, ti jchi'iltac ta voq'uele, xchi'uc scotol ti c'u yepalic oye, yo' jech mu xac' ti sjol sbaquilique. ¡Yu'un chapal xa sc'oplal ta xichamcutic!

¹⁴Ti viniquetique xi laj staq'uique: —Ta jva'an jbacutic ta apojelic manchuc mi ta xcac' jol jbaquilcutic xchi'uc yo' jech mu'yuc c'usi xaval yu'un ti c'op taje. C'alal mi laj yac'buncutic Dios ti banomil li'e, ta yutsilal slequilal co'ntoncutic ta xajc'uxubincutic ta j'ech'el.

¹⁵Ti jech jmoj stsacoj sba xchi'uc smocal jteclum ti bu meltsajem sna ti Rahabe, laj sjoc'an jbej ch'ojon ta ventana yo' jech ta xyal ti viniquetic yu'une,

¹⁶ti xi laj yalbee: —Batanic ta vitstic yo' jech mu xastaic ta sa'el, yu'un loq'uemic ta sa'eloxuc. Nac'o abaic oxibuc c'ac'al ja' to mi sutic talel ta jteclum ti jsa'vanejetique. Ts'acal to un, xu' xatam batel abeic.

¹⁷Jech laj stac'beic ti stuquique: —Ti c'u s'elan laj ac'uban abae, ta xc'ot ta pasel cu'uncutic.

¹⁸C'alal mi li'ochcutic talel ta yu'ninel ti lume, ti tsajal ch'ojon li'e, ti ta xiyalcutic batel yu'une, tsots sc'oplal ta xajoc'an ta ventana. Tsobo talel ta ana ti atot ame'e, ti achi'iltac ta voq'uele, xchi'uc scotol ti yuts' yalaltac ti atote.

¹⁹Yan ti mi oy buch'u loc' batel ta ana une, sa'bil xa yu'un mi chame. Ma'uc xa cajal ta xc'ot ta jbacutic. Ja'uc le' une, mi oy buch'u laj sta milel ti oy ta yut anae, jbainojcutic ta xc'ot unbi.

²⁰Mi jam ave ati' ta yalel ti c'usi o'ntonal no'ox sna'e, ta xch'ay sc'oplal cu'uncutic ma' ti c'usi loc' ta quecutique.

²¹—Jech ta jnopcutic ma' ti va'i s'elan laj avale —xi laj stac' ti antse. Loq'uic batel, laj stam batel sbeic. Ts'acal to un, ti Rahabe lic sjoc'an ta chuquel ti tsajal ch'ojon ta sventanae.

²²Ti chib jpa'ivanej jq'uel-osile batic ta vitstic. Oxib c'ac'al sjalil laj snac' sbaic ti xjoyetic no'ox ta sa'vanej ti soldadoetic ta jujujote. Mi ja'uc oy bu laj staic, sutic ech'el ta Jericó.

²³Ja'uc ti cha'vo' jpa'ivanej jq'uel-osiletique yalic talel ta vitstic yo' ta x'ech' xtuch'ic ti uc'ume, c'otic ti bu oy ti Josuee. C'ot yalic scotol ti c'u s'elan c'ot ta stojolique.

²⁴Xi laj yalique: “Ti Diose laj xa yac' ta coc ta jc'obtic scotol ti banomile. Yu'un scotol ti jnaclejetic yu'une batem xa xch'ulelic ta xi'el ta j'ech'el.”