Read Tzotzil Josué 20 Bible Online

Josué 20 - Tzotzil bible

Josué 20

¹Ti Josuee xi c'oponat yu'un ti Diose:

²“Lo'ilajan xchi'uc ti israeletique, albo ya'i ti ac'o st'ujic ti pojobbail jteclumetique jech c'u cha'al laj calbe ya'i ti Moisese.

³Ti mi oy buch'u mu yolobajuc laj smil junuc ti xchi'ile, xu' ta xjatav batel ta snaq'uel sba ta junuc ti jteclum taje yo' jech mu xtae ta milel yu'un yuts' yalal ti buch'u chame.

⁴Ti buch'u ta xbat sa' spojobbail ta junuc ti jteclum taje, ti c'alal ta xc'ote, jamal ac'o c'ot yal ta stojol ti moletic yu'un ti jteclume. Ja' yu'un un, ti stuquique ta xaq'uic ochuc. Ta xaq'uic nacluc.

⁵Mi c'ot sa'el yu'un yuts' yalal ti buch'u chame, jech ti moletic yu'un ti jteclume, mu xaq'uic loq'uel ti buch'u snac'oj sbae. Yu'un ti cham yu'un ti xchi'ile, mu yaleluc laj smil, mi ja'uc ti oy sc'ac'al yo'nton ta stojole.

⁶Ja'uc ti buch'u snac'oj sba ta jteclume ta xcom o ja' to ti mi ta xich' chapanel ta sba ta sat ti jteclume, xchi'uc ti mi cham xa ox ti buch'u tiq'uil ta paleal ti c'alal jech c'ot ta pasele. Ts'acal to un, ti buch'u snac'oj sbae xu' ta sut batel ti bu loc' ta jatvile. Ti xcaltique, ta xbat ta sna ti bu oy ti steclumal stuque.”

⁷Ti pojobbail jteclumetic ti laj st'ujic ti israeletique, ja' ti Cedes yu'un Galilea ti oy ta vitstic yu'un ti Neftalie. Laj st'ujic xtoc ti jteclum Siquem ti oy ta vitstic yu'un ti Efraine, xchi'uc ti jteclum Quiriat-arba ti sbiinoj xtoc Hebrón ti oy ta vitstic yu'un ti Judae.

⁸Ta stenlej jol vits ti oy ta jot uc'um Jordán ta sbajtical banomil ta yeloval sloq'ueb c'ac'al yu'un ti Jericoe, laj st'ujic ti jteclum Besere, ti ja' yu'un snitilultac ti Rubene. Ti ta yosilal ti Galaade, ja' laj st'ujic ti jteclum Ramote, ti ja' yu'un snitilultac ti Gade. Ti ta yosilal ti Basane, ja' laj st'ujic ti jteclum Golane, ti ja' yu'un snitilultac ti Manasese.

⁹Ja' jech yepal ti pojobbail jteclumetic laj st'ujic ta sventa scotol ti israeletique, xchi'uc ti jyanlumetic ti nacal ta stojolique. Ti buch'uuc no'ox ti mu yaleluc ta xmilvane, xu' xbat snac' sba yo' jech mu xlaj ta milel yu'un yuts' yalal ti buch'u cham ti c'alal mu'yuc to chapanbil yu'un ti jteclume.