Read Tzotzil Josué 22 Bible Online

Josué 22 - Tzotzil bible

Josué 22

¹Va'i un, ti Josuee laj sta ta iq'uel snitilultac ti Rubene, ti Gade, xchi'uc ti o'lol jvoc' snitilultac ti Manasese,

²ti xi laj yalbee: “Ti c'u s'elan la'albatic yu'un ti Moisés ti yajtunel Diose, laj xa apasic scotol, laj xa ach'unic scotol ti c'u s'elan laj calboxuc ava'iique.

³Ti c'u sjalil xa talele, cuch avu'unic, mu'yuc xavictaic comel stuc ti achi'ilique. Loc' ayan ta avo'ntonic ti c'ot ta pasel avu'unic ti c'usitic yalojan ti Ajvalil Dios avu'unique.

⁴Avi tana une, ti stuque c'ot xa ta pasel yu'un ti c'usi loq'uem ta ye ta sti' ti ta spase. Yu'un laj xa sta ti jun yo'ntonic ti achi'iltaque. Xu' xa xasutic batel ta avaxibalnaic ta banomil ti oy ta yelov sloq'ueb c'ac'al yu'un ti uc'um Jordán ti bu laj yac'boxuc ti Moisés ti yajtunel Diose.

⁵Ti c'usi ta xcalboxuque, ja' ta jc'an ti jbeluc me sc'oplal c'otuc ta pasel avu'unic ti mantale, xchi'uc ti oy c'usi jbel tsots albil ti laj yac'boxuc ti Moisés ti yajtunel Diose. Ti xcaltique, c'uxuc xava'iic ti Ajvalil Dios avu'unique, tamic batel ti c'u s'elan ta sc'an ti stuque, ch'unbeic ti smantaltaque, ts'acliic tunanic ta stojol ta sjunul avo'ntonic, ta sjunul ach'ich'elic.”

⁶C'alal laj taj une, jech ti Josuee lic slequil c'opta, laj xch'ac sbaic. Ti stuquic une bat c'alal ta yaxibal naic.

⁷Ti o'lol jvoc' snitilultac ti Manasese, ac'bilic xa ono'ox sbanomilic yu'un Moisés ta yosilal Basane. Ja'uc ti yan o'lol jvoc' snitilultac ti Manasese, ac'bat sbanomilic yu'un ti Josuee ta yeloval sloq'ueb c'ac'al yu'un ti uc'um Jordán ta yosilalic ti israeletique. Ti yan o'lol jvoq'ue, laj yalbe ya'iic ti xu' xa ta sutic batel ta yaxibal naic ti c'alal laj xa slequil c'optae.

⁸Va'i un, xi laj yalbee: “Avi tana une, sutanic batel ta alumalic ti mu albajuc ti ac'ulejalique, ti chon bolometique, ti pets'eloxuc ech'el ta xcuchel ti oroe, ti platae, ti c'anal taq'uine, ti tsatsaquil taq'uine, xchi'uc ti epal c'u'iletic ti laj ataique. C'ot me ch'acbeic ti yan achi'ilic ti laj apojbeic ti avajcontraic une.”

⁹Ja' jech c'ot ta pasel yu'unic snitilultac ti Rubene, ti Gade, xchi'uc ti o'lol jvoc' snitilultac ti Manasese, laj xch'acbe sbaic xchi'uc ti yan israeletic ta Silo ti oy ta yosilal ti Canaane, yo' jech ta sutic ech'el ta sbanomil stuquic ti oy ta yosilal Galaad ti ac'batic yu'un ti Moisés ta sventa ti albil yu'un ti Diose.

¹⁰C'alal c'otic ta sts'el uc'um Jordán ti ja' to yosilic ti cananeoetique, jech ti snitilultac ti Rubene, ti Gade, xchi'uc ti o'lol jvoc' snitilultac ti Manasese, lic sva'anic jun muc' ta altar ta sts'el ti uc'ume.

¹¹Ja'uc ti yan israeletique c'ot ta sni' ta xchiquinic ti laj xa sva'anic jun muc' ta altar snitilultac ti Rubene, ti Gade, xchi'uc ti Manasese ta sts'el sts'aquil sbanomil ti Canaán ta nopol ti' uc'um Jordán ti ja' to snitobal sbanomilic ti israeletique.

¹²C'alal jech laj ya'iic lec ti israeletic taje, laj stsob sbaic ta ora no'ox ta Siloe yo' xbat stsaquic ta c'op ti jayvoq'uique.

¹³Laj scaj-taquic jelavel ta Galaad ti Finees xnich'on ti pale Eleazare ti bu tsobolic snitilultac ti Rubene, ti Gade, xchi'uc ti Manasese.

¹⁴Laj xchi'inic batel ti Fineese lajunvo' (10) banquilaletic yu'un ti israeletic ti sbainojic ti jujuchop nitiluletique.

¹⁵Scotolic taje batic ta Galaad ti bu tsobolic snitilultac ti Rubene, ti Gade, xchi'uc ti o'lol jvoc' snitilultac ti Manasese, ti xi c'ot yalbeique:

¹⁶—Ta sventa steclumal ti Diose, tal jc'oponotcutic. ¿C'uxi xa ono'ox ac'vanejal ta vocolil laj atic' abaic ta spasel ta sba ta sat ti Dios yu'un ti Israele? ¿C'u cha'al laj avalopatinic comel ta scoj atoyobbailic ti laj ava'anic jun altar ta scontrainel ti Diose?

¹⁷¿Mi yu'un jutuc no'ox avalojic ti jcuchojtic to ti ep cham ti yalab xnich'nab Dios ta scoj stoyobbail ti laj sta smulic ta Peore?

¹⁸¿Mi yu'un mu xavich' o avo'ntonic yu'un ti staoj yav ta xach'ac abaic ta stojol ti Diose? Mi laj xa ach'ac abaic ta stojol ti Dios avi tana li'e, ilinem ta sacub oc'om ta stojol scotol ti israeletique.

¹⁹Mi ta xanopic ti mu stac' ta xanaquiic ta banomil ti bu laj avich'ique, jelavanic talel ta yosilal Dios ti bu oy xch'ulna ti Diose. Ich'ic jsepuc ti banomil ti jmacojcutique. Mu xatoy abaic ta stojol ti Diose. Mi ja'uc xatoy abaic ta jtojolcutic ta sva'anel yan altar ti c'alal oy xa jun altar yu'un ti Dios cu'untique.

²⁰Vuleso ta ajol ava'iic ti laj yilta scotol jteclum Israel ti Diose, c'alal ti Acan squerem ti Zarae laj sta smul ti c'alal laj stam ti c'usi chapal sc'oplal ti ta xich' lilinel ta j'ech'ele. ¡Yu'un ma'uc no'ox stuc cham ti Acan ta scoj ti smule!

²¹Va'i un, snitilultac ti Rubene, ti Gade, xchi'uc ti o'lol jvoc' snitilultac ti Manasese, xi laj stac'beic ti banquilaletic yu'un ti israeletique:

²²—Ti stuc xa Ajvalil Dios ti scotol xu' yu'une, sna' lec ti ma'uc laj jva'ancutic jun altar ta scoj ti jtoyobbailcutic ti ta jch'ac jbacutic ta stojole. Ti stuque sna' lec scotol. Ta xac'boxuc ana'ic acotolic. Ti mi ja' jech c'ot ta nopel cu'uncutique, ¡milunctic xa xch'a unbi, yu'un sa'bil xa cu'uncutic!

²³Ti mi ja' ta sventa ta jch'ac jbacutic ta stojol Dios ti laj jva'ancutic ti altar li'e, mi ja' ta sventa ta xcac'cutic ti c'usi ta xich' chiq'uele, mi ja' ti matanal sat ts'unubaletique, ti milbil matanal ta sventa ti lajesobil o'ntonale, ac'o xchapanuncutic stuc ti Diose.

²⁴Melel cac'tic unbi, laj jpascutic, yu'un mu jc'ancutic ti oy bu jun c'ac'al ti xi ta x'albat ti jnich'nabcutic yu'un ti anich'nabique: ‘¿C'usi aventaic ta xatic' abaic talel ta stojol ti Dios yu'un ti Israele?

²⁵Yu'un ti Diose laj yac'boxuc abanomil ta jot uc'um Jordane yo' jech ch'acal lijc'ot ti vo'oxuc snitiluloxuc ti Rubene, ti Gade. Mu'yuc c'usi aventaic ti ta xtal atic' abaic ta stojol ti Diose.’ Ta xc'ot ta pasel yu'un ti anich'nabic unbi, ti ta xlic yicta sbaic ta snijanel xchimanel sbaic ta stojol ti Dios ti jnich'nabcutique.

²⁶Jech o xal laj jnopcutic ti laj jva'ancutic ti jun altare. Ma'uc ta sventa xchic'obil matanal yu'un ti Diose. Mi ja'uc sventa yan matanal ta xich' aq'uele. Mi ja'uc ta sventa ti oy c'usi yan ta xich' milele.

²⁷Ti jech laj jpascutique, ja' jc'oplaltic jcha'chopaltic ti ta xc'ot ta rextico cu'untique. Ja' xcha'chopal ti jnitilultique yo' jech jmoj xu' ta xijtun ta stojol ti Diose, ti jmoj ta xcac'tic ti chic'bil matanale, ti milbil matanal yu'un xch'ayobil ti mulile, xchi'uc sventa ti lajesobil o'ntonale. Ti anitilulic une mu xu' ti xi ta xloc' ta yeic ta stojol ti jnitilulcutique: ‘Ti vo'oxuque mu xu' ta xtal atic' abaic ta stojol ti Diose.’

²⁸Yu'un laj jnopcutic ti mi oy buch'u jech ta xal ta jtojolcutique, mi stojol ti jnitilulcutique, jech ti vu'uncutique xu' ti xi ta jtac'cutique: ‘¡A'yio ava'iic! Ti jmolmuc'totcutique laj sva'anic jun altar ta sventa ti Diose. Ma'uc ta sventa ta xich' chiq'uel ti matanale. Mi ja'uc ta xich' aq'uel ti milbil matanale. Yu'un c'ajomal no'ox ta xac' ta na'el ti jc'oplalcutic ti jcha'chopalcutique.’

²⁹Mu xc'ot ta pasel ti ta jtoy jbacutic ta stojol ti Diose, ti ta jva'ancutic yan altar ti ta jnopcutic ti ja' xchic'obil matanale, ti ta xich' aq'uel ti matanal ti sat ts'unubaletique, mi ja' ti yan milbil matanaletique. Ipaluc ti altar cu'uncutique oy ta yut Axibalna yu'un ti Dios cu'untique.

³⁰C'alal jech laj ya'i ti pale Fineese, ti banquilaletic yu'un ti lume, ti banquilaletic yu'un ti jujuvoc' nitiluletic ti va'i s'elan laj yalic snitilultac ti Rubene, ti Gade, ti Manasese, c'ot ta yo'nton, lec laj ya'iic.

³¹Va'i un, xi albatic yu'un ti Finees xnich'on ti pale Eleazare: —Avi tana li'e, ta jbel sc'oplal li' xchi'inojotic ti Diose. Yu'un ti vo'oxuque, vinaj lec ti ma'uc ta xatoy abaic ta stojole. Yu'un laj to atic' abaic ta spojeluncutic ti mu'yuc xquich'cutic tsitsel yu'un ti Diose.

³²Laj ti va'i s'elan taje, jech ti Fineese xchi'uc ti c'u yepal xchi'inoj batele, tsotsanic comel, xutic ti yane. Sutic ech'el ta Galaad, batic ta Canaán ti bu oy ti israeletique. Ti c'u s'elan laj staq'uic ti jayvoc' nitiluletique, xchapet c'ot yalbeic ya'i ti buch'utic oyic ta Canaane.

³³Ti c'u s'elan tac'batic sutele, c'ot ta yo'ntonic, lic slequil c'optaic ti Diose. Ch'ab xi liquel yu'unic ta yalbel sc'oplal ta scontrainel snitilultac ti Rubene, ti Gade, mi ja'uc ta soquesbel ti yosil sbanomile.

³⁴Ja'uc snitilultac ti Rubene, ti Gade laj yac'beic sbiin “Rextico” ti altare, ti xi laj yalique: “Ti altar li'e, ja' cajrexticotic ti ja' Ajvalil ti Dios cu'untique.”