Read Tzotzil Josué 23 Bible Online

Josué 23 - Tzotzil bible

Josué 23

¹Ech' xa ox c'uc sjalil un, ta ts'acal to ti c'alal laj xa staic yu'un Dios ti ch'abal c'op xchi'uc yajcontraic ti israeletique, bats'i mol xa batel ti Josuee.

²Jech ti Josuee xi laj yalbe ti c'alal laj stac ta iq'uel scotol ti israeletique, ti moletique, ti banquilaletique, ti jchapanvanejetique, xchi'uc ti j'opisialetic yu'unique: “Limolib xa. Jal xa talel ti jabilale, tal xa c'ac'al xca'i.

³Laj avil ta aba ta asatic scotol ti c'u s'elan laj spas talel ti Dios ta stojol ti jteclumetic ti buch'u laj stoy sbaique, yu'un ja' letovaj ta spojeloxuc.

⁴Ta orail laj jq'uel ti c'alal laj jch'ac ti banomil ta stojol ti jujuvoc' nitiluletique. Ma'uc no'ox laj jch'ac ti banomil ti bu u'ninbil xae. Ja' jech xtoc laj jch'ac ti bu sc'an to u'ninele, ti lic ech'el ta yeloval sloq'ueb c'ac'al yu'un ti uc'um Jordane, ti c'ot c'alal to nab Mediterráneo ti oy ta smaleb c'ac'ale.

⁵Ti buch'utic nacalic ta banomiletic taje, scotolic ta xtenatic loq'uel yu'un ti Diose. U'ninic me un jech c'u cha'al yaloj ono'ox ti Ajvalil Dios avu'unique.

⁶“Tsatsajanic ti c'otuc ta pasel avu'unic ti oy c'usi jbel tsots albil ta jpoc vun yu'un ti Moisese. C'otuc ta pasel avu'unic scotol ti c'usi albile.

⁷Mu xanupultas ajolic xchi'uc ti jnaclejetic ti li' oy ta atojolique. Mu xanijan xachiman abaic ta yich'el ta muc' ti diosetic yu'unique. Mi ja'uc xavac' abaic ta pasel ta mantal yu'un. Mi ja'uc ti lec xa xava'iic ta yalolanbel sbi ta sva'anel ta rextico ti diosetic taje.

⁸Ja' ts'acliic o ech'el ti Ajvalil Dios avu'unique jech c'u cha'al staoj to yav ta xapasic avie.

⁹Yu'un ti Diose ta aba ta asatic laj sten loq'uel ti yajval muc'tiquil lume, ti tsots xu' yu'unique, ti jech to staoj yan avi c'ac'al ti mu'yuc to buch'u jchopucal ti cuch yu'un ta stsaleloxuque.

¹⁰Ta junoxuc no'ox ti vo'oxuque, xu' ta xjatav batel avu'unic lajuneb ciento (1,000) ta vo'. Yu'un ti Ajvalil ti ja' Dios avu'unique ja' sva'anoj sba ta letovajel ta spojeloxuc jech c'u cha'al yaloj ono'oxe.

¹¹Ja' yu'un un cha'e, tuc'ulano me lec abaic. C'uxuc me xava'iic ti Ajvalil Dios avu'unique.

¹²Yu'un xi s'elan ta xcac' ana'ique: Yu'un mi ta xlic ach'ac abaic ta stojol ti Diose, mi ta xaco'oltas ajolic xchi'uc ti jnaclejetic ti li' oy ta atojolique, mi ta xlic nupian ts'aclianic xchi'uquique.

¹³ja'uc ti Dios une, mu sten loq'uel ta aba ta asatic ti jnaclejetic ti oy ta atojolique. Yu'un ja' no'ox ta xc'ot ta pasel yu'un ti ta sjoybin ta achucobilique, ti ta apets'alique. Tsalbil ta xac'otic yu'un, ti co'ol s'elan junuc nucul ta xavich' jisbel ta apatique, ti co'ol s'elan junuc ch'ix ti pajal ta xti'van ta asatique, ja' to ti c'uxi latsuts acotolic ta lequil banomil ti bu laj yac'boxuc ti Ajvalil Dios avu'unique.

¹⁴“Yu'un po'ot xa sc'an xicham. C'alal mu to jechuc ta xc'ot ta pasele, ta jc'an ta xcac' ana'ic comel ti sjunuluc avo'ntonique, ti sjunuluc ach'ulelique, bejeluc lec ta ajolic ti c'ot xa ta pasel yu'un scotol ti c'usi lec yalojan ti Diose. Mi jtosuc ma' ti mu'yuc laj spas ti c'usi loq'uem ta ye ta sti'e.

¹⁵Jech c'u cha'al ti c'ot ta pasel yu'un scotol ti c'usitic lec yaloj ono'ox ta spas ti Diose, ja' no'ox jech xu' ta stac talel ep ta tos vocoletic ta atojolic ti mu ja'uc junuc cuxul ta xacomic ta lequil banomil ti bu laj xa yac'boxuque.

¹⁶Ti mi mu xc'ot ta pasel avu'unic ti strate ti laj spas ta atojolique, mi ta xbat anijan achiman abaic ta yich'elic ta muc' ti yan diosetique, ti xanijiletic xa liquel ta stojole, ta xlic ilinuc ti Diose. Ta jliquel no'ox ch'abaloxuc yu'un ta lequil banomil ti bu laj yac'boxuque.”