Read Tzotzil Josué 4 Bible Online

Josué 4 - Tzotzil bible

Josué 4

¹Ts'acal to un, ti c'alal scotolic ech' xa xtuch'ic ti uc'um Jordane, ti Diose xi laj yalbe ti Josuee:

²“T'ujo lajcha'vo' viniquetic yu'un ti jteclume, jun ta jujuvoc' yu'un ti nitiluletique.

³Va'i un, albo ya'iic ti ac'o spetic loq'uel lajcha'bejuc ton ti ta o'lol yut uc'um ti bu va'alic ti paleetique. Ac'o yich'ic batel xtoc c'alal to ti bu ta xc'ot alaman abaic ti ac'ubaltic tanae.”

⁴Jech o xal ti Josuee laj yic' talel ti lajcha'vo' viniquetic ti laj st'uje.

⁵Xi laj yalbe ya'iique: “Ochanic batel c'alal to o'lol uc'um ta sts'el ti bu comem xcaxa ti Ajvalile, ja' ti Dios avu'unique. Cajanic talel ta anequebic jujubejuc ton ti jujunoxuque, jbej ton yu'unic ti jujuvoc' yu'unic snitilultac ti Israele, yo' ta xc'ot ta lajcha'bej ta scotol.

⁶Ti tonetic taje, ta xc'ot ta svinajeb avu'unic le' batel ti oy c'usi ta xc'ot ta pasele. C'alal xi ta sjac'boxuc ti anich'nabique: ‘¿C'usi sventa ti tonetic li'e?’,

⁷va'i un, xachi ta xatac'beique: ‘C'alal ech' xtuch' jelavel uc'um xcaxail strate ti Diose, ti uc'ume pas ta cha'ch'ac yoc ti bu oy ti caxae. Va'i un, ti tonetic le' une, ja' sventa svulesobil ta yo'ntonic ti israeletic ti oy c'usi c'ot ta pasel li'e.” ”

⁸Ti stuquic une jech laj spasic jech c'u cha'al albatic mantal yu'un ti Josuee. Laj spetic loq'uel lajcha'bej ton ti ta uc'ume, jujubej yu'unic ti jujuvoc' yu'un snitilultac ti Israele. Laj yich'ic batel. C'ot slatsic ti bu c'ot slaman sbaique jech c'u cha'al albil mantal yu'un Dios ti Josuee.

⁹Ma'uc no'ox taje, yu'un laj to slats lajcha'bej ton ti Josué ta uc'um ti bu ech'ic ti paleetic ti xchechojic jelavel xcaxail ti tratee. Tey to oy ti tonetic taje.

¹⁰Ti paleetic ti xchechojic xcaxail ti tratee, ti oy sc'oplal ta sva'an sbaic ta o'lol uc'um ti c'alal ja' o ta xchapan sbaic ti israeletic ta spasel ti c'usi albil yu'un Dios ti Josuee, scotol jech laj yich' pasel jech c'u cha'al albat yu'un Moisés ti Josuee. Jech ti jteclume ta anil ijelavic.

¹¹Ts'acal to un, ti c'alal jelavic xa ta jot scotolique, ja' jech ti paleetic ti xchechojic xcaxa ti Diose, jelavic batel ec. Ja' jba'be batel yu'unic ti jteclume.

¹²Ja' jech xtoc ech' xtuch'ic uc'um ti j'ac'-letoetic ti ja' snitilultac ti Rubene, ti Gade, xchi'uc ti Manasese. Chapalic xchi'uc yabtejebic jba'be jelavic ech'el ti israeletique, ti jech ono'ox albilic mantal yu'un ti Moisese.

¹³Nopol cha'vinicuc ta mil (40,000) viniquetic ti chapalic ta ac'-leto xchi'uc yabtejebic ti xcholetic batel ta sba ta sat ti Diose, ti tuc' stamojic batel ta stenlejtic yu'un ti Jericoe.

¹⁴Ti jech c'ac'al taje, ja' o yorail ti aq'ue ta ich'el ta muc' yu'un Dios ti Josuee, ti ch'ayal yo'ntonic ta xc'ot scotol ti israeletique, co'ol s'elan jech c'u cha'al laj spas ta stojol ti Moisés ti c'u sjalil cuxule.

¹⁵Va'i un, ti Diose xi laj yalbe ti Josuee:

¹⁶“Albo ya'i ti paleetique ti ac'o xchechic jelavel ti xcaxail tratee, ti loq'uicuc ech'el li' ta uc'ume.”

¹⁷Jech ti Josuee laj yalbe ti ac'o loq'uicuc talele.

¹⁸Ta jech no'ox yepal ti c'alal naca to laj stec'an yoquic ta taquin banomil ti c'alal loq'uic ech'el ta uc'um ti paleetique, ta ora no'ox, sta yav yoc ti uc'ume, ti xq'uechet no'ox batel yoc jech c'u cha'al ta ba'yele.

¹⁹Ti jech loq'uic ech'el ta uc'um ti israeletique, ja' o ta slajunebal c'ac'al yu'un ti sliqueb ue. C'ot slaman sbaic ta Gigal ta yeloval sloq'ueb c'ac'al yu'un ti Jericoe.

²⁰Ti bu taje, ti Josuee c'ot slatsan ti lajcha'bej ton ti laj spetic loq'uel ta uc'um Jordane.

²¹Xi laj yalbe ti israeletique: “Ti c'alal ta xasjac'boxuc ti avalab anich'nabic le' batele: ‘¿C'u cha'al ti latsbil tonetic le'e?’

²²chapbeic ya'iic ti ta taquin banomil ech' xtuch'ic uc'um Jordán ti israeletique,

²³ti c'ot ta pasel yu'un ti Ajvalil Dios avu'unic ti laj staquintas uc'um Jordán ti c'alal ech' atuch'ique jech c'u cha'al ta ba'yel ti laj staquintas ti Tsajal Nab ti c'alal lijelavcutic talele.

²⁴Ti jech taj une, ja' jech ta sna'ic scotol ti jteclum ti oy ta sjoylej banomil ti jelavem xu' yu'un ti Diose. Jech ti vo'oxuc une ta j'ech'el ta xavich'ic ta muc' ti Ajvalil Dios avu'unique.”