Read Tzotzil Josué 5 Bible Online

Josué 5 - Tzotzil bible

Josué 5

¹Scotol ti ajvalil amorreoetic ti oyic ta yeloval smaleb c'ac'al yu'un ti uc'um Jordane, xchi'uc ti cananeo ajvaliletic ti oyic ta nopol muc' ta nab Mediterráneoe, laj ya'iic ti laj staquijesbe yoc uc'um ti Dios ti c'alal ech' xtuch'ic ti israeletique. Och ep xi'el ta yo'ntonic. Mi ja'uc sc'an xnopajic stsaquel ta leto ti israeletique.

²Ja' o c'ot ta pasel ti xi albat yu'un Dios ti Josuee: “Meltsano jayaquil ton ti co'ol s'elan cuchilu ti lec yee. Cha'liqueso ti circuncisión ta stojol ti israeletique.”

³Ti Josuee laj smeltsan ti tonetic ti co'ol s'elan cuchilu ti lec yee. Laj yac'be circuncisión ti israelal viniquetic ta vits Aralote.

⁴Laj yac'be circuncisión, yu'un scotol ti viniquetic ti lec xa xu' yu'un x'ochic ta soldadoil ti c'alal loq'uic talel ta Egiptoe, chamic ta sbajtical banomil ti c'alal yacalic ta xanbile.

⁵Ac'o mi yich'ojic circuncisión scotolic ti c'alal loq'uic talel ta Egiptoe, ja' mu'yuc yich'ojic ti laj voq'uicuc talel ta sbajtical banomil ti c'alal yacalic ta xanbile.

⁶C'alal xanav cha'vinic (40) jabil ti israeletic ta sbajtical banomile, cham xa ox scotol ti viniquetic ti xu' xa x'ochic ta soldadoil ti c'alal loq'uic talel ta Egiptoe. Yu'un ti viniquetic taje mu'yuc laj snijan sbaic ta stojol ti Diose, ti laj sva'an sba ta yalel ti mu ja'uc junuc xu' ta xbat sq'uelic ti banomil ti albilic ti ta x'ac'batic ti smolmuc'totique, ta banomil ti bu co'ol s'elan vo' ta xbein ti chu' vacaxe, ti ajapome.

⁷Jech o xal ti Josuee laj yac'be yich' circuncisión xnich'nabic ti viniquetic taje, ti xcaltique, ti comtsanatic ta q'uexolil yu'un Dios ti mu'yuc to yich'ojic circuncisión ti ja' o yacalic talel ta xanvile.

⁸C'alal laj xa yich'ic circuncisión scotolique, com xcux yo'ntonic ti bu lamalic ta nacleje, ja' to ti c'uxi lecubique.

⁹Va'i un, ja' o xi albat yu'un Dios ti Josuee: “Ti jech laj yich'ic ti circuncisione, ja' to jech laj jch'aybe sc'oplal ti q'uexlaltasbilic yu'un ti egipcioetique.” Jech o xal ti bu taje, Gigal to sbiinoj avi tana une.

¹⁰C'alal lamalic ta naclej ta Gigal ti israeletique, ta smalil ti xchanlajunebal c'ac'al yu'un ti ue, laj spasic q'uin sventa sna'obil q'uin Colel ta stenlej yu'un Jericó.

¹¹Ti jech c'ac'al taje, laj sve'ic pan ti ch'abal yich'oj ti spajubtasobile, xchi'uc ti bacubtasbil trigoe. Ja'uc ti ta yoc'omal une, lic xa slajesic ti c'usi xch'i x'ayan yu'un ti banomile.

¹²Va'i un, ja' to jech ch'ay sc'oplal sve'el ti maná yu'unique. Ti jech jabil taje, ja' o yorail lic slajesic ti israeletic ti c'usi ta xch'i yu'un ti banomil ta Canaane.

¹³Ta nopol Jericó, oy jun c'ac'al ti Josuee laj yil jun vinic ti stsacoj jun yespadae. Nopaj batel ti Josuee, ti xi laj sjac'bee: —¿Mi jchi'ilotcutic, mi ja' junuc cajcontraotcutic?

¹⁴—Mi junuc ta jujujot —xi la stac' ti vinique—. Talemun ta sventa jun banquilal yajtunel Dios ti scotol xu' yu'une. Va'i un, ti Josuee snupilan xa banomil laj spatan sba c'alal to lum, ti xi laj sjaq'ue: —¿C'usi mantalil stacoj talel ti Dios ta stojol ti yajtunel li'e?

¹⁵Ti jun banquilal yajtunel ti Diose xi laj staq'ue: —Loc'o ti axonobe, yu'un ti bu oyote, ja' jun ch'ul banomil. Ti Josuee laj xch'unbe.