Read Tzotzil Josué 6 Bible Online

Josué 6 - Tzotzil bible

Josué 6

¹Mi ja'uc junuc oy buch'u xu' ta xloc' ta x'och ti ta Jericoe, ja' ti laj xa yich' maquel sti'tac ti jteclume yo' jech ta spoj sbaic yu'un ti israeletique.

²Ja'uc ti Dios une xi laj yalbe ti Josuee: “Laj xa cac'bot ta avoc ta ac'ob ti Jericoe, ti ajvalil yu'une, xchi'uc ti soldadoetic yu'une.

³Jech ti vo'oxuque, soldado Israel, vaquib c'ac'al sjalil, ta xajoyibtaic jun velta ta jujun c'ac'al ti jteclume.

⁴Vucub paleetic jelavemic ta jba'be ta xbatic yu'un xcaxail ti tratee, ti jujunic yich'oj jujun xulub xchijic ta yoq'uisanele. Ja'uc ti ta yucubal c'ac'al une, vucub xa velta ta sjoyibtaic ti jteclume, c'alal yacal ta xoq'uisanic ech'el xulub chij ti paleetique.

⁵C'alal ta xava'iic ti ta sjel snuc' ti c'u s'elan ta xich' oq'uisanel ti xulub chije, ja' o lic avananic ti bu c'alal xu' avu'unique. Ja' o ta xlic jinuc smocal ti jteclume. Ti jujunoxuque tuc' xa'ochic batel ta anil ta jteclum.”

⁶Ti Josuee xi laj yalbe ti paleetic ti c'alal laj yic'an talele: “Ta xachechic batel xcaxail strate ti Diose. Jba'be ta xajelavic batel vucvo'oxuc yu'un ti caxae xchi'uc ti oq'ues xulub chije.”

⁷Ja'uc ti jteclume, xi albat xtoque: “Ta xabatic, ba joyibtaic ti jteclume. Ja'uc ti j'ac'-leto viniquetique jba'be ta xjelavic batel yu'un xcaxa ti Diose.”

⁸Jech laj spasic scotol jech c'u cha'al albatic yu'un ti Josuee. Ti vucub paleetique jba'beic jelavic batel ti bu chechbil batel xcaxail strate ti Diose, ti xtutet no'ox ech'el yu'unic ta yoq'uisanel ti vucub xulub chije, ti nabal ech'el ta spatic ti xcaxa Diose.

⁹Ja'uc ti j'ac'-leto viniquetique jba'be jelavemic ech'el yu'unic ti paleetique. Ti jvoc' ti oyic ta patile, xvoletic no'ox batel ta spat ti caxae. Ti paleetique xtutet no'ox ech'el ta yoq'uisanel ti xulub chije.

¹⁰Ti Josuee laj yalbe mantal ti soldadoetique ti ts'ijilicuc no'ox xanavicuc batele, ja' to ti mi albatic mantal ti lic avanicuc ti bu xa c'alal xu' yu'unique.

¹¹Joyibaj jun velta ta jteclum xcaxa Dios yu'un ti Josuee. Ts'acal to un, sutic talel ti bu lamalique. Ti bu taje, tey ech' yu'unic ti ac'ubale.

¹²Ta yoc'omal un, sob xa lic ti Josuee. Ti paleetique laj xchechic batel xcaxa ti Diose.

¹³Ti vucub paleetique jelavemic ta jba'be yu'un xcaxa ti Diose. Mu ja'uc jutebuc ta spajes yacanic ta xanobal. Mu ja'uc jutebuc spajes sbaic ta yoq'uisanel ti xulub chije. Ti j'ac'-leto viniquetique jelavemic ta jba'be yu'unic ti jlome. Ti jlome nabalic ech'el ta spat ti caxae. Ti xulub chije mi ja'uc spajesic ta yoq'uisanel.

¹⁴Bat no'ox sjoyibtaic ta xchibal c'ac'al xtoc ti jteclume. C'alal laj yo'ntonique, sutic talel ti bu lamalic ta nacleje. Vaquib c'ac'al sjalil ti jech laj spasique.

¹⁵C'alal sta ti yucubal c'ac'al une, sob xa liquic, ti xvoletic no'ox batel ta sjoyibtael ti jteclume jech c'u cha'al laj spasic xa talele. Ja' no'ox un, vucub xa velta laj sjoyibtaic ti jech c'ac'al taje.

¹⁶C'alal laj yoq'uisanic ta yucubal velta ti yoq'uesic ti paleetique, ti Josuee xi laj yalbe mantal ti jteclume: “¡Avananic! yu'un ti Diose laj xa yac' ta avoc ta ac'obic ti jteclume.

¹⁷Ti jteclume xchi'uc scotol ti c'usi x'ayan yu'une, c'ot xa ta nopel ta j'ech'el ti chap xa sc'oplal ta xich' lilinele, yu'un jech yaloj mantal ti Diose. Ja'uc ti Rahab ti sna' sbolomalin sbae mu xac' sjol sbaquil xchi'uc, mi ja'uc scotol ti c'u yepal nac'alic ta snae. Yu'un ti antse laj snac' ti jpa'ivanej jq'uel-osil ti laj jtactic batele.

¹⁸Ja'uc ti vo'oxuc une, bijanic me ti mu xatamic, mu xapiquic jutebuc ti c'usi x'ayan yu'un ti jteclume, yu'un c'otem ta nopel ti chapbil sc'oplal yu'un Dios ti ta xich' lilinel ta j'ech'ele. Yu'un ti mi mu jechuque, bisbil ta cotol chaval ta xc'ot ti bu lamalic ta naclej ti israeletique, ti tsots vocol ta staique.

¹⁹Yan ti oroe, ti platae, scotol ti c'usi pasbil ta c'anal taq'uine, ti c'usi pasbiquil ta tsatsal taq'uine, ta xc'ot ta yu'un ti Diose. Yu'un ta xich' aq'uel ti bu sq'uejobil ti sc'ulejale.”

²⁰Avanic ti jteclume. Xtutet no'ox liquel ti oq'uese. C'alal laj ya'iic yech'omal oq'ues ti israeletique, lic avanicuc ti bu xa c'alal xu' yu'unique. Jech ti smocal ti jteclume, jin yalel. Va'i un, tuc' xvoletic ochel ta anil ti ta jteclume, laj yu'ninic.

²¹Laj taj une, laj smilic ta espada ti viniquetique, ti antsetique, ti querem viniquetique, ti moletique. Ma'uc no'ox taje, laj smilic ti vacaxetique, ti chijetique, ti burroetique. Scotol laj stsutsesic ta j'ech'el.

²²Ti Josuee xi laj yalbe ti cha'vo' jpa'ivanej jq'uel-osile: “Batanic ta sna ti ants ti sna' sbolomalin sbae. Yu'un loq'uesic talel xchi'uc scotol ti c'u yepal oy ta snae jech c'u cha'al laj ava'an abaic ta yalbele.”

²³Jech ti stuquic une ochic batel. Laj yiq'uic loq'uel ti Rahabe, ti stote, ti sme'e, ti xchi'iltac ta voq'uele, xchi'uc scotol ti yuts' yalaltaque. Bat snaq'uic lec bu ma'uc xa lamalic ti israeletique.

²⁴Laj taj une, ti israeletique yochelic ta xchiq'uel ti jteclume, xchi'uc scotol ti c'usitic x'ayan yu'une. C'ajomal xa no'ox laj stamic loq'uel ti platae, ti oroe, xchi'uc scotol ti c'usi pasbil ta c'anal taq'uine, xchi'uc ti pasbil ta tsatsal taq'uine. Bat yaq'uic ti bu oy sq'uejobil sc'ulejal ti Diose.

²⁵Ti Josuee mu'yuc xac' sjol sbaquil yu'un ti Rahabe, xchi'uc ti c'u yepal oy ta snae, ja' ti laj snac' ti jpa'ivanej jq'uel-osiletic ti tacbil batel ta Jericó yu'un ti Josuee. Ja'uc tana le' une, xchi'inojic ta naclej snitilultac Rahab ti israeletique.

²⁶Ts'acal to un, ti Josuee xi laj sva'an sba ta yalel jech c'u cha'al li'e: “Bisbiluc ta cotol chaval xc'ot ta sba ta sat ti Dios ti buch'u ta spas tsatsal ta xlic xcha'va'an ti jteclum Jericoe. Mi oy buch'u ta xlic xcha'va'an ti sliqueb ti naetique, ac'o chamuc ti sbanquilal nich'one. Mi oy buch'u ta xlic xcha'va'an ti ti' moque, ac'o chamuc ti yits'inal nich'one.”

²⁷Ti Diose laj stic' sba ta scoltael ti Josuee, ti buyuc no'ox vinaj batel sc'oplale.