Read Tzotzil Josué 8 Bible Online

Josué 8 - Tzotzil bible

Josué 8

¹Ti Josuee xi albat yu'un ti Diose: “Mu xaxi', mi ja'uc xatsiq'ues avo'nton. Tsobo scotol ti avinictaque. Tamo batel abeic ta scontrainel ti jteclum Haie. Yu'un vu'un ta xcac' atsal ti ajvalil yu'un ti jteclum Haie, xchi'uc ti slumaltaque. Ti steclumale, ti yosilale, ja' avu'un.

²Ja' jech ta xapas ta stojol ti jteclum Haie xchi'uc ti ajvalil yu'une jech c'u cha'al laj apas ta stojol ti jteclum Jericó xchi'uc ti ajvalil yu'une. Ja'uc tana le' une, xu' xavich'beic comel ti xchon sbolomique, ti c'usitic x'ayan yu'unic ti buch'utic tsalbil c'otique. Ch'ayaluc yo'ntonic ta xatsaquic ta leto ta spat jteclum ti chapbil lec avu'unique.”

³Ti Josuee lic xchapan sba xchi'uc scotol ti svinictaque, ti xvoletic batel ta stsaquel ta leto ti jteclum Haie. Lajuneb xcha'vinic mil (30,000) ta vo' ti laj st'uj ti j'ac'-letoetic ti ta ac'ubaltic laj stac batele,

⁴ti xi laj yalbe ti mantale: “A'yio ava'iic li'e: batanic ta spat ti jteclume. Nopol xanac' abaic ta sts'el, ti chaplanic xa lec yo' ta xatsaquic ta letoe.

⁵Ti jvoc' jchi'iltique jmoj ta xinopajcutic ech'el ta sts'el ti lume. C'alal ta xloq'uic talel ta snutseluncutic ti yajval lume, ta xijatavcutic batel ti vu'uncutique jech c'u cha'al ta ba'yele.

⁶Ti c'alal jech ta xijatavcutic loq'uel ta slumalique, ta xisnutsuncutic batel, yu'un ta snopic ti lijatavcutic xa yu'unic xtoque.

⁷Va'i un, loc'anic talel ti bu nac'aloxuque. U'ninic ya'i ti jteclume. Yu'un la'ac'bat xa ta avoc ta ac'obic yu'un ti Ajvalil Dios avu'unique.

⁸C'alal mi och xa ta avoc ta ac'obic une, tic'beic liquel sc'ac'al jech c'u cha'al yaloj ti Diose. Yu'un ja' jun mantal.”

⁹Jech ti Josuee laj yal mantal ti ac'o loq'uicuc batele. Jech bat snac' sbaic ta yeloval smaleb c'ac'al yu'un ti Haie, ti oy ta o'lol yu'unic ti Betel xchi'uc ti Haie. Ja'uc ti Josuee ech' yu'un ti ac'ubal ti bu lamalic ta nacleje.

¹⁰Ta yoc'omal un, sob xa lic ti Josuee. Lic xchol ti svinictaque. Va'i un, jba'be batel jmoj xchi'uc ti moletic yu'un ti israeletique, bat stsaquic ta leto ti jteclum Haie.

¹¹Scotol ti svinictaque nopajic batel ta sts'el yeloval ti jteclume. Lic slaman sbaic ta stuq'uil yolon ti yolon xocon sloq'ueb c'ac'al yu'un ti jteclume, ti oy ta o'lol yu'unic ti stenlejtic xchi'uc ti jteclume.

¹²Ti Josuee laj snac' nopoluc vo'mil (5,000) viniquetic ti oy ta o'lol yu'unic ti Betel xchi'uc ti Haie, ta yeloval smaleb c'ac'al yu'un ti jteclume.

¹³Ti xcaltic une, cha'ch'ac c'otic ti j'ac'-letoetique. Yu'un ti jvoq'ue snac'oj sbaic ta yeloval smaleb c'ac'al yu'un ti jteclume. Yu'un ti jvoq'ue comic ti bu lamalic ono'oxe, ta yolon ti yolon xocon sloq'ueb c'ac'ale. Ja'uc ti Josuee jelav batel ta ac'ubaltic ti c'ot ta o'lol stenlejale.

¹⁴C'alal laj yil ti ajvalil yu'un ti Hai ti jech s'elan taje, loc' batel ta anil xchi'uc scotol ti svinictaque yo' jech xbat stsaquic ta leto ti israeletic ta stenlejal Jordane. Mu ja'uc jutebuc sna' ti oy jlom israeletic ti nac'alic xa ta spat ti jteclume.

¹⁵Ti Josuee xchi'uc ti svinictaque laj spas sbaic yilel ti jatvil batic ta sbelel sbajtical banomil ta stojolic ti yajval lum Haie.

¹⁶Va'i un, scotol ti yajval lum Haie laj yich'ic mantal ti ac'o bat snutsique. C'alal jech snutsojic batel ti Josuee, namajic loq'uel ta jteclum.

¹⁷Yu'un mi ja'uc xa junuc vinic ta Hai xchi'uc ta Betel ti mu'yuc xbat snutsic ti israeletique. C'u stu un, ti jech juteb ta yo'ntonic ta snutsele, stuc laj yictaic comel ti jteclume.

¹⁸Va'i un, ti Diose xi laj yalbe ti Josuee: “Pasbo senyail ti licuc xa yich' tsaquel ta leto ti jteclum Haie, yu'un ta xcac'bot xa ta avoc ta ac'ob.” Ti Josuee laj sliques ti senyaile, ti ja' jun mantal ti licuc xa yich' tsaquel ta letoe.

¹⁹Va'i un, ti buch'utic nac'alique loq'uic talel ta anil ti bu snac'anoj sbaique, ti xbitetic ono'ox batel ta anil c'alal to jteclum ta yu'ninele, lic stic'beic sc'ac'al.

²⁰C'alal laj sq'uel sutel spatic ti viniquetic yu'un jteclum Haie, laj yilic ti xtomet ta xmuy batel ta vinajel xch'ailal ti jteclume. Yu'un mi ja'uc xa oy bu jotucal xu' ta xjatavic batel. Yu'un ti israeletic ti jatavic to ox batel yilel ta sbajtical banomile, ta jech to yepal joybij talel ta sbaic stsaquelic ta leto.

²¹C'alal laj yil ti Josuee ti laj xa yu'ninic ta j'ech'el jteclum ti jvoc' israeletic ti nac'alic to oxe, xchi'uc ti laj xa stic'beic sc'ac'al ti jteclume, vol xiic sutel ta stsaquel ta leto ti yajval lum Haie.

²²Jech ti buch'utic yu'ninojic xa ti jteclume, loq'uic talel ec, ti volibil c'ot ti jteclum Hai yu'un ti j'ac'-leto israeletic ta cha'voc' yajvalic ti mu'yuc xa c'usi xut ta sq'uej sbaique, ti laj scomon-voliic ti yajval lum Haie, ja' to ti c'uxi laj smilic scotole.

²³C'ajomal xa no'ox cuxul laj yictaic ti ajvalil yu'un ti jteclum Haie, ti chucbil ech'el yu'unic bat yaq'uic ta stojol ti Josuee.

²⁴C'alal laj xa ox smilic ta espada scotol ti yajval lum Hai ti loq'uemic ta nutsvaneje, jech ti israeletique sutic ech'el ta jteclum Hai ta stsutsesel ta j'ech'el ti buch'u to comemique.

²⁵Ti jech c'ac'al taje, chamic lajcha'mil (12,000) jnaclejetic yu'un ti jteclum Haie, c'alal ta ants ta viniquetic.

²⁶Yu'un mu'yuc laj sjel jutebuc ti Josué ti laj yal mantal ta yu'ninel ti jteclume, ti ja' to c'uxi ta xc'ot ta lilijel yu'un ta j'ech'el ti jteclume.

²⁷Ti c'usitic x'ayan ta jteclume, xchi'uc ti chon bolometique, laj yich'ic comel ti israeletique jech c'u cha'al albil ono'ox yu'un Dios ti Josuee.

²⁸Jech ti Josué une lic xchic' ti jteclum Haie, ti stuc slilijemal laj yicta comel ta j'ech'el jech c'u cha'al ta xvinaj avi tana le'e.

²⁹Ja'uc ti ajvalil yu'un ti jteclum Haie, joc'anat ta te' sjunul c'ac'al yu'un ti Josuee. C'alal ta xa xch'ay batel ti c'ac'ale, laj yal mantal ti ac'o yich' yalesel talele, ti batuc stelanic ta ochebal sti' ti jteclume, ti ac'o sbusanbeic epal ton ta sbae. Ti epal ton busule, xvinaj to avi tana le'e.

³⁰Va'i un, ti Josuee laj slats jun altar ta vits Ebal ta sventa ti Ajvalil ti ja' Dios yu'un ti Israele.

³¹Jech laj spas jech c'u cha'al albilic no'ox ti israeletic yu'un ti Moisese, ti ja' yajtunel ti Diose, ti co'ol sc'oplal jech c'u cha'al ts'ibabil ta svunal ta jbel c'usi albil sc'oplal yu'un ti Moisese: “Jun altar ti latsbil no'ox ta ton ti mu'yuc anbile.” Va'i un, ti israeletique laj yaq'uic chic'bil matanal ta sba ti altare, xchi'uc laj yaq'uic milbil matanal sventa ti lajesobil o'ntonale.

³²Laj taj une, ta sba ta sat ti israeletique, ti Josuee laj sts'iba ta stonal altar ti oy c'usi jbel tsots albil sc'oplal ti ac'bat yu'un ti Moisese.

³³Va'i un, scotol ti jteclume, jech c'u cha'al snitilultac ti Israele, jech c'u cha'al ti jyanlumetique, xchi'uc scotol ti moletique, ti j'opisialetique, ti jchapanvanejetique, bat svol sbaic ta sts'el xcaxail strate ti Diose, ta yeloval ti bu oyic ti pale levitaetique. Scajanojic batel ta snequebic ti caxae. Ta sventa ti lequilal ta xich'ic ti jteclum Israele, ti jvoq'ue sq'uelojic batel ti yeloval vits Guerizime. Ti jvoc' xtoque sq'uelojic batel ti yeloval vits Ebale jech c'u cha'al laj yal mantal ta sliquebal talel ti Moisese, ja' ti yajtunel ti Diose.

³⁴Ts'acal to un, ti Josuee laj yavta scotol ti c'opetic ti ts'ibabil ta svunal ta jbel ti c'usi tsots albil sc'oplale, jech c'u cha'al sc'oplal ti lequilale, xchi'uc sc'oplal ti bisel ta cotol chavale.

³⁵Scotol ti c'usi yaloj comel ti Moisese, mu'yuc jbeluc ti mu laj yavta ti Josué ta stojol scotol ti jteclum israeletique, ti capal ta antsetique, ti ta ololetique, xchi'uc ti ta jyanlumetic ti nacal ta stojolique.