Read Tzotzil 2 Tesalonicenses 1 Bible Online

2 Tesalonicenses 1 - Tzotzil bible

2 Tesalonicenses 1

¹Vu'un ti Pabloe xchi'uc ti Silvanoe, xchi'uc ti Timoteoe, ta jts'ibaboxuc talel jvuncutic ta atojolic ti jch'unolajeloxuc ti oyoxuc ta jteclum Tesalónicae, ti junoxuc ta stojol ti Jtotic Diose xchi'uc ti Cajvaltic Jesucristoe.

²Ac'o sva'an sba ta atojolic ti Jtotic Diose xchi'uc ti Cajvaltic Jesucristoe, xchi'uc ac'o yac'boxuc ti slamajemal yo'nton ta atojolique.

³Ti jech jchi'il jbatique, colaval, xichicutic ta j'ech'el ta stojol Dios ta aventaic ti xloc' venta ti jech ta jpascutique, ti jech yacal ta x'epaj ta atojolic ti c'ux ta xava'i abaic ta jujun tale, ti yacal ta x'epaj ta atojolic ti c'otem lec ta avo'ntonic ta xch'unel ti Cajvaltique.

⁴Jech o xal ti vu'uncutique ximuyubajcutic xa jamal ta xcalcutic ac'oplalic ta stojol ti jch'unolajeletic ti buch'utic yu'untac ti Diose, ti jun avo'ntonic ach'unojic ti Cajvaltique manchuc mi oy ti vocol ti ilbajinel ta atojolique.

⁵Ti jech taj une, svinajeb ti ta slequilal yo'nton sna' xchapanvan ti Diose yo' jech ta xac' ochanic batel ti bu ta xventainvane, ti jech yacaloxuc ta vocol avi tana li'e.

⁶Xloc' venta ta x'ac'bat svocolic yu'un Dios ti buch'utic yacal ta xilboxuc avocolic avi tana li'e.

⁷Ti yacaloxuc ta vocol avi tana li'e, oy bu ta xc'ot sc'ac'alil ta xac' acux avo'ntonic xchi'uc ti vu'uncutique. Taje, ja' to mi sta sc'ac'alil ta xcha'sut talel ti Cajvaltique, xchi'uc ti yaj'ánjeltac ti jelavem xu' yu'unic ti ta xvinaj ta vinajel ti volibil ta leb c'oc' ta xyal talele.

⁸Ta xtal stsits ti buch'utic mu laj sbic'tajes sbaic ta stojol ti Diose, xchi'uc ti mu'yuc laj xch'unic ti lequil ach' c'op yu'un ti Cajvaltic Jesucristoe.

⁹Ti tsitsel ta xich'ic taje, sbatel osil ts'ij xi sc'oplal ta j'ech'el, ta xtenatic loq'uel ta stojol ti Cajvaltique, mi ja'uc ta xilbeic ti smuc'ul stsatsale xchi'uc ti slequilal yutsilale.

¹⁰C'alal ta sta sc'ac'alil ta xtal ti Cajvaltique, ich'bil ta muc' ta xc'ot xchi'uc ti yu'untaque, labal ta xa'iic scotol ti jch'unolajeletique. Taje, oyoxuc ta venta ec, yu'un c'ot ta avo'nton ta xch'unel ti sc'op Dios ti laj calboxuc ava'iique.

¹¹Ja' yu'un un, mu xquicta jbacutic ta c'opojel ti'inel ta aventaic. Ta jc'anbecutic ti Diose ti lecuc xayiloxuc ti jech laj staoxuc ta iq'uele, ti ta sventauc smuc'ul stsatsale, ac'o c'otuc ta pasel yu'un ta atojolic ti c'usi lec anopojique, ti yacaloxuc ta spasel avabtelic ti jech c'ot ta avo'ntonic ta xch'unel ti Cajvaltique.

¹²Ti jech taj une, ta aventaic ta xavaq'uic ta ich'el ta muc' ti Cajvaltic Jesucristoe. Jech ti stuc eque ta xayac'oxuc ta ich'el ta muc' ta sventa yutsil slequil yo'nton ti Dios cu'untique xchi'uc ti Cajvaltic Jesucristoe.