Read Tzotzil 1 Timoteo 2 Bible Online

1 Timoteo 2 - Tzotzil bible

1 Timoteo 2

¹Xi s'elan ti tsots sc'oplal ta jc'uban ta scotole: C'opojan, ti'inanic, vocoletanic, colaval Dios, utic ta sventa scotol ti jnaclejetic ta banomile.

²Tsots sc'oplal c'oponic Dios ta stojol ti ajvaliletique, ti j'opisialetique yo' mu'yuc c'usi jna'tic, jun co'ntontic ti li' cuxulotic ta banomile, yo' jech ich'bilotic ta venta yu'un ti Diose, yo' lec ti jc'oplaltique.

³Taje, lec ta xil ti Diose, ti Jpojvanej Jcoltavanej cu'untique.

⁴Yu'un oy ta yo'nton ti scotoluc ac'o staic ti spojel scolelique yo' ac'o yojtiquinic ti bu ja' melele.

⁵Jun no'ox oy ti Diose. Jun no'ox ti Buch'u c'otem ta sventa yo' ta staic ti lec x'ileic yu'un Dios ti jnaclejetic ta banomile. Taje, ja' ta sventa ti Jesucristo ti Buch'u laj yich' sbec'tal stacopale.

⁶Yu'un ti Jesucristoe laj yac' sba ta milel yo' jech ta stojbe spojel scolel scotol ti jnaclejetic ta banomile, ti sta xa yorail laj yac' ta na'el ti Dios avi tana li'e.

⁷Yo' ta xich' albel sc'oplal taje, li'ac'bat cabtel, li'och ta jcholc'op ta yac'bel sna'ic ti jyanlumetic ti c'otuc ta yo'ntonic ta xch'unel ti Cajvaltique, xchi'uc ti bu melel ti c'ope. Ti c'usi ta xcale, jbel sc'oplal ja' melel, mu xilo'lavan.

⁸Ti buyuc no'oxe, ta jc'an ti ta sc'oponic Dios ti viniquetique, ti ta slequilaluc yo'ntonic ti ma'uc ta ile, ti ma'uc ta c'ope.

⁹Ta jc'an ec ti antsetique ti yich'uc sbaic ta c'ac'al c'u s'elan ta slap ti sc'u'ique, ma'ucuc ti nichimtic xa ta xac'be xpech' ti sjolique, ti xch'alet ta naca c'anal taq'uine, ta naca saquil c'upil sba baxtone, ti toyol stojol ta j'ech'el ti sc'u'ique.

¹⁰Ti antsetique ja'uc c'otuc ta xch'alobil ta sventa ti oyuc c'usi lec ta spasique, ti yalojic ta xtunic yu'un ti Diose.

¹¹C'alal ta xich' tojobtasel ti antse, ja' yabtel ts'ijetuc chimetuc c'alal ta xich' albele.

¹²Mi juteb xcac' que jti' ta xchanubtasvan jun ants ta tsobobbail, mi ja'uc ti spas xa ta mantal ti vinique, yu'un ja' yabtel ti ts'ijluc ta ya'yiel ti c'ope,

¹³yu'un ja' ba'yel meltsane yu'un Dios ti Adane, ts'acal to un, ti Evae.,

¹⁴Ma'uc laj ta lo'lael ti Adane, ja' ti antse. C'alal jech laj ta lo'laele, laj sta smul.

¹⁵Ja'uc ti antse ta xcol mi ta sbis sba lec ta me'ile, mi j'ech'el c'otem ta yo'nton ta xch'unel ti Cajvaltique, mi oy ti syail xc'uxul yo'ntone, mi stuc'ulanoj sbae.