Read Tzotzil 1 Timoteo 3 Bible Online

1 Timoteo 3 - Tzotzil bible

1 Timoteo 3

¹Ja' melel ma' ti xi ta xal ti c'op li'e: Ti buch'u sc'an ta x'och ya'i ta jventainvaneje, ja' ta spas jun lequil abtel.

²Jech o xal un, ti buch'u ta x'och ta jventainvaneje, sc'an ta stuc'ulan sba c'u s'elan ta xcuxi yo' lec ti sc'oplale. Sc'an tsots sc'oplal jun ti yajnile, ti lec xcuxlejale, ti tuc' sjol yo'ntone, ti yich'oj sba ta muq'ue, ti sna' xich' ta muc' yulo'tac ta xc'ot ta snae, xchi'uc lecuc xtojob ta chanubtasvanej.

³Sc'an ti ma'uc jun jyacubele, ti ma'uc jun jliquesej c'ope, ti ma'uc c'upijem yo'nton yu'un ti taq'uine, ti lecuc ti yo'ntone, ti lamajem ti yo'ntone.

⁴Sc'an ti xtojob lec c'u s'elan ta spas mantal ta yut snae, ti jch'unej-mantaluque, ti sna'uc x'ich'vanic ta muc' ti xnich'nabe.

⁵Yan mi mu xtojob c'u s'elan ta spas mantal ta yut snae, ¿c'usi xut ta stojobtas batel ti yajch'unolajel ti Diose?

⁶Ti buch'u ta x'och ta jventainvaneje, ma'uc ti buch'u ach' jch'unolajele, yu'un mi jeche, xu' ta xlic stoy sba, xu' ta sta tsots tsitsel jech c'u cha'al laj sta ti pucuje.

⁷Ja' jech xtoc sc'an lec x'ilat yu'un ti buch'u ma'uc jch'unolajele yo' jech mu xyaque ta pets' yu'un ti pucuj ti ta xyanijesbat ti sc'oplale.

⁸Jech ec ti jcoltavanej yu'un ti jventainvaneje, ta sc'an ti ja'uc lequil vinique, ti xc'ot xc'opoje, ti ma'uc c'upijem yo'nton yu'un ti taq'uine, ti ma'uc jyacubele.

⁹Ta sc'an ti j'ech'eluc stsinanojuc yo'nton ta stojol ti c'usi ja' melel ti lij'ac'bat jna'tic ti c'ot xa ta co'ntontic ta xch'unele, ti stuc'ulanoj lec sba xchi'uc ti xcuxlejale.

¹⁰Tsots sc'oplal sc'an q'uelel ba'yel mi xu' yu'un ti yabtelique. Mi vinaj ti xtojob xchi'uc ti yabtele, xu' ta x'och ta yajcoltavanej ti jventainvaneje.

¹¹Ja' jech ec, yajnilic ti yajcoltaobba ti jventainvaneje, ta sc'an yich'ojuc sba ta c'ac'al, ti ma'ucuc jun jlo'iltavaneje, ti lecuc ti stalele, ti tuc'uc scotol ti c'usi ta spasique.

¹²Tsots sc'oplal jun yajnil ti yajcoltaobba ti jventainvaneje, ti xtojob lec c'u s'elan ta spas ta mantal ti xnich'nabe, ti yut sna xtoque.

¹³Mi lec ta spas yabtel yajcoltaobba ti jventainvaneje, ich'bil ta muc', ta xvinaj ti lec ti sc'oplale. Ja' jech xtoc ta xvinaj sc'oplal ti c'otem ta yo'nton ta xch'unel ti Cristo Jesuse.

¹⁴Co'ntonuc jc'an ta xtal jq'uelot no'ox ta anil. Manchuc mi jech un, ta jts'ibabot talel ti jvun li'e,

¹⁵yu'un mi lijalije, xana' xa c'u s'elan sc'an ti ta spasic ti jch'unolajeletic ti c'otem ta yu'untac ti cuxul Diose, ti ja' ta sva'an sbaic ta spojel ti bu ja' melele, yo' mu xyanij ti sc'oplale.

¹⁶Ti c'usi c'otem ta co'ntontic ta xch'unele, vinaj ti ja' melele, yu'un cajal sc'oplal ta j'ech'el, laj to c'op ma' ti lo'il no'oxe: Ti Diose co'ol s'elan vinic laj yac' sba iluc, vinajesbat sc'oplal yu'un ti Ch'ul Espiritue, ile yu'un ti ánjeletique. Buyuc no'ox ta muc'tiquil lumetic, pucbat sc'oplal, ch'unbil c'ot ta sbejel banomil, ich'bil ta muc' c'ot ta vinajel.