Read Tzotzil 1 Timoteo 5 Bible Online

1 Timoteo 5 - Tzotzil bible

1 Timoteo 5

¹Mu xajajetuc ta stojol ti buch'u mol xae. Lecuc xavalbe ya'i ti c'usi sc'an pasele. Biso jech c'u cha'al junuc atot. Ja' jech xtoc ta stojol ti querem viniquetique, biso jech c'u cha'al junuc achi'il ta voq'uel.

²Ja' jech xtoc ti yayiletique, biso jech c'u cha'al junuc ame'. Ja' jech xtoc ti tsebetique, tuc'uc ajol ta stojol, biso jech c'u cha'al junuc achi'il ta voq'uel.

³Coltao xtoc ti me'unal antsetic ti buch'u mu'yuc c'usi x'ayan yu'unic ta j'ech'ele.

⁴Ja'uc ti jun me'unal ants mi oy ti yalabtaque, mi oy ti smamobtaque, ja'ic c'otem ta sbaic ta spaquel sutel ti c'u s'elan laj yich'ic c'uxubinel yu'un ti stot sme'ique yo' ta xchanic ec ti c'uxubinvaneje, yu'un lec ta xil Dios ti mi jech ta spasique.

⁵Ti bats'i me'unal ants ti solel stuc icom ta j'ech'ele, ti spatoj yo'nton ta stojol ti Diose, ti c'ac'al ac'ubal ta sc'anbe vocole, ti mu xicta sba ta c'opojel ti'inele, ja' sc'an c'uxubinel.

⁶Ja'uc ti jun me'unal ants ti yac'ojbe yipal ta spasel ti c'usi ta sc'an ti yo'ntone, co'ol s'elan chamem manchuc mu cuxul to.

⁷Yo' mu staic chopol c'optael ti jch'unolajeletique, albo ya'i ti jechuc me spasique.

⁸Yu'un ti buch'u mu xc'uxubin ti yuts' yalale, mi ja'uc ta xc'uxubin ti c'u yepal ta yut sna ti c'alal tsots sc'oplal sc'an c'uxubinele, ti buch'u jech taje, laj xa svalopatin comel ti ta xal c'otem ta yo'nton ta xch'unel ti Cajvaltique, xchi'uc ja' xi to smuc'ul ti buch'u ma'uc jch'unolajele.

⁹Ja'uc no'ox me ochem ta vun sbiic ti me'unal antsetic ti buch'u x'ech' ta oxvinic (60) jabil yich'oje, ti jun no'ox ti smalal ech' xchi'uque.

¹⁰Sc'an ojtiquinbilic lec c'usi laj spasic xtoc. Mi lec laj sts'itesan ti yalabique, mi xmuyubaj yo'nton yu'un yulo' ta xc'ot ta snae, mi oy laj yac' sbaic ta tunel yu'un ti jch'unolajeletique, mi laj scolta ti buch'u ta xich' svocole, mi yan ti oy c'usi lec laj spase, xu' xatic'be ta vun sbiic ti buch'u taje.

¹¹Ja'uc ti tsebal me'unal antsetique, mu xatic'be ta vun sbiic, yu'un xu' ta xlic xch'ac sbaic ta stojol Cristo ta scoj ti c'usi oy ta yo'ntonique, yu'un ta to sc'an xcha'malij ya'iic.

¹²Ta scoj ti tselbuj yu'unic ti mu'yuc ta xc'ot ta pasel ti laj yalic ta xac' sbaic ta tunele, laj xa sta smulic.

¹³Ma'uc no'ox taje, yu'un ja' no'ox ta spasic ti bu xva'vunet ta jujubej naetic ti ta xlic ch'ajubicuque. Ma'uc no'ox ti ta xch'ajubique, yu'un ta xjoybijic ta jbolesej-c'opetic. Yu'un ta xba stic' sbaic ti bu ma'uc sventaique, ti mu'yuc smelol ti c'usiuc no'ox ta sbol alique.

¹⁴Jech o xal ta jc'an ti malijicuc ti tsebal me'unal antsetique, ti c'oticuc ta yajval nae, ti ac'o sts'ites ti yalabique yo' jech mu xij'aq'ue ta lo'il maxil yu'un ti jcontrainvanejetique.

¹⁵Oy jlom me'unal antsetic laj xa xch'ac sbaic, yu'un laj xasts'acliic ta spasel ti c'usi ta sc'an yo'nton ti totil pucuje.

¹⁶Mi oy jun jch'unolaje ants ti oy me'unal ants yu'une, ac'o scolta, ma'ucuc xac'be sbain ti jch'unolajeletique yo' jech ti jch'unolajeletique xu' ta scoltaic ti yan me'unal antsetic ti buch'u mu'yuc bu xu' ta snaban sbaic ta stojole.

¹⁷Ich'biluc c'otuc ta muc' yu'unic ti jventainvanejetic ti buch'utic xtojobic ta sventainel ti jch'unolajeletique, ti ja' x'ech' tsots sc'oplal ich'biluc c'otuc ta muc' yu'unic ti buch'utic yabtelinojic ta xcholel ti sc'op Diose xchi'uc ti jchanubtasvaneje.

¹⁸Yu'un ti sc'op Diose xi ta xale: “Mu xavac'be svosal sni' ti jmaj-trigo vacaxe.” Oy bu xi ta xal xtoque: “Ti j'abtele tsots sc'oplal ta xich' ti stojole.”

¹⁹Mi ta xtic'bat smul ti jun jventainvaneje, mu xach'un ta ora, ja' to xach'un ti mi oy chib oxib rextico ta sva'an sbae.

²⁰Ti buch'u yac'ojbe yipal ta sa'el ti smule, ta sba ta sat scotolic, vulo ya'i yo' jech ta xi'ic ti yane.

²¹Ta jc'ubanbot ta stojol ti Diose, ta stojol ti Cajvaltic Jesucristoe, xchi'uc ti yaj'ánjeltac ti t'ujbil yu'une, jech me xapas batel ti c'u s'elan laj calbot ava'ie, co'ol xapas ta stojol ti jch'unolajeletique, ma'ucuc ti jeltos avo'ntone.

²²Ti buch'utic ta x'ochic ta sventainel ti jch'unolajeletique, sc'an xanop lec. Mu xava'anan ta anil yo' mu xamaquibe smul ti c'usi chopol ta spase. Q'uelo aba yo' mu xc'ot ta pasel ti c'usi chopole.

²³Ti jech loq'uel ta xa'ipaj yu'un ti ach'ute, uch'an jutebuc vino, ma'uc no'ox xavuch'ilan vo'.

²⁴Oy smulic jlom ti lec xvinaj ta q'uelel c'alal mu'yuc to ta xchapaje. Ja'uc ti jlome mu xvinaj ti smulique. Ts'acal to ta xvinaj.

²⁵Jech ec ti c'usitic lec ta xich' pasele, lec xvinaj ta q'uelel. Ti yan ti mu xvinaj ta q'uelele, ma'uc ma' ti mucul ta xcom oe, ta ono'ox xvinaj.