Read Tzotzil Tito 3 Bible Online

Tito 3 - Tzotzil bible

Tito 3

¹Vulesbo ta yo'ntonic ti jch'unolajeletique ti ac'o yich'ic ta muc' ti ajvaliletique, ti j'opisialetique. Ac'o xch'unbeic ti smantale, ti chapalicuc ta spasel ti c'usiticuc leque.

²Mu'yuc buch'u xchopol-c'optaic, ti lamajemuc ti yo'ntonique, ti oyuc slequilal yutsilal yo'ntonic ta stojol scotole.

³Yu'un ta vo'ne ti vo'otic eque, toj alticotic, toyobbaotic ta stojol ti Diose. Ch'ayemotic ta be. Ochemotic ta mosovil yu'un ti c'usi lec ta xa'i ti co'ntontique. Ja' cuxulotic ta spasel ti c'usi chopole, ti it'ix o'ntone, ti soquet to ox ti joltique, ti chopol xquilan jbatic ta jujun tale.

⁴Ja'uc ti c'alal laj yac' ta ilel syail xc'uxul yo'nton ti Cajvaltic Dios Jcoltavaneje,

⁵laj scoltaotic, ma'uc ta sventa ti oy c'usi lec laj jpastique, yu'un ja' no'ox c'uxubaj yo'nton ta jtojoltic ti laj scoltaotic ta sventa ti laj smes laj stusotic ti Ch'ul Espíritue, ti laj svoq'uesotic ta ach' ta stael ti ach' cuxlejale.

⁶Yu'un ta sventa ti Jcoltavanej Jesucristoe, mu bisbiluc laj yac'botic ti Xch'ul Espíritu ti Diose

⁷yo' jech ta sventa xc'uxul yo'nton ti Diose, lec ta xijyilotic yo' jech ta xquich'tic ti cuxlejal sbatel osil ti jmalaojtique.

⁸Taje, melel ono'ox, ja' yu'un un, ta jc'an paso tsatsal ta yalolanel yo' jech ti buch'utic ta xc'ot ta yo'ntonic ta xch'unel ti Diose, batuc yo'ntonic ta spasel ti c'usi leque. Taje, toj lec, ta xtun cu'untic jcotoltic.

⁹Ja'uc ti voch voch c'op ti mu'yuc smelole, xchi'uc sc'oplal ti smolmuc'totic ti mu xlaj ta alilanel yu'unic sc'oplale, xchi'uc ti ta svulilan sbaic ta c'op ta sventa smantal ti Moisese, mu me xatic' aba ta c'op xchi'uc. Yu'un mu'yuc c'usi xtun o, mi ja'uc oy smelol.

¹⁰Mi oy buch'u ta scoj ti ta xch'ac sbaic ti jch'unolajeletique, albo ya'i jcoj jcha'cojuc. Mi mu xich' ta muc' ti jech laj avalbe ya'ie, ta lec no'ox, ac'o stam loq'uel sbe ti buch'ue.

¹¹Yu'un sc'an xana' ti soquem sjol ti vinic taje. Ta xvinaj ti yacal ta tsobel ti smule yo' ta xbat stoj.

¹²C'alal ta jtac talel ta atojol ti Artemase, mi ja' ti Tíquicoe, ac'bo yipal xtal no'ox aq'uelun ta Nicópolis, yu'un laj xa jnop ta x'ech' cu'un ti yorail sictic ti bu taje.

¹³Coltao bu c'alal xu' avu'un ti lisensiado Zenase, xchi'uc ti Apolose, xchi'uc ti c'usitic ta xtun yu'unic ta sventa ti sbeique yo' mu'yuc c'usi vocol ta xa'iic.

¹⁴Ti c'u yepal oy ta jtojoltique, ac'o xchanic ta spasel ti c'usi leque yo' jech xu' ta xcoltavanic c'alal oy bu tsots sc'oplal ta xtune, yo' jech jtunelicuc ti li' cuxulique.

¹⁵Scotol ti c'u yepal li' jchi'inoje, chabanucot xayalbe. Chabanuc xavalbe ya'iic ti jchi'iltac jmoj jch'unojtic xchi'uque. Ac'o sva'an sba ta atojol acotolic ti Diose. Jechuc.