Read Tzotzil Filemón 1 Bible Online

Filemón 1 - Tzotzil bible

Filemón 1

¹Vu'un Pabloun, tiq'uilun ta chuquel ta sventa ti Cristo Jesuse. Ti vu'une xchi'uc ti quermanotic Timoteoe ta jts'ibabot talel ti jcarta li'e, vo'ot Filemón, ti ja' jchi'il jbatic ta abtele,

²xchi'uc ti jch'unolajeletic ti tey ta stsob sbaic ta anae, xchi'uc xtoc ti quermanotic ants Apiae, xchi'uc ti Arquipoe, ti ja' jchi'iltac ta ich' vocole.

³Ich'ic ti bendicione, ti jun avo'ntonic ti ta xac'boxuc ti Jtotic Diose xchi'uc ti Cajvaltic Jesucristoe.

⁴C'alal ta jta ta c'oponel ti Diose, tey ono'ox ta xcalbe vocol ti c'alal ta jvulesot ta co'ntone.

⁵Yu'un laj ca'i ac'oplal ti oy xc'uxul avo'nton ta stojol ti buch'utic yu'untac ti Diose, xchi'uc xtoc ti ach'unoj ti Cajvaltic Jesuse.

⁶Ti buch'utic laj xch'unic ti c'u s'elan ach'unoje, ta jc'anbe ti Diose ti ac'o ya'iic smelol scotol ti bendición ti quich'ojtic ta sventa ti Cristo Jesuse.

⁷Ximuyubaj no'ox, xpatet no'ox co'nton avu'un ti oy xc'uxul avo'ntone, yu'un vo'ot ta aventa ti laj sta spatobil yo'ntonic ti jch'unolajeletique.

⁸Ti jech jcholc'opun yu'un ti Cristoe, jech o xal un, xu' xajpas ta mantal ti c'usi sc'an ta xapase.

⁹Ja'uc ta sventa ti c'ux ta xca'i jbatique, ja' x'ech' lec ta xca'i ti ta jc'anbot ti vocole. Vu'un ti mol Pabloune, ti tiq'uilun ta chuquel ta sventa ti Cristo Jesuse,

¹⁰ta jc'anbot vocol yu'un ti Onesimoe, yu'un ja' ic'ot ta jnich'on li' ta chuquinabe, yu'un laj xch'un ti sc'op Dios ti laj calbe ya'ie.

¹¹Ta vo'ne ti Onesimoe ja' jun mosovil ti mu lecuc itun ta atojole. Avi tana un, ja' toj jtunel avu'un jech c'u cha'al ta xtun cu'une.

¹²Jech o xal un, ta ach' ta jtacbot talel ta atojol. Ic'bun me co'oluc s'elan ava'i ti vu'un tey ta xic'ote.

¹³Ti vu'une jc'anuc ca'i ti comuc ta jtojol yo' jech li' ta xtun ta aq'uexol ti c'u sjalil tiq'uilun ta chuquel ta sventa ti lequil ach' c'ope.

¹⁴Ja' no'ox mu jc'an ti jech ta jpase ti mi mu jechuc avo'ntone, yo' jech mu ta sujeluc xava'i ti ta jc'anbot ti vocole. Ja' lec, loc'uc ayanuc ta avo'nton atuc.

¹⁵Ti jech to ox laj xch'ac sba ta atojol ti Onesimoe, yu'un nan ja' smelol ti j'ech'el ta xcom o ta atojol avi tanae.

¹⁶Yu'un mu xa co'oluc jech c'u cha'al jun mosovil, yu'un x'ech' to lec, ja' mu sta ti jun mosovile. Ti lec xcaltique, yu'un ja' xa jun quermanotic ti lec ilbile. Ti vu'une toj lec ta jc'an, ja'uc ti vo'ote, x'ech'uc to ac'o ac'an. Yu'un mu xa jechuc no'ox vinic, yu'un ja' xa avermano abaic ta sventa ti Cajvaltique.

¹⁷Jech o xal un, mi jchi'il jbatic ta xava'ie, ic'bun me ti Onesimoe jech c'u cha'al ti vu'un tey ta xic'ote.

¹⁸Ti mi oy c'usi chopol laj spasbot ti laj syanijes avo'ntone, mi oy yil ta atojole, c'anbun, vu'un ta jtoj.

¹⁹Yu'un vu'un Pabloun ta jts'iba li'e ta jc'ob ta jletra jtuc ti ta jtoj ta xcale, ac'o mi oy avil cu'un ta sventa acuxlejal.

²⁰Lec un cha'e, Quermano, avocoluc ti jech ta jc'anbot ta sventa ti jch'unolajelot yu'un ti Cajvaltique. Patbun co'nton ti jech quermano jbatic ta stojol ti Cristoe.

²¹Yu'un ti jech laj jts'ibabot ti jcarta li'e, ja' ti jna' lec ti ta xach'une. Ja' jech xtoc ja' ti jna' ti x'ech' to xjelav ta xapas ti c'usi ta jc'anbote.

²²Jech xtoc cajchapano ti bu ta xicome. Yu'un jpatoj co'nton chca'i ti ta stsacboxuc ac'opic ti Diose yo' jech ta xital jq'ueloxuc.

²³Chabanuc xayalbot ti Epafrase, ti ja' jchi'il ta chuquel ta sventa ti Cristo Jesuse.

²⁴Ja' jech xtoc chabanuc xayalbot ti Marcose, ti Aristarcoe, ti Demase, ti Lucase, ti ja' ta xiscoltaic ta abtele.

²⁵Ac'o yac'boxuc bendición ti Cajvaltic Jesucristo acotolique. Jechuc.