Read Tzotzil Hebreos 1 Bible Online

Hebreos 1 - Tzotzil bible

Hebreos 1

¹Ti ta vo'nee, ep ta velta, ep ta tos, ti c'u s'elan c'opoj ti Dios ta stojol ti jmolmuc'totic ta sventa ti j'alc'opetique.

²Avi tana une, ti slajebtic xa batel ti c'ac'ale, c'opoj ta jtojoltic ta sventa ti Xnich'one. Yu'un ti Diose laj spas scotol ti c'usi oy x'ayan ta sventa ti Xnich'one, xchi'uc laj yac'be yich' scotol ti c'usitic oy x'ayane.

³Yu'un xojobin no'ox yutsilal slequilal ti Dios ta stojole, yu'un ja' stalel stuc Dios oy ta stojol. Ja' jech xtoc ta sventa smuc'ul stsatsal ti sc'ope, sbainoj scotol ti c'usitic oy x'ayane. C'alal laj stub ti jmultique, bat chotluc ta stuq'uil xocon sbats'i c'ob ti Diose.

⁴Ti Xnich'on Diose cajal c'ot sc'oplal, ja' mu sta sc'oplal ti ánjeletique. Yu'un ti stuque ac'bat yich' tsots yabtel, ja' mu sta sc'oplal ti ánjeletique.

⁵Yu'un ti Diose mi ja'uc oy bu xi laj yalbe junuc ti ánjeletique: “Vo'ot Jnich'onot, cac'ojbot acuxlejal avi tana li'e.” Mi ja'uc oy bu xi laj yalbe junuc ti ánjeletique: “Vu'un lic'ot ta Totil avu'un, lac'ot ta Jnich'on ec.”

⁶Ja'uc ti Diose ti c'alal laj stac talel ta sba banomil ti c'ajomal yo junomal ti Xnich'one, xi laj yalbe ti sc'oplale: “Scotol ti caj'ánjeltaque, ac'o yich'ic ta muc' ti Jnich'one.”

⁷Ti ánjeletique xi albat sc'oplalic yu'un ti Diose: “Yu'un co'ol ic' s'elan ma' ti yaj'ánjeltaque, co'ol s'elan jech c'u cha'al leb c'oc' ma' ti yajtuneltaque.”

⁸Ja'uc ti Xnich'on Diose xi ta x'albat ti sc'oplale: “Sbatel osil ta xachoti ta pas mantal, Ch'ul Dios, yu'un tuc' ta xaventainvan ta sventa ti avabtel avich'oje.

⁹Xamuyubaj yu'un ta spasel ti c'usi leque, laj acontrain ti c'usi chopole. Jech o xal ti Diose, ti Dios avu'une, laj st'ujot, yepal no'ox laj yac'bot ti smuyubajel avo'ntone, ja' mu sta xmuyubaj ti achi'iltaque.”

¹⁰Oy bu xi ta xal xtoque: “Ti vo'ote, Cajval, ta aventa lic meltsajuc talel ti banomile, yu'un ta avoc ac'ob laj ameltsan ti vinajele.

¹¹Scotol taje ta xlaj, ta x'ech' sc'oplal, ja'uc ti vo'ote sbatel osil mu xalaj, mu xtub o ti ac'oplale. Yu'un scotol ti c'usitic apasoje, ta xlaj jech c'u cha'al junuc ti c'u'ile.

¹²Ta xapac' jech c'u cha'al junuc ti c'u'ile. Ta xajelta scotol jech c'u cha'al ti buch'u ta sjelta ti c'u'ile. Ja'uc ti vo'ote ataoj o avav sbatel osil, yu'un mu'yuc slajeb stsutseb ti acuxleje.”

¹³Ti Diose j'ech'el mu'yuc bu xi yalojbe mi junuc ti ánjele: “La' chotlan ta sts'el jbats'i c'ob ja' to mi laj cac' ta avoc ta ac'ob ti avajcontrae.”

¹⁴Yu'un scotol ti ánjeletique, naca ch'ulelal ti ochemic ta yajtuneltac ti Diose, ti tacbilic batel ta scoltael ti buch'utic albil sc'oplalic ta staic ti scolelique.