Read Tzotzil Hebreos 13 Bible Online

Hebreos 13 - Tzotzil bible

Hebreos 13

¹Mu xavictaic ti jech c'ux ta xava'i abaic ta jujun tale, yu'un co'ol jch'unolajeloxuc.

²Oyuc slequil avo'ntonic ta xc'uxubinel ti buch'utic ta xc'ot ta anaique, yu'un oy bu jech c'ot ta pasel ti ja' ánjeletic laj yiq'uic ochel ta snaic ti mu ja'uc jutebuc laj sna'ique.

³Ja'uc achi'il ta chuquel ta xava'i ti jchuqueletique, mu xach'ay ta avo'ntonic ti jech oyic ta chuquele. Ja'uc xa avocol ta xava'i ti buch'u ta xich' ti svocolique ti xu' jech ta xc'ot ta atojolic ti vocol ti buch'u oyic ta vocole.

⁴Tsotsuc sc'oplal, ich'ic ta muc' acotolic sc'oplal ti nuplej ts'aclijele, ti junuc avo'ntonic yu'une. Yu'un ti buch'u ta xmulivaje, xchi'uc ti jlo'laej jolile, ta staic xchapanel yu'un ti Diose.

⁵Junuc avo'ntonic xchi'uc ti c'usi x'ayan avu'unique. Ma'ucuc bic'tajem avo'ntonic yu'un ti taq'uine. Yu'un xi ta xal ti Diose: “J'ech'el mi ja'uc ta jipot ta jtenot comel.”

⁶Patetuc co'ntontic ti xi caltic un cha'e: “Mi ja'uc jtsiq'ues co'nton, yu'un ja' Cajcoltavanej ti Cajvale. ¿Mi oy la c'usi xu' chopol ta xispasbun ti vinique?”

⁷Mu xach'ay ta avo'ntonic ti buch'utic laj xchanubtasoxuque, ti laj yalboxuc ava'iic ti sc'op Diose. Nopic lec c'u s'elan ti xcuxlejal ech'ique. Chanbeic yo'nton ti c'u s'elan c'otem ta ch'unel yu'unique.

⁸Yu'un ti Jesucristoe staoj yav yo'nton ti c'u s'elan ti voljee, avi tana li'e, ti sbatel osile.

⁹Mu xalajic ta lo'lael ta xchanel yan c'opetic ti yan o ta a'yiele. Ja' lec, yich'uc yip co'ntontic ta sventa syail xc'uxul yo'nton ti Diose. Ma'ucuc batem ta o'ntonal ta xchanel sc'oplal ti ve'liletique, ti j'ech'el mu'yuc c'usi ta tael yu'une.

¹⁰Yu'un ti vo'otique oy xa yan stojol jmultic ti mu ja'uc xu' ta slajesic ti paleetic ti abtejic ta vo'neal ch'ulnae.

¹¹Yu'un ti banquilal paleetique ta xich' ochel xch'ich'el ti chon bolometic ti bu c'otem ta sventa ta xich' aq'uele, matanaletic yo' ta xch'ay ti mulile. Sbec'tal ti chon bolometic taj une, ta xich' chiq'uel ta loq'ueltic xa batel ti bu oy ti jteclume.

¹²Ja' jech ec ti Jesuse laj yich' svocol ta milel ta loq'ueltic yu'un ti jteclume yo' ta sventa xch'ich'el stuc ta spoc ta stus ti jteclume.

¹³Batic ta sts'acliel ti Jesús ta loq'ueltic yu'un ti jteclume. Quich'tic labanel ec jech c'u cha'al laj yich' ti stuque.

¹⁴Ti li' ta banomile, mu'yuc jteclumaltic ti ta xjalij oe, yu'un yacalotic ta sa'el batel ti jteclumaltic ti oy sc'oplal ta xvul ta loq'uele.

¹⁵Jech o xal tsots sc'oplal calbetic slequilal Dios ta sventa ti Jesucristoe. Ti jech ta xcalbetic slequilal ti Diose, ja' jech matanal sc'an ta xcac'betic ti Diose. Oyuc ta que ta jti'tic ta yalbel yutsilal slequilal ti Diose.

¹⁶Mu xach'ay ta avo'ntonic ta spasel ti c'usi leque, ta scoltael abaic ta jujun tal ta sventa ti c'usi oy x'ayan avu'unique, ti ja' jun matanal lec ta xil ti Diose.

¹⁷Ch'unic pasel ta mantal yu'un ti buch'u ta sbijubtasoxuque, ti buch'u ta xchanubtasoxuque. Yu'un ti stuquique sbainojic ta xchabiel ti ach'ulel avanimaique, ja' ti sna'ic lec ta x'ich'bat ye sti'ic yu'un ti Diose. Mu yauc c'uxuc xava'i ta spasel ti lequil abtele. Yan mi mu jechuque, mu'yuc c'usi ta xataic unbi.

¹⁸C'oponic Dios ta jtojolcutic. Oy ta co'ntoncutic ti oy yutsil slequil co'ntoncutic ta stojol scotol, yu'un ta jc'ancutic ti mu'yuc c'usi ta xal ti co'ntoncutique.

¹⁹Tsots sc'oplal ta jc'an xac'oponic Dios ta jtojol yo' jech ta xtal jq'ueloxuc no'ox.

²⁰Ti Diose laj xcha'cuxes ti Cajvaltic Jesucristo ti Buch'u c'otem ta Banquilal Jq'uel-chije, yu'un ja' ta sventa xch'ich'el chapaj sc'oplal ti ach' trate sventa sbatel osile.

²¹Ti Dios taje, ti ta xac' jun o'ntonale, ac'o xastojobtasoxuc yo' jech ta xapasic scotol ti c'usi lec ta xile, ti c'otuc ta pasel yu'un ta jtojoltic ti c'usi lec ta xa'i ti stuc ta sventa ti Jesucristoe. Ich'biluc ta muc' sbatel osil ti Jesucristoe. Jechuc.

²²Ti jech co'ol jchi'il jbatique, ta jc'anboxuc vocol ti ts'icuc cuchuc avu'unic ti c'u s'elan laj jbijubtasoxuc jbel cha'bel ta jlic vune.

²³Ta xcalboxuc ava'iic ti loc' xa ta chuquel ti jchi'iltic Timoteoe. Mi tal no'oxe, ta jchi'in talel c'alal ta xtal jq'ueloxuque.

²⁴Chabanuc xavalbe ya'i ti buch'utic ta xchanubtasoxuque, xchi'uc scotol ti buch'utic c'otem ta yu'untac ti Diose. Chabanuc xayalbeic ti jch'unolajeletic ti li' oyic ta Italiae.

²⁵Acotolic ac'o sva'an sba ta yaq'uel slequilal ti Dios ta atojolique. Jechuc.