Read Tzotzil Hebreos 4 Bible Online

Hebreos 4 - Tzotzil bible

Hebreos 4

¹Ti jech albil to sc'oplal ti xu' ta xba jcux co'ntontic bu oy ti Diose, ta sc'an ac'o jq'uel jbatic, naca mi oy jlom avu'unic ti mu x'ochic batele.

²Yu'un ti vo'otic xtoque laj quich'tic albel sc'oplal ti colebal lequil ach' c'ope jech c'u cha'al ti stuquique. Ja'uc ti stuquic une mu'yuc c'usi bal o laj ya'iic ti laj yich'ic albel sc'oplal ti ch'ul c'op taje, yu'un mu'yuc xc'ot ta yo'ntonic ta xch'unel ti c'usi laj ya'iique.

³Ja'uc ti vo'otic ti c'ot xa ta co'ntontic ta xch'unel ti colebal lequil ach' c'ope, jbel sc'oplal ta xij'och batel ta cuxob o'ntonal taje. Yu'un xi albat sc'oplalic yu'un Dios ta xava'iic une: “Li'ilin yu'un ti amolmuc'totique, ti j'ech'el laj jva'an jba ta yalel ti mu xcac' que jti' ti xu' x'ochic batel ti bu ta jcux co'ntone.” Manchuc mi jech laj yal ti Dios une, c'alal ta sliquebal ono'ox banomil, tsutsem xa talel ti yabtele yo' xu' ta xij'och batel ta cuxob o'ntonal.

⁴Yu'un oy bu xi ta xal ta ch'ul c'op sc'oplal ti yucubal c'ac'ale: “Ta yucubal c'ac'al laj xcux yo'nton ti Diose, yu'un tsuts scotol ti yabtele.”

⁵Manchuc mi jech chapal yu'un ti Diose, ja'uc le'e, xi ta xal xtoc ta ch'ul c'ope: “J'ech'el mu x'ochic batel ti bu ta jcux ti co'ntone.”

⁶Ja'uc le'e, oy to jlom xu' ta x'ochic batel ta cuxob o'ntonal. Yan ti buch'u ba'yel laj ya'iic sc'oplal ti colebal lequil c'ope, laj to sc'oplal ta x'ochic batel ta scoj ti mu laj xch'unique.

⁷Jech o xal ti Diose laj st'uj yan c'ac'al, “ja' ti c'ac'al avi tana li'e”, ti xi sc'oplale, ti laj yal talel ta vo'ne ta sventa ti David ti oy bu xi ta xal ti ch'ul c'op ti laj ono'ox calboxuc ava'iique: “Mi vo'oxuc ta xava'iic c'usi ta xal ti Dios avi tana li'e, mu xayijubtas avo'ntonic.”

⁸Ti yu'unuc ta sventa Josué ti laj xcux yo'nton ti israeletique, mi ja'uc laj yal ti Dios ti oy to yan c'ac'ale.

⁹Ja' yu'un un, oy to lequil cuxob o'ntonal yu'unic ti xnich'nabtac ti Diose.

¹⁰Yu'un ti buch'u ta x'och ta cux o'nton xchi'uc ti Diose, ta xa xcux yo'nton ta sventa ti yabtele jech c'u cha'al ti Dios laj xa xcux yo'nton ta sventa ti yabtele.

¹¹La' cac'betic yipal un cha'e yo' jech xu' xij'och batel ta cuxob o'ntonal taje, naca mi oy jlom ja' ta xchanbe yo'ntonic ti buch'utic mu'yuc xc'ot ta yo'ntonic ta xch'unele.

¹²Yu'un ti sc'op Diose, cuxul, oy stsatsal, ja' mu sta jech ti c'usuc no'ox espadail ti yich'oj cha'jot yee. Yu'un ta xc'ot c'alal to yut o'ntonal, ti bu xa c'alal ti c'usi ta snopilane, ta svinajesel ti c'usi oy ta yut yo'ntone.

¹³Ti c'usitic pasbil yu'un ti Diose, mu stac' snac' sbaic ta stojolal. Chajal ta sba ta sat scotol ti Buch'u ta xich' quetique.

¹⁴Ti Jesús Xnich'on ti Diose ja' xa ti Muc'ul Banquilal Pale cu'untique, ti och xa batel ta vinajel bu oy ti Diose. Jech o xal un, staojuc yav co'ntontic ta xch'unel ti c'u s'elan jch'unojtique.

¹⁵Yu'un ti Banquilal Pale cu'untique ta xc'uxubaj yo'nton yu'un ti jvocoltic ta scoj ch'abal ti yipal cu'untique. Yu'un ti stuque laj ya'i c'u s'elan ti vocol jech c'u cha'al ta xca'itique. Ja' no'ox un, ti stuque mu'yuc x'ech' xjelav ta stael ti smule.

¹⁶Ja' yu'un un, sjunuluc co'ntontic, nopajcutic batel ta stojol ti bu chotol ti jc'uxubinvanej Dios cu'untique, yo' ta sventa yutsil slequil yo'nton ta xc'uxubaj cu'untic c'alal mu xa cha'bel c'usi xcut jbatic c'alal yorail ta xtun cu'untic ti coltaele.