Read Tzotzil Hebreos 5 Bible Online

Hebreos 5 - Tzotzil bible

Hebreos 5

¹Ti jujun banquilal pale ti ta x'ech'ique, t'ujbilic loq'uel ta stojol ti viniquetique, ti va'anbilic ta j'et'esej-c'op yu'un ti jnaclejetic ta banomil ta stojol ti Diose, ti c'otem ta sbaic ta sjelubtasel ti matanale, xchi'uc ti c'usitic ta xich' milel sventa stojol ti smulique.

²Ti jech ta xa'i svocol ta sbec'tal stacopal stuc ti banquilal palee, jech o xal un, ta xc'uxubaj yo'nton yu'un ti buch'u mu sna'ic ti c'usi lec ta pasele, xchi'uc ti buch'utic ch'ayemic ta bee.

³Ta scoj ti jech oy svocol yu'un ti sbec'tal stacopale, jech o xal un, tsots sc'oplal ta xac' stojol smul ta stojol ti Diose jech c'u cha'al ta xet'esbe stojol smulic ti jnaclejetique.

⁴Yu'un mu'yuc buch'u junucal ta smantal no'ox stuc ta x'och ta banquilal pale, ic'bil t'ujbil yu'un ti Diose yo' ich'bil ta muc' ta xc'ot xchi'uc ti yabtele jech c'u cha'al ti Aarone.

⁵Ja' jech c'ot ta stojol ti Cristoe. Mu yu'unuc laj spas sba ta mantal stuc ti jech och ta Banquilal Palee, iq'ue t'uje yu'un ti Diose, ti ac'bat yich' ti yabtele jech c'u cha'al ti xi albat yu'un ti Stote: “Vo'ot Jnich'onot, yu'un laj cac'bot acuxlejal avi tana li'e.”

⁶Yu'un oy bu ts'ibabil ta ch'ul c'op ti xi albat sc'oplale: “Paleot sbatel osil ma' ti vo'ote, ti co'ol avabtel jech c'u cha'al ti Melquisedeque.”

⁷Ti c'u sjalil ay cuxiuc li' ta sba banomil ti Cristoe, tsots xvocolet c'opoj ti'in, ep laj smal ya'lel sat ta sc'anbel vocol ti Dios ti Buch'u oy stsatsal ta xpoje c'alal mi xchame. A'yibat sc'opojel ta sventa ti laj spas ti c'usi oy ta yo'nton ti Diose.

⁸Manchuc mi Nich'onil ti Cristoe, ta sventa ti c'ot ta stojol ti vocole, laj xchan ta spasel ti c'usi oy ta yo'nton ti Diose.

⁹Ti c'alal laj spas scotol ti c'usi oy ta yo'nton ti Diose, c'ot ta banquilal Jcoltavanej yu'unic sbatel osil ti buch'utic ta xc'ot ta yo'ntonic ta xch'unele.

¹⁰Va'ane ta Banquilal Pale yu'un Dios co'ol jech c'u cha'al yabtel ti Melquisedeque.

¹¹Ac'o mi yepaluc xcalcutic ava'iic sc'oplal taje, ja' no'ox un, toj vocol ta a'yibel ti smelole, yu'un vocol ta xc'ot ta avo'ntonic.

¹²Ti jechuque, jchanubtasvanejoxuc xa, yu'un vo'ne xa c'otem ta avo'ntonic ta xch'unel talel. Ti le' une, uni chu'il to avipanojic, yu'un ta to xac'an ac'o avich'ic albel ta ach' ti sc'op Dios ti bu mu tsotsuc ta a'yibel ti smelole, mi ja'uc xti' avu'unic ti yijil ve'lile.

¹³Yu'un ti buch'u naca uni chu'il yipanoje, co'ol s'elan olol, mi ja'uc sna' st'ujel ti c'usi leque xchi'uc ti c'usi chopole.

¹⁴Yan ti buch'u ta xtojob ta sti'el ti yijil ve'lile, ja' ti buch'u ch'iemic c'opojemic xa ta stojol ti Diose, yu'un xtojobic xa ta st'ujel ti c'usi leque xchi'uc ti c'usi chopole.