Read Tzotzil Hebreos 6 Bible Online

Hebreos 6 - Tzotzil bible

Hebreos 6

¹Jech o xal la' cac'betic yipal ta snopel ti c'usi lec ta pasele yo' ta stsac lec yip ti snopbenal cu'untique. Mu staojuc yav ta xcalilantic sc'oplal ti c'u s'elan chanubtasvan talel ti Cristoe. Ma'uc ti jmojel no'ox staoj yav ta xcalilantic ti c'u s'elan laj ca'itic talel ta ba'yele, jech c'u cha'al sc'oplal jeluc ti snopbenale, jech c'u cha'al sc'oplal ta xicta ti c'usi chopol ta pasel ti chamebal sq'ueloj batele, jech c'u cha'al sc'oplal ti c'otuc ta o'ntonal ta xch'unel ti Diose,

²jech c'u cha'al sc'oplal chanubtasel yu'un ti ich' vo'e, sc'oplal scajanel ti c'obil ta jolale, sc'oplal ta xcha'cuxiic ti animaetique, xchi'uc sc'oplal ti sbatel osil ta xich'ic tsitsel ti buch'u oy smulique.

³X'ech'uc to cac'tic batel yipal ta ya'yiel ti sc'op Diose. Jech ta jpastic mi ta xac' ye sti' ti Diose.

⁴Yu'un ti buch'utic laj xa staic ti saquilal osile, ti laj xa ya'ibeic slequilal yutsilal ti c'usi ta xac' ti Diose, ti yich'oj ti Ch'ul Espiritue,

⁵ti laj ya'ibeic slequil yutsil ti lequil ach' c'op yu'un ti Diose, ti laj ya'ibeic sc'oplal smuc'ul stsatsal ti ach' banomil ta xvul ta loq'uele,

⁶mi ta xch'ay ti xch'unajel yo'ntone, mu xa cha'bel c'usi stac' utel yo' ta xnopaj talel ta stojol ti Diose, yu'un ja' stuquic ta xcha'jipanic ta curus Xnich'on ti Diose, ti ta xaq'uic ta labanel ta sba ta sat scotol ti jnaclejetique.

⁷Yu'un c'otem jech c'u cha'al junuc banomil ti lec ta xa'i xuch'ilan vo' c'alal ta xtalolan jujucoje. Ti banomil taje, sva'anoj sba ti Dios ta stojol mi ta xac'be lec sat sts'unob ti buch'u ta xabtelane.

⁸Mi naca ch'ix, mi momol ta xaq'ue, mu'yuc c'usi stu o, mu lecuc ta x'ile yu'un ti Diose. Sta yorail, chic' xi ta c'oc'.

⁹Ti jech jchi'il jbatique, manchuc mi jech laj calcutic, mu jechuc avo'ntonic. Jna'cutic ti jbel sc'oplal atamojic batel sbelel ti coltaele.

¹⁰Yu'un ti Diose oy stuq'uil yo'nton, mi ja'uc xch'ay ta yo'nton ti ta sventa syail xc'uxul avo'ntonic oy c'usi lec laj apasic ti laj avaq'uic iluc ta scoltael ti jch'unolajeletique, ti jech to yacal ta xapasic avi tana li'e.

¹¹Ja'uc le'e, ta jc'ancutic ti jujunoxuque ti jechuc staojuc yav avo'ntonic xacham xalajic ti c'ux ta xava'i abaique yo' jech ta jbel sc'oplal ta xataic ti oy c'usi amalaojique.

¹²Mi ja'uc ta jc'ancutic ti ta xach'ajubic ta bee. Ja' tamic ta spasel jech c'u cha'al ti buch'utic c'otem ta yo'ntonic ta xch'unel ti ta ono'ox xc'ot ta pasel ta yich'el ti smotonic ti albilic yu'un ti Diose, ti mu xchibaj ta smalaele.

¹³Ti Diose c'alal laj yalbe ya'i ti Abraham ti oy c'usi ta xac'bee, laj sva'an sba ta rextico stuc, yu'un mu'yuc xa yan ti oy bu buch'u x'ech' to cajal sva'anel sba ta rexticoe.

¹⁴Yu'un xi laj yale: “Melel, ta jva'an jba ta atojol ta yac'belot ti alequilal avutsilale, yu'un yepal no'ox anitilultac ta xcac'bot.”

¹⁵Ta sjunul yo'nton laj smala ti Abraham ti oy c'usi albate. Jech o xal laj yich' ti oy c'usi albat yu'un ti Diose.

¹⁶C'alal oy c'usi ta sva'an sbaic ta snopel ti buch'uuc no'oxe, ta sva'anic yan rextico ti buch'u x'ech' to cajal sc'oplal yu'unique. C'alal c'ot ta nopel yu'unic ti c'usi laj yalique, mu xa stac' jelel ti c'u s'elan c'ot ta nopel yu'unique.

¹⁷Lec un cha'e, ja' jech ti Diose jbel sc'oplal sc'an svinajes ti jech bejel com o ti c'u s'elan laj sva'an sba ta rextico ta yalel ti oy c'usi ta xac'be yich'ic ti buch'utic ta xich'ic ti rextoil ti laj sva'an sba ta yalele.

¹⁸Ja' yu'un un, ta sventa ti cha'bel taje, ti jbel sc'oplal mu stac' jelele, xchi'uc ti mu sjut c'op ti Diose, xpatet to co'ntontic yu'un ti jech laj xa jsa'tic jpojel jcoltaeltic ta stojole.

¹⁹Ti patob o'ntonal taje, ja' ta xac' jna'tic ta co'ntontic ti lec ts'unulotic ta stojol ti Diose, co'ol s'elan jech c'u cha'al jcot barco ti lec cotol c'alal ic'bil lec yu'un ti yicobe. Ja' jun patob o'ntonal ti jelav xa ech'el ta spat ti bu oy ti muc' ta jilich' poc' ta ch'ulna ti oy ta vinajele.

²⁰Ti Jesuse och xa batel ta sjamel ti jbetique, ti j'ech'el ja' xa c'ot ta Banquilal Pale jech c'u cha'al ti Melquisedeque.