Read Tzotzil Santiago 5 Bible Online

Santiago 5 - Tzotzil bible

Santiago 5

¹A'yio ava'iic li'e, jc'ulejetic, oc'anic, avananic yu'un ti vocol ta xc'ot ta atojolique.

²Xlilet sc'a'emal ma' ti ac'ulejalique. Setbil ti'bil ta chon ma' ti ac'u'ique.

³Ch'och'omtic ta xcux ti oro ti plata avu'unique. Ti jech ch'och'omtic ta cuxinele, ja' svinajeb ti mu'yuc c'usi x'ayan avu'unique, ti ta stsajub asatic ta q'uexlal yu'une. Yu'un ja' o laj avac'beic yipal ta stsobel ac'ulejalic c'alal slajebtic xa batel ti c'ac'ale.

⁴Ti j'abteletic ti buch'utic mu'yuc laj avac'beic stojol c'alal laj stsobic ti ats'unubalique, ta sc'anic parte. Ja' yu'un un, ti Dios ti scotol xu' yu'une, laj xa yil ti x'oc'lajetic ti j'abteletique.

⁵Li' ta banomile, laj xa avac'be abaic scotol ti c'usi xal ti avo'ntonique, ti scuts'et anuq'uic yu'un ajubemalic jech c'u cha'al ti vacax ti xc'ot yorail ta xich' milele.

⁶Yu'un ti vo'oxuque laj asa'beic smul, laj amilic ti buch'utic ch'abal ti smulique, mi ja'uc laj spac ti sc'oplalique.

⁷Ja'uc ti vo'oxuque, Jchi'iltac, oyuc smuc'ul avo'ntonic ta smalael ta xtal ti Cajvaltique. Q'uel avil ti buch'u ta xchabaje, oy smuc'ul yo'nton smalaoj ta xtal ti vo'e yo' jech ts'acal to ta stsob ti sts'unubale.

⁸Jechucoxuc ti vo'oxuque, oyuc smuc'ul avo'ntonic, mu xatsiq'ues avo'ntonic, yu'un po'ot xa sc'an xtal ti Cajvaltique.

⁹Jchi'iltac, mu xasa'be aba amulic ta jujun tal yo' jech mu xavich'ic chapanel, yu'un ti Jueze, va'al xa talel ta ti' nae.

¹⁰Jchi'iltac, jechuc smuc'ul avo'ntonic ta sts'iquel avocolic jech c'u cha'al ts'ic cuch yu'unic ti j'alc'opetic ta vo'ne ti c'alal c'opojic ta sventa ti Cajvaltic Diose.

¹¹Ti vo'otique yan yutsilic ta xca'itic ti buch'utic oy yipal yu'unic ta sts'iquel ti svocolique. Ava'binojic xtoc oy smuc'ul yo'nton ti Jobe, xchi'uc ti c'u s'elan coltae yu'un ti Cajvaltic Dios ta ts'acale, yu'un ti Diose oy slequil yutsil yo'nton.

¹²Ja'uc le'e, Jchi'iltac, xi s'elan ma' ti tsots sc'oplal ti mu'yuc c'usi xava'anic ta rexticoe: mi ja'uc ti vinajele, ti banomile, mi yan c'usi jtosucal. C'alal ta xavalic “jech”, yu'un jech ono'ox. C'alal ta xavalic “mu jechuc”, yu'un mu jechuc ono'ox, yo' mu xataic chapanel yu'un ti Diose.

¹³Mi oy buch'u yacal ta vocole, c'opojuc ti'inuc ta stojol ti Diose. Mi oy buch'u xmuyubaje, q'uejinuc yu'un ta sq'uejoj ti Diose.

¹⁴Mi oy buch'u ip ta xa'ie, yic'uc talel ti buch'u sventainoj ti jch'unolajeletique ta sc'oponel Dios ta stojol, xchi'uc ta sventauc ti Cajvaltique, xjaxbeicuc aceite.

¹⁵Mi c'otem ta avo'ntonic ta sva'an sba ti Cajvaltic c'alal ta xac'opoj xati'inique, ta xcol ti jchamele, ta xtoye liquel yu'un ti Cajvaltique. Mi oy bu staoj smule, ta xch'aybat.

¹⁶Jech o xal un, jamal albo abaic ti amulic ta jujun tale. C'oponbo abaic Dios ta jujun tal yo' jech ta xacolic. Sc'opojel sti'inel ti lequil tuq'uil vinique, oy yip stsatsal ti sc'opojele.

¹⁷Ti j'alc'op Eliáse, ja' jun vinic jech c'u cha'al ti vo'otique. C'alal ta yutil yo'nton c'opoj ti'in ta sc'anbel Dios ti mu xac' taluc ti vo'e, c'ot ta pasel ti o'lol xchanibal jabile, mu'yuc xac' vo' ta banomil.

¹⁸Ta ts'acal to un, c'alal lic c'opoj ti'inuc xtoque, tal ti vo'e, lic ch'iuc talel ti c'usitic ta xac' ti banomile.

¹⁹Jchi'iltac, mi oy buch'u junucal avu'unic laj xch'ac sba loq'uel ta stojol ti bu ja' melele, mi oy buch'u ti ta xic' sutel talele,

²⁰na'ic me lec, ti buch'u laj scolta loq'uel talel ti bu chopol stamoj batele, laj xa scolta yo' mu ch'ayeluc ta xbat o, ja' jech no'ox xtoc, ta xch'aybat ti yepal no'ox ti smul staoje.