Read Tzotzil 1 Pedro 4 Bible Online

1 Pedro 4 - Tzotzil bible

1 Pedro 4

¹Ti jech laj yich' svocol ta sbec'tal ti Cristoe, ta sc'an ti jechuc avo'ntonic ec c'alal ta xavich' avocolique. Yu'un ti buch'u laj xa yich' svocol ta scoj ti sbec'tal stacopale, laj xa yicta comel ti mulile,

²yo' ja' xa no'ox ta spas ti c'usi ta sc'an ti Dios ti c'u sjalil cuxule, ma'uc xavac'be abaic c'usi ta sc'an ti avo'ntonique.

³Yu'un jal xa laj apasolanic talel ti c'usi chopole jech c'u cha'al ti buch'utic yan yajvalique. Yu'un ja' to ox atamojic ti c'usi chopole, ti c'usi ta sc'an avo'ntonique, ti yacubele, ti xavochlajetic ta spasel ti q'uine, ti mu bisbiluc ti yacubel laj apasique, ti laj avich'ic ta muc' ti c'usitic meltsanbil ta c'abale.

⁴Avi tana ti stuquic une, labal ta xa'iic ti c'alal ta xilic ti mu'yuc xa ta xachi'inic ta spasel ti c'usi chopole, xchi'uc chopol ta xc'opojic ta atojolic.

⁵Ja'uc ti stuquique ta ono'ox x'ich'bat yeic yu'un ti Buch'u xchapanoj xa sba ta xchapanel ti buch'u cuxulic toe xchi'uc ti buch'u chamemic xae.

⁶Jech o xal laj yich'ic albel lequil ach' c'op ti buch'u chamemique yo' jech ta xcuxi ti xch'ulelic jech c'u cha'al cuxul ti Diose, manchuc mi oy sc'oplal ta xich'ic chapanel jech c'u cha'al ti jnaclejetic ta banomile.

⁷Tsots sc'oplal batuc avo'ntonic ta sc'oponel sti'inel ti Diose yo' jech xtojob lec ti snopbenal avu'unique, yu'un po'ot xa sta yorail ta xlaj scotol ti c'usitic oye.

⁸Ma'uc no'ox taje, tsots sc'oplal ti yepaluc oyuc ti syail xc'uxul avo'ntonic ta jujun tale. Yepal no'ox mulil ta xch'ay yu'un ma' ti syail xc'uxul o'ntonale.

⁹Ti jujunoxuque, ich'ic ta muc' ti buch'utic ta xasvu'lanoxuque, ma'uc me “¿c'u cha'al un cha'e?” ti xachiique.

¹⁰Jechuc atalelic jech c'u cha'al ti lequil jtunel ta sventa ti yalel toyol la'ac'bat abijilic yu'un ti Diose. Ja' jech xatunic yu'un ti yan ta sventa ti c'u s'elan la'ac'bat ti abijilique.

¹¹Mi oy buch'u ta xc'opoje, jechuc c'opojuc jech c'u cha'al ta xal ti sc'op Diose. Mi oy buch'u ta xac' sba ta tunele, ac'o spas ta sjunul yip ti bu c'alal ac'bil yu'un ti Diose. Pasic scotol ti c'usi sc'an pasele yo' jech ich'bil ta muc' ta xc'ot ti Dios ta sventa ti Jesucristoe, ti oy ta sventa ti lequilal utsilale, xchi'uc ti smuc'ul stsatsale. Yu'un sbatel osil ta spas mantal. Jechuc.

¹²Ti jech c'uxoxuc ta co'ntone, Jchi'iltac, ma'uc ti toj ch'ayaluc xc'ot ach'ulelic yu'un ti c'alal ta xc'ot ta atojolic ti tsots lajeltsaele, ti mu'yuc bu jech xvinaj xc'ot ta pasele.

¹³Ja'uc le'e, junuc avo'ntonic yu'un ti jech ta xavich' avocolic jech c'u cha'al ti Cristoe yo' jech xamuyubajic xa c'alal ta xavilic ti yutsil slequilal c'alal ta sut talele.

¹⁴Muyubajanic no'ox mi ta sventa Cristo ta xavich'ic chopol c'optaele. Ti Ch'ul Espíritu yu'un ti Diose, ti xojoban no'ox yutsile, oy ta atojolic.

¹⁵Mi oy buch'u junucal avu'unic ta xich' svocole, mu me ja'uc ta scoj ti milvaneje, ti elec'ale, ti c'usi chopol ta spase, ti ta stiq'uel sbaic ti bu ma'uc sventaique.

¹⁶Yan mi ja' ta xich' svocol ta sventa ti jech jch'unolajele, mu me xq'uexav yu'un, ac'o yalbe slequilal ti Diose.

¹⁷Yu'un sta xa yorail ti ta xich'ic chapanel ti yalab xnich'nabtac ti Diose. Mi jech lic xa ti chapanel ta jtojoltique, ¿c'u xa ono'ox s'elan ta xc'ot ta stojolic ti buch'utic mu'yuc c'otem ta yo'ntonic ta xch'unel ti lequil ach' c'op yu'un ti Diose?

¹⁸Mi vocol ta xcolic ti buch'u oy slequil stuq'uilique, ¿c'u xa ono'ox s'elan ta xc'ot ta stojolic un cha'e ti buch'utic mu'yuc xch'ulel xa'i sbaique, xchi'uc ti jsa'muliletique?

¹⁹Ti buch'u ta xich' svocolic ta sventa ti jech loc' ayan ta yo'nton ti Diose, staojuc yav, ac'o spasic ti c'usi oy slequil stuq'uile, xchi'uc ac'o sc'uban ti xch'ulel yanimaic ta stojol Dios ti Buch'u ac'bun ti xch'ulelique, yu'un jbel sc'oplal ta xc'ot ta pasel ti c'usi yaloje.