Read Tzotzil 1 Pedro 5 Bible Online

1 Pedro 5 - Tzotzil bible

1 Pedro 5

¹Ti jech quich'oj cabtel ta sbainel ti jch'unolajeletique, xchi'uc ti rexticoun ti c'u s'elan laj yich' svocol ti Cristoe, xchi'uc ti oy ta jventa ta yich'el ti slequil ti c'alal ta xvul ta loq'uele, xi ta jbijubtas ti jchi'iltac ti buch'utic co'ol quich'oj cabtelcutic ta sbainel ti jch'unolajeletic ti oy ta tsobobbail avu'unique:

²Jechucoxuc jech c'u cha'al junuc lequil jq'uel-chij ta sq'uelel xchijtac Dios ti ac'biloxuc ta abaique. Ta sjunuluc avo'ntonic, pasic jech c'u cha'al oy ta yo'nton ti Diose, ti ma'uc ta sujele, ti ma'uc no'ox oy ta avo'ntonic ta stsaquel ti taq'uine. Ta yutsiluc avo'ntonic xapas ti avabtelique.

³Mu xanopic ti ajvalil xa xava'i abaic ta stojol ti chijetic ti abainojic ta sq'uelele. Ja' ta sc'an ti ta xaq'uic persa ta yaq'uel iluc ti c'usi lec ta pasel ta stojol ti chijetique.

⁴C'alal ta xvul ta loq'uel ti Banquilal jq'uel-chije, ti vo'oxuque jun yutsil ta xa'ac'bat amotonic ti mu xco'olaj jech c'u cha'al ti xotbil nichim ti sna' xtaquije.

⁵Ja' jechoxuc ec, queremetic, ch'unbeic smantal ti buch'utic yich'oj yabtelic ta atojolique. Nijano chimano abaic ti jujunoxuque. Jmojuc avo'ntonic acotolic, yu'un xi ta xal ti ch'ul c'ope: “Ti Diose ta scontrain ti buch'u toyobba xa'i sbaique. Ta yutsil slequil yo'nton ta scolta ti buch'utic biq'uit ta xac' sbaique.”

⁶Nijano chimano abaic ta yolon smuc'ul stsatsal yoc sc'ob ti Diose yo' jech ta xayac'oxuc ta ich'el ta muc' c'alal ta sta yoraile.

⁷Ti jech xvulvun avo'ntonique, ac'beic ta yoc ta sc'ob ti Diose, yu'un oy ta yo'nton ta scoltaoxuc.

⁸Bijanic me, vic'luc me ti asatique, yu'un ti avajcontraic pucuje, co'ol s'elan león x'avet ta xanav ta sa'el ti buch'u ta smil ya'ie.

⁹Ta sventa ti c'otem ta avo'ntonic ta xch'unel ti Cajvaltique, tsalbiluc c'otuc avu'unic yabtel ti pucuj ti oy ta atojolique. Yu'un xana'ic ti jech ta sbejel banomil ti buyuc no'ox oyic ti co'ol jch'unolajeloxuque, jech ta xich' svocolic ec jech c'u cha'al ti vo'oxuque.

¹⁰Ta ts'acal to un, mi ech' cuch avu'unic c'u sjalil ti vocole, jech ti Diose ta xac'boxuc alequilalic, ta xac' avipic yo' ta xats'inan abaic ta stojol. Ja' no'ox stuc ti Diose, ta sventa ti yutsil slequil yo'ntone, laj staoxuc ta iq'uel yo' jech ta xavich'ic ti yutsil slequilal sbatel osil ta sventa ti junoxuc xchi'uc ti Cristoe.

¹¹Ac'o spas mantal stuc sbatel osil ti Diose. Jechuc.

¹²Ti Silvanoe, ti jun yo'nton quiloje, laj scoltaun ti jech laj jc'oponoxuc ti jbel cha'bel ta jvune. Yu'un ta jtsatsubtas avo'ntonic, ta jbejan ta ajolic ti ja' melel ti lequilal laj ataic ta sventa syail xc'uxul yo'nton Diose. J'ech'eluc tsinano avo'ntonic ta sventa ti syail xc'uxul o'ntonal taje.

¹³Chabanuc xayalbeic ti jch'unolajeletic ti oyic ta Babiloniae, ti t'ujbilic yu'un ti Diose, xchi'uc ti Marcos ti co'ol s'elan jnich'on ta xca'ie.

¹⁴Chabanuc xavalbe abaic ta jujun tal. Ta yutsiluc avo'ntonic, tsacbo aba ac'obic. Acotolicuc lamajemuc avo'ntonic ti vo'oxuc ti oyoxuc ta stojol ti Jesucristoe. Jechuc.